މި ގައުމުގެ ކަންކަން ދާން ޖެހޭނީ ބޭރުބައަކު ބުނާހާ ގޮތަކަށް، ކައިރީގައި ހުންނަ އެމްބަސީގެ އެމެބެސެޑަރު ވަޑައިގެން ވިދާޅުވާ ގޮތަކަށް ނޫންކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. 
2024 ވަނަ އަހަރުގެ ރައްޔިތުންގެ މަޖިލީހުގެ ދާންދޫ ދާއިރާއަށް ވާދަކުރައްވާ ސަރުކާރު ކެންޑިޑޭޓް، މުޙައްމަދު ފަޒީލުގެ ކެމްޕެއިން ޖަލްސާގައި ވާހަކަފުޅުދައްކަވަމުން ރައީސް މުޢިއްޒު ވިދާޅުވީ، މި ގައުމުގެ މިސްރާބު ދާން ޖެހޭނީ ބޭރުބައަކު ބުނާހާ ގޮތަކަށް، ކައިރީގައި ހުންނަ އެމްބަސީގެ އެމެބެސެޑަރު ވަޑައިގެން ވިދާޅުވާ ގޮތަކަށް ނޫންކަމަށެވެ.
އެމަނިކުފާނު ވިދާޅުވީ، ޤައުމުގައި ހިނގަމުންދާ ކަންކަމާމެދު ވިސްނާ ފިކުރުކުރަންޖެހޭނީ ދިވެހި ރައްޔިތުން އަމިއްލައަށް ކަމަށާއި އަދި ޤައުމާމެދު ގޮތް ނިންމަން ޖެހޭނީވެސް ދިވެހި ރައްޔިތުން އަމިއްލައަށް ކަމަށެވެ
ރައީސް މުޢިއްޒު ވިދާޅުވީ ނިމިދިޔަ ރިޔާސީ އިންތިޚާބުގައި ދިވެހި ރައްޔިތުން ބޭރުގެ އެމްބެސެޑަރުން ވިދާޅުވާ ގޮތަކަށް ޤައުމުގެ މިސްރާބު ގެންދިޔުން މާޒީކޮށްފި ކަމުގައެވެ.
ރިޔާސީ އިންތިޚާބުގައި ކުރީ ސަރުކާރަށް ނޫނެކޭ ބުނި ގޮތަށް ކުރިއަށް އޮތް ރައްޔިތުންގެ މަޖިލީސް އިންތިޚާބުގައިވެސް ކުރީ ސަރުކާރުގެ މިސްރާބަށް ނޫނެކޭ ބުނުމަށް ރައީސް މުޢިއްޒު ވަނީ އެދިވަޑައިގެންފައެވެ.
