މި ދިވެހިރާއްޖެ ރަނގަޅު މިސްރާބަކަށް ގޮސް ހަމަމަގަށް އެޅުވުމަށް ރައްޔިތުންގެ މަޖިލީހުގެ މެޖޯރިޓީ އަބަދުވެސް އޮންނަންވީ އެމްޑީޕީގެ އަތުގައި ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އެމްޑީޕީގެ ޓިކެޓުގައި އައްޑޫ ސިޓީއަށް ވާދަކުރައްވާ ކެންޑިޑޭޓުންގެ ފަރާތުން މާލޭގައި އުޅޭ އެ ދާއިރާގެ ރައްޔިތުންނަށް ދިން ތަރާވީހުގައި ވާހަކަފުޅު ދައްކަވަމުން ސޯލިހު ވިދާޅުވީ ރައްޔިތުންނަށް ސީދާ ފައިދާއެއްވާ ކަމެއް ކުރާ ބަޔަކީ އެމްޑީޕީ ކަމަށާއި އެމްޑީޕީގެ ސިޔާސަތުތައް ބައްޓަން ކޮށްފައި އޮންނަނީ ވެސް އެގޮތަށް ކަމަށެވެ. އެހެން ކަމުން އަބަދުވެސް މަޖިލިސް އޮންނަންވީ އެމްޑީޕީ އަތުގައި ކަމަށް އޭނާ ވިދާޅުވިއެވެ.
ޞާލިހު ވިދާޅުވީ ރާއްޖެ ހަމަމަގަށް އެޅުވުމަށްޓަކައި ރައްޔިތުންގެ މަޖިލިސް ބޭނުންވާނޭ ކަމަށާއި ހަގީގަތުގައި ރައްޔިތުންގެ މަޖިލީހުގެ މެޖޯރިޓީ އަބަދުވެސް އޮންނަންވީ އެމްޑީޕީގައިކަމަށެވެ. އަދި ރައްޔިތުންނަށް ސީދާ ފައިދާއެއްވާ ކަމެއް ކުރާ ބަޔަކު އެމްޑީޕީކަމަށާއި ސިޔާސަތުތައް އެމްޑީޕީގައި ބައްޓަން ކުރެވިފައި އޮތީ ވެސް އެގޮތަށްކަމަށް ޞާލިހު ވިދާޅުވިއެވެ.
އައްޑޫ އަށް މި ވޭތުވެދިޔަ 50 އަހަރު ދުވަހުގެ ތެރޭގައި ވެސް ހަގީގަތުގައި ތަރައްގީގެ މަސައްކަތެއް ކުރެވިފައި އޮތީ އެމްޑީޕީގެ ވެރިކަމެއްގައި ކަމަށާއި އަދި ހާއްސަކޮށް މި ވޭތުވެދިޔަ ފަސް އަހަރު ކުރެވުނު މަސައްކަތްތައް އައްޑޫ ރައްޔިތުން ފާހަގަކުރާނެ ކަމަށް ސޯލިހު ވިދާޅުވި އެވެ.
”އައްޑޫ ސިޓީގެ މަގުތައް ހެދުމާއި އެއާޕޯޓު ތަރައްގީ ކުރުމާއި ރިސޯޓުތައް އެޅުމަށްޓަކައި ބިން ހިއްކުމާއި، ރަށަށް ބޭނުންވާ ބިންތައް ހިއްކުމާއި ބަނދަރުތައް ހެދުމާއި މިފްކޯގެ ކޯލްޑް ސްޓޮރޭޖުތައް ބޮޑު ކުރުމަށް އަޅުގަނޑުމެން ފަށާފައި ހުރި މަސައްކަތްތައް ފެނުނީމާ އަޅުގަނޑު ހިތުން ހަމަގައިމު ވެސް ބަދަލުތަކެއް ގެންނަން މަސައްކަތްތަކެއް ކޮށްފައި ހުރިކަން ތިޔަ ބޭފުޅުންނަށް ފެނިވަޑައިގަންނަވާނެ،“ ސޯލިހު ވިދާޅުވި އެވެ.
ކުރީ ސަރުކާރުން އައްޑޫގައި ކުރިއަށް ގެންދަން ފަށާފައި ހުރި މަޝްރޫއުތައް ލަސްނުކޮށް މި ސަރުކާރުން ވެސް ކުރިއަށް ގެންދަންޖެހޭ ކަމަށާއި އެ ޕްރޮޖެކްޓުތަކަކީ ފައިސާ ވެސް ހޯދައި ޕްލޭނު ކުރެވިފައި ހުރި ޕްރޮޖެކްޓުތަކެއް ކަމަށް ސޯލިހު ވިދާޅުވި އެވެ. އެ ޕްރޮޖެކްޓުތައް ނިމުމުން ހަމަޖެހިލައިގެން އައްޑޫގެ ރައްޔިތުންނަށް އުޅެލެވޭނެ ކަމަށް ވިދާޅުވި އެވެ.
