ފުލަމް ބަލިކޮށް ސިޓީ ތާވަލުގެ އެއްވަނައަށް

އިނގިރޭސި ޕްރިމިއާ ލީގުގައި ފުލަމް ބަލިކޮށް ތާވަލުގެ އެއްވަނައަށް އެންމެ ފަހުގެ ޗެމްޕިއަން މެންޗެސްޓާ ސިޓީ ޖެހިލައިފިއެވެ.

ފުލަމްގެ ދަނޑުގައި މިރޭ ކުޅުނު މެޗް ސިޓީން ކާމިޔާބުކުރީ ހަތަރު ލަނޑު ސުން ލަނޑުންނެވެ.

ސިޓީގެ ފަރާތުން ރަނގަޅު ކުޅުމެއް ފެނިގެންދިޔަ މިމެޗްގެ ބޮޑު ބައި ކޮންޓްރޯލް ކޮށްފައިވަނީ ސިޓީންނެވެ. ހަމައެއާއެކު ގިނަ ޙަމަލާ އުފައްދާފައިވަނީވެސް ސިޓީންނެވެ. މި މެޗްގެ 13 ވަނަ މިނެޓްގައި ސިޓީން ވަނީ ލީޑު ނަގާފައެވެ. މިލަނޑު އެޓީމަށް ކާމިޔާބުކޮށްދިނީ ޖޮޝްކޯ ގްވާޑިއޯލް އެވެ. މިއީ އޭނާ މި ސީޒަންގައި ސިޓީއަށް ކާމިޔާބުކޮށްދިން 5 ވަނަ ލަނޑެވެ.

ކެވިން ޑިބްރެއިނާގެ އެހީތެރިކަމާއި އެކު ޖޮޝްކޯ ގްވާޑިއޯލް ކާމިޔާބުކޮށްދިން ލަނޑާއި އެކު މެޗުގެ ފުރަތަމަ ހާފު ސިޓީން ނިންމާލީ ލީޑުގައި އޮވެގެންނެވެ.

ސިޓީގެ ދެވަނަ ލަނޑު ޖަހައި ލީޑު ފުޅާކުރީ ދެވަނަ ހާފުގެ 59 ވަނަ މިނެޓުގައިއެވެ. މި ލަނޑު ސިޓީއަށް ޖަހައިދިނީ ފިލް ފޮޑެންއެވެ. މި ލަނޑު ޖަހަން ފުރުސަތު ތަނަވަސްކޮށްދިނީ ބަނާޑޯ ސިލްވާއެވެ. ސިޓީގެ ތިންވަނަ ލަނޑު މެޗުގެ 71 ވަނަ މިނެޓުގައި ޖެހިިއިރު، މި ލަނޑު ސިޓީއަށް ކާމިޔާބުކޮށްދިނީ މެޗުގެ ފުރަތަމަ ލަނޑުވެސް އެޓީމަށް ކާމިޔާބުކޮށްދިން ޖޮޝްކޯ ގްވާޑިއޯލްއެވެ. މި ލަނޑު ޖެހުމަށް ވެސް ފުރުސަތު ތަނަވަސްކޮށްދިނީ ބަނާޑޯ ސިލްވާއެވެ. ސިޓީގެ ހަތަރުވަނަ ލަނޑަކީ ލިބުނު ޕެނަލްޓީއެއްގައި ކާމިޔާބުކުރި ލަނޑެކެވެ. މެޗުގެ އިތުރު ވަގުތުގައި މި ލަނޑު ޖަހައިދިނީ ޖޫލިއަން އަލްވަރޭޒްއެވެ.

މިކާމިޔާބީއާއެކު ސިޓީ މިހާރުވަނީ ކުޅުނު 36 މެޗުން ލިބިފައިވާ 83 ޕޮއިންޓާއެކު ތާވަލުގެ އެއްވަނައަށް އަރާފައެވެ. އަދި މިސީޒަންގެ ބޮޑު ބައިގައި ތާވަލުގެ އެއްވަނައިގައި އުޅުނު އާސެނަލް މިހާރުވަނީ 83 ޕޮއިންޓާއެކު ތައާވަލްގެ ދެވަނައަށް ވެއްޓިފައެވެ. އަދި ސިޓީން އެއް މެޗް އިތުރަށް ކުޅެފައިވުމުން އާސެނަލްއަށް ތާވަލުގެ އެއްވަނައަށް އަރަން ފުރުސަތު އެބައޮތެވެ. އެއީ މާދަމާރޭ މެންޗެސްޓަރ ޔުނައިޓެޑާއި އެކު ކުޅޭ މެޗު ކާމިޔާބުކޮށްފި ނަމައެވެ. މި މެޗު އާސެނަލުން ކާމިޔާބު ކޮށްފި ނަމަ 86 ޕޮއިންޓާއި އެކު ތާވަލްގެ ކުރި އެޓީމަށް ލިބޭނެއެވެ.