ކުރިއަށް އޮތް ލޯކަލް ކައުންސިލް އިންތިހާބުގައި މާލޭގެ މޭޔަރުކަމަށް ކުރިމަތިލުމަށް ކުރީގެ މަޖިލިސް މެންބަރު އަލީ އާޒިމް ނިންމަވައި، އެކަމަށް ކުރީގެ ރައީސް މުހައްމަދު ނަޝީދު މިއަދު ތާއީދުކުރައްވާފައިވާ ކަމަށް ހާމަކޮށްފިއެވެ.
މިކަން ހާމަވީ ރައީސް ނަޝީދު އެކްސްގައި ކުރެއްވި ޕޯސްޓަކުންނެވެ. ނަމަވެސް، މިހާރުގެ މާލޭގެ މޭޔަރު އާދަމް އާޒިމް ވެސް ދެވަނަ ދައުރަކަށް އެމްޑީޕީގެ ފަރާތުން ވާދަކުރައްވަން ނިންމަވައި، ކެމްޕެއިން ފައްޓަވާފައިވާކަން ފާހަގަކޮށްލެވެއެވެ.
އާޒިމްގެ ފޮޓޯއަކާ އެކު ހިއްސާކުރެއްވި އެ ޕޯސްޓުގައި ”އަލީ އާޒިމް، މާލެ ސިޓީގެ މޭޔަރު ކަމަށް“ ލިޔުއްވާފައިވެއެވެ. ނަމަވެސް، މިކަމާ ބެހޭ ގޮތުން އަލީ އާޒިމްގެ ބަހެއް މިހާތަނަށް ލިބޭ ގޮތެއް ނުވިއެވެ.
ރައީސް ނަޝީދުގެ ތާއީދު އަލީ އާޒިމަށް އޮތްކަން ހާމަކުރެއްވިއިރު، މިހާރު ވެސް މާލޭގެ މޭޔަރުކަން ކުރައްވާ އާދަމް އާޒިމް ވެސް އެމްޑީޕީގެ ފަރާތުން މޭޔަރުކަމުގެ ދެވަނަ ދައުރަކަށް ކުރިމަތިލައްވާނެކަން ވަނީ އިއުލާނުކުރައްވާފަ އެވެ. ކުރީގެ ރައީސް އިބްރާހިމް މުހައްމަދު ސޯލިހު (އިބޫ)ގެ އަރިސް ބޭފުޅެއް ކަމަށްވާ އާދަމް އާޒިމް މިހާރު ވަނީ ކެމްޕެއިން ވެސް ރަސްމީކޮށް ފައްޓަވައިފަ އެވެ. މި މަހުގެ ހަތަރުވަނަ ދުވަހުގެ ރޭ އޭނާ ވަނީ ބައެއް ސަޕޯޓަރުންނާ އެކު ބައްދަލުވުމެއް ބާއްވައި، ތާއީދު ހޯއްދެވުމުގެ މަސައްކަތް ފައްޓަވާފަ އެވެ.
މިހާރުގެ މޭޔަރު އާދަމް އާޒިމް މަގާމުގެ ހުވާކުރެއްވީ މިދިޔަ އަހަރުގެ ޖެނުއަރީ 22 ގަ އެވެ. އެއީ ރައީސްކަމުގެ މަގާމަށް ޑރ. މުހައްމަދު މުއިއްޒު އިންތިހާބުވުމާ ގުޅިގެން މޭޔަރުކަމުން އިސްތިއުފާ ދެއްވުމުން ބޭއްވި ބައި އިލެކްޝަން ކާމިޔާބުކުރައްވައިގެންނެވެ. އޭނާ އެ އިންތިހާބުގައި ވާދަކުރައްވައި ކާމިޔާބުކުރެއްވީ މިހާރު ސިޓީ ކައުންސިލްގެ ކައުންސިލަރަކަށް ހުންނެވި މުހައްމަދު ސައިފް ފާތިހާއި ކުރީގެ ބަންޑާރަ ނައިބު އާއިޝަތު އާޒިމާ ޝަކޫރު އަދި ކުރީގެ ޕޮލިސް ކޮމިޝަނަރު ހުސައިން ވަހީދުއާ ވާދަކުރައްވައިގެންނެވެ.
ކައުންސިލްތަކުގެ ދައުރުގެ ތެރެއިން ބާއްވާ ބައި އިލެކްޝަންތަކުގައި އިންތިހާބުކުރާ މެންބަރުންގެ ދައުރު ގުނަނީ ކައުންސިލްގެ ދައުރުން ބާކީ އޮތް މުއްދަތަށެވެ. އެހެންވެ، އަންނަ އަހަރުގެ މާޗު މަހު ބާއްވާ ކައުންސިލްތަކުގެ އިންތިހާބުގައި މާލޭގެ މިހާރުގެ މޭޔަރު ވެސް އަލުން އިންތިހާބު ކުރާނެއެވެ.
އެމްޑީޕީން މޭޔަރުކަމުގެ މަގާމަށް ނެރޭނެ ކެންޑިޑޭޓެއް ކަނޑައެޅުމަށް އަދި ޕްރައިމަރީއެއް ބާއްވާފައި ނުވާތީ، މިވަގުތު ދެ ބޭފުޅުންގެ ތާއީދުވެސް ހޯއްދަވަމުންދާކަން ފާހަގަކޮށްލެވެ އެވެ. އަދި މޭޔަރުކަމުގެ ކެމްޕެއިން އާދަމް އާޒިމް ފެއްޓެވިއިރު، އެ މަގާމަށް ސަރުކާރުގެ ވެރިކަން ކުރާ ޕީއެންސީގެ ފަރާތުން ކުރިމަތިލައްވާނެ ބޭފުޅަކު ވެސް އަދި ނޭނގެ އެވެ. ނަމަވެސް މާލެ ސިޓީ ކައުންސިލުގައި މިހާރު ވެސް އޮތީ، ވެރިކަން ކުރާ ޕީއެންސީގެ މެޖޯރިޓީއެވެ.
