ފާއިތުވީ ދެއަހަރުތެރޭ އިސްރާއީލުގެ ޖަލުތަކުގައި ފަލަސްތީނުގެ94 ގައިދީން މަރުވެފައިވާ ކަމަށް ފިޒިޝަންސް ފޯ ހިއުމަން ރައިޓްސް އިޒްރޭލް (ޕީއެޗްއާރްއައި) އިން ބުނެފިއެވެ.
އިޒްރޭލުގެ އިންސާނީ ހައްގުތަކަށް މަސައްކަތް ކުރާ ޖަމިއްޔާއަކުން ފިޒިޝަންސް ފޯ ހިއުމަން ރައިޓްސް އިޒްރޭލް (ޕީއެޗްއާރްއައި) އިން ނެރުނު ރިޕޯޓެއްގައި ބުނެފައި ވަނީ ގަސްތުގައި މީހުން މަރައި އެކަން ސިއްރުކުރުމުގެ ކަންތައް އަދިވެސް އިޒްރޭލުގެ ޖަލުތަކުގައި އޮންނަ ކަމަށާއި ފާއިތުވީ ދެ އަހަރުތެރޭ ޖަލުތަކުގައި ތިބ 94 ގައިދީން މަރުވެފައިވާ ކަމަށެވެ.
އެ ރިޕޯޓުގައި ހިމަނާފައި ވަނީ ހަމާސް ޖަމާއަތުން އިޒްރޭލަށް ހަމަލާ ދޭން ފެށި ހިސާބުން ފެށިގެން 2025 ވަނަ އަހަރުގެ އޮގަސްޓް މަހުގެ 31 ވަނަ ދުވަހާ ހަމައަށެވެ. އަދި ފާއިތުވި 10 އަހަރު ތެރޭގައި އިޒްރޭލުގެ ބެލުމުގެ ދަށުގައި ފަލަސްތީނުގެ 30 އަށް ވުރެ ގިނަ މީހުން މަރުވެފައިވާ ކަމަށް ވެސް އެ ރިޕޯޓުގައި ބުނެފައިވެއެވެ.
އިޒްރޭލް ޕްރިޒަން ސާވިސް (އައިޕީއެސް) އިން ބުނީ އެ ޖަމާއަތް ހިންގަނީ ގާނޫނާ އެއްގޮތްވާ ގޮތުގެ މަތިން، ރަސްމީ އިދާރާތަކުގެ ބެލުމުގެ ދަށުގައި ކަމަށެވެ. ނަމަވެސް ބޭރު ފަރާތްތަކުން ކުރާ ތުހުމަތުތަކާ ގުޅޭ ގޮތުން އެއްވެސް އެއްޗެއް ބުނެފައެއް ނުވެއެވެ.
7 އޮކްޓޯބަރު 2023 އިން ފެށިގެން ޣައްޒާއާއި ހުޅަނގު އައްސޭރީގައި ފަލަސްތީނުގެ އެތައް ހާސް ބަޔަކު ވަނީ ބަންދުކޮށްފައެވެ.
ޕީއެޗްއާރްއައި އިން ބުނީ އިސްރާއީލުން ހައްޔަރުކޮށް ވަކިން ގިންތިކޮށްފައިވާ ފަލަސްތީނު ރައްޔިތުންނާ ދެކޮޅަށް ރޭވިގެން ހިންގާ އިންސާނީ ހައްގުތަކާ ހިލާފު އަމަލުތައް ވަރަށް ބޮޑަށް ފާހަގަވެފައިވާ ކަމަށެވެ. އަދި މިއީ ހަނގުރާމަ ފެށުނީއްސުރެ އިޒްރޭލުގެ ކަމާބެހޭ ފަރާތްތަކުން ތަންފީޒު ކުރަމުން އަންނަ ރަސްމީ ސިޔާސަތުގެ ދަށުން ކޮށްފައިވާ ކަމެއް ކަމަށް ވެސް އެ ބަޔާނުގައި ބުނެފައިވެއެވެ.
އިޒްރޭލުގެ ކަމާބެހޭ ފަރާތްތަކުން ވަނީ ރެޑް ކްރޮސް އަށް ފަލަސްތީނު މީހުންގެ މައުލޫމާތު ދިނުން ހުއްޓާލައި، ޑިޓެންޝަން ފެސިލިޓީތަކަށް ވަނުމަށް ހުރަސް އަޅާފައެވެ.
ޕީއެޗްއާރްއައި އިން ބުނީ އެ ރިޕޯޓު ބިނާކޮށްފައި ވަނީ ރަސްމީ ރެކޯޑްތަކާއި ފޮރެންސިކް ރިޕޯޓާއި އިންސާނީ ހައްގުތަކަށް މަސައްކަތް ކުރާ އެހެން ޖަމިއްޔާތަކުގެ މައުލޫމާތުގެ މައްޗަށް ބިނާކޮށެވެ.
މަރުވި މީހުންގެ ތެރެއިން 52 މީހުން ތިބީ އަސްކަރީ ޖަލުތަކުގައި ކަމަށާއި 42 މީހުން މަރުވީ އައިޕީއެސް އިން ހިންގާ މަދަނީ ޖަލުތަކުގައި ކަމަށް އެ ރިޕޯޓުގައި ބުނެފައިވެއެވެ. ޕީއެޗްއާރްއައި އިން ބުނާ ގޮތުގައި އެ މީހުން މަރުވީ ޖިސްމާނީ އަނިޔާގެ ސަބަބުންނެވެ.
ހަމައެއާއެކު އިންސާނީ ހައްގުތައް ނިގުޅައިގަނެ، ރޭވިފައިވާ އަނިޔާތަކުގެ ސަބަބުން ފަލަސްތީނުގެ އެތައް ސަތޭކަ ބަޔަކު މަރުވަމުންދާ ކަމަށް ވެސް އެ ބަޔާނުގައި ބުނެފައިވެ އެވެ. އެންމެ ގިނަ މީހުން މަރުވެފައި ވަނީ އިސްރާއީލުގެ ޣައްޒާގެ ދެކުނުގައި އޮންނަ ސްޑެ ޓެއިމަން އަސްކަރީ ޖަލުގައެވެ.
