ރައީސް ޑރ. މުހައްމަދު މުއިއްޒުގެ ސަރުކާރު ވެރިކަމާ ހަވާލުވިތާ ދެ އަހަރު ދުވަހުގެ ތެރޭގައި 11 ބަނދަރެއްގެ މަސައްކަތް ނިންމާލައި، އިތުރު 101 ބަނދަރުގެ މަސައްކަތް ފަށާފައިވާ ކަމަށް ހައުސިން މިނިސްޓްރީއިން ހާމަކޮށްފިއެވެ.
މި މަސައްކަތްތައް ހަލުވިކަމާއެކު ކުރިއަށް ގެންދަނީ ރައްޔިތުން އެންމެ ބޭނުންވާ ގޮތަށް، ރާއްޖޭގެ ކޮންމެ ރަށަކަށް ތަރައްގީ ގެނައުމުގެ ސަރުކާރުގެ ވިސްނުމުގެ ދަށުންނެވެ.
ހައުސިން މިނިސްޓްރީއިން ދާދި ފަހުން ކުރި ޕޯސްޓެއްގައި ވަނީ ސަރުކާރު ވެރިކަމަށް އައިތާ ފުރަތަމަ 104 ދުވަހުގެ ތެރޭގައި ބަނދަރު ހެދުމުގެ ދާއިރާއިން ކޮށްފައިވާ މަސައްކަތުގެ ތަފާސްހިސާބުތައް އާންމުކޮށްފައެވެ. މި ތަފާސްހިސާބުތަކުން ދައްކާ ގޮތުގައި، އެ ކުރު މުއްދަތުގެ ތެރޭގައި 11 ބަނދަރެއްގެ މަސައްކަތް އެއްކޮށް ނިންމާލެވިފައިވާއިރު، އިތުރު 101 ބަނދަރުގެ މަސައްކަތް ކޮންޓްރެކްޓްކޮށް، ފަށާފައިވާ ކަމަށް މިނިސްޓްރީން ވިދާޅުވެފައިވެއެވެ.
މި ސަރުކާރުން މިހާތަނަށް ބަނދަރުގެ މަސައްކަތް ނިންމާލާފައިވާ ރަށްތަކުގެ ތެރޭގައި ގއ. ކޮލަމާފުށި، ގދ. ހޯނޑެއްދޫ، އދ. ފެންފުށި، މ. މުލި، ތ. ކަނޑޫދޫ، ށ. މަރޮށި، ނ. މަނަދޫ، ނ. މަގޫދޫ، ހއ. ބާރަށް، ހދ. ނޮޅިވަރަންފަރު އަދި ހދ. ކުމުންދޫ ހިމެނެއެވެ. މި ރަށްތަކުގެ ރައްޔިތުންނަށް މި ބަނދަރުތަކުގެ ސަބަބުން ދަތުރުފަތުރުގެ ފަސޭހަތަކާއި އިގްތިސާދީ ކުރިއެރުން ލިބިގެންދާނެ ކަމަށް ލަފާކުރެވެއެވެ.
ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންނެވީ ރާއްޖޭގެ ކޮންމެ ރަށަކަށް ބޭނުންވާ ތަރައްގީގެ މަޝްރޫއުތައް ހިންގަވާނެ ކަމަށް ވައުދުވެވަޑައިގެންނެވެ. އެގޮތުން، ރައްޔިތުންގެ ބޭނުންތަކަށް އިސްކަންދެއްވައިގެން، ބަނދަރުތަކުގެ އިތުރުން މަގު ހެދުމާއި، ފެނާއި ނަރުދަމާގެ ނިޒާމު ގާއިމުކުރުންފަދަ ގިނަ މަޝްރޫއުތައް ދަނީ ހިންގަވަމުންނެވެ. މިގޮތަށް ބަނދަރުގެ މަސައްކަތްތައް ހަލުވިކަމާއެކު ކުރިއަށް ގެންދެވުމަކީ ރައީސްގެ ވައުދުފުޅުތައް ފުއްދެވުމުގެ ތެރެއިން ފެނިގެންދާ ކަމެކެވެ.
