ނޯތު ޕޮލިސްގެ ރީޖަނަލް ހެޑްކުއާޓާޒް މާޅޮސްމަޑުލު އުތުރުބުރީ އުނގޫފާރުގައި ޤާއިމު ކުރައްވަން ސަރުކާރުން ނިންމަވައިފިއެވެ. ނޯތު ޕޮލިސް ރީޖަނަލް ހެޑްކުއާޓާޒް އުނގޫފާރުގައި ޤާއިމު ކުރައްވަން ނިންމަވައި އެކަން ވަނީ ދިވެހި ސަރުކާރުގެ ގެޒެޓުގައިވެސް އިޢީލާނު ކުރައްވާފަ އެވެ.
މިނިސްޓްރީ އޮފް ހޯމްއެފެއާޒްއިން އާންމުކުރައްވާފައިވާ އިއުލާނެއްގައި ބުނެފައިވަނީ ޤާނޫނު ނަންބަރު 34/2020 (ދިވެހި ފުލުހުންގެ ޚިދުމަތުގެ ޤާނޫނު) ގެ 6 ވަނަ މާއްދާގެ ދަށުން، ލާމަރުކަޒީ އުސޫލުން ފުލުހުންގެ ޚިދުމަތް ދިނުމަށްޓަކައި، ދިވެހި ފުލުހުންގެ ޚިދުމަތް އިދާރީގޮތުން އިންތިޒާމު ކުރެވިގެންވާގޮތް، ކޮމިޝަނަރ އޮފް ޕޮލިސްގެ މަޝްވަރާގެ މަތިން 15 ޖޫން 2021 ގައި މިނިސްޓަރ އޮފް ހޯމް އެފެއާޒް ވަނީ ކަނޑަ އަޅުއްވާފައި ކަމުގަ އެވެ. އަދި މާލެ ސަރަޙައްދު ހިމެނޭގޮތުން ދިވެހި ފުލުހުން މުޅިރާއްޖޭގައި އިންތިޒާމު ވެގެން ވަނީ 6 ސަރަހައްދެއްގައި ކަމަށް ވެސް ބުނެފައިވެއެވެ.
މާލެ ސަރަޙައްދު ހިމެނޭގޮތުން ދިވެހި ފުލުހުން މުޅިރާއްޖޭގައި އިންތިޒާމު ވެގެން ވާ 6 ސަރަހައްދު ތިރީގައި އެވަނީއެވެ.
1. ކެޕިޓަލް ޕޮލިސް (މާލެ، ހުޅުމާލެ، ހުޅުލެ، ވިލިމާލެ، ތިލަފުށި އަދި ގުޅީފަޅު ހިމެނޭ ސަރަޙައްދު) ހެޑްކުއަރޓަރޒް މާލޭ ގައެވެ.
2. އަޕަރ ނޯތް ޕޮލިސް (ހއ، ހދ އަދި ށ އަތޮޅު ހިމެނޭ ސަރަޙައްދު) ރީޖަނަލް ހެޑްކުއަރޓަރޒް ހދ. ކުޅުދުއްފުށީ ގައެވެ.
3. ނޯތު ޕޮލިސް (ނ، ރ، ބ އަދި ޅ އަތޮޅު ހިމެނޭ ސަރަޙައްދު) ރީޖަނަލް ހެޑްކުއަރޓަރޒް ރ. އުނގޫފާރު
4. ނޯތް ސެންޓްރަލް ޕޮލިސް (ކ، އއ، އދ އަދި ވ އަތޮޅު ހިމެނޭ ސަރަޙައްދު) ރީޖަނަލް ހެޑްކުއަރޓަރޒް އއ ރަސްދޫ ގައެވެ.
5. ސައުތު ސެންޓްރަލް ޕޮލިސް (މ، ފ، ދ، ތ އަދި ލ އަތޮޅު ހިމެނޭ ސަރަޙައްދު) ރީޖަނަލް ހެޑްކުއަރޓަރޒް ލ. ގަން، ސަބް ރީޖަނަލް ހެޑްކުއަރޓަރޒް ދ. ކުޑަހުވަދޫގައެވެ.
6. ސައުތު ޕޮލިސް (ގއ، ގދ، ޏ އަދި ސ އަތޮޅު ހިމެނޭ ސަރަޙައްދު) ރީޖަނަލް ހެޑްކުއަރޓަރޒް އައްޑޫ ސިޓީ، ސަބް ރީޖަނަލް ހެޑްކުއަރޓަރޒް ގދ. ތިނަދޫގަ އެވެ.
