ގަސްގަހާއި ގެއްސާއި ގަހުގެ ބައިތަކުގެ އުފެއްދުންތައް އަދި ރެގިއުލޭޓް ކުރެވޭ ތަކެތި ހުއްދަ ނެތި އެތެރެ ނުކުރެވޭނެ ކަމަށް މިނިސްޓޜީ އޮފް އެގްރިކަލްޗަރ އެންޑު އެނިމަލްވެލްފެއާ އިން ބުނެފިއެވެ.
މިނިސްޓްރީން ބުނީ ގަސްގަހާގެހި ޙިމާޔަތްކުރުމުގެ ޤާނޫނު ގެ 22 ވަނަ މާއްދާގެ (ހ) ގައި ބަޔާންކޮށްފައިވާ ފަދައިން ފައިޓޯސެނިޓަރީ އިމްޕޯޓު ހުއްދަ (ގަސްގަހާގެއްސާއި ގަހުގެ ބައިތައް އެތެރެކުރުމުގެ ހުއްދަ) ހޯދުމުން އިސްތިސްނާކުރާ ޙާލަތުގައި މެނުވީ، ގަސްގަހާގެއްސާއި، ގަހުގެ ބައިތަކުގެ އުފެއްދުންތަކާއި އަދި ރެގިއުލޭޓްކުރެވޭ ތަކެތި، މި ޤާނޫނުގެ ދަށުން ދޫކުރެވޭ ފައިޓޯސެނިޓަރީ އިމްޕޯޓު ހުއްދަ އޮވެގެން މެނުވީ ދިވެހިރާއްޖެއަށް އިމްޕޯޓުކޮށްގެންނުވާނެކަމަށެވެ.
އަދި ޤާނޫނުގެ 25 ވަނަ މާއްދާގެ (ހ) ގައި ބަޔާންކޮށްފައިވާ ފަދައިން ގަސްގަހާގެއްސާއި، ގަހުގެ ބައިތަކުގެ އުފެއްދުންތަކާއި ރެގިއުލޭޓްކުރެވޭ ތަކެތީގެ ކޮންސައިންމަންޓްތައް އައިސްފައިވާކަން، ތަކެތި އެތެރެކުރުމަށް ކަނޑައެޅޭ ބަނދަރުތަކާ ޙަވާލުވެހުރި ފައިޓޯސެނިޓަރީ އިންސްޕެކްޓަރަށް އިމްޕޯޓުކުރާ ފަރާތުން ރިޕޯޓުކޮށް އަދި ފައިޓޯސެނިޓަރީގޮތުން ބަލައިފާސްކުރުމަށް ހުށަހަޅަންވާނެކަމަށެވެ.
މިހެންކަމުން ފައިޓޯސެނިޓަރީ އިމްޕޯޓު ހުއްދަނެތި ގަސްގަހާގެއްސާއި، ގަހުގެ ބައިތަކުގެ އުފެއްދުންތަކާއި ރެގިއުލޭޓްކުރެވޭ ތަކެތި އެތެރެކުރުމާއި، ތަކެތި އެތެރެކުރުމަށް ކަނޑައެޅޭ ބަނދަރުތަކާ ޙަވާލުވެހުރި ފައިޓޯސެނިޓަރީ އިންސްޕެކްޓަރަށް އިމްޕޯޓުކުރާ ފަރާތުން މިނިސްޓްރީން ކަނޑައަޅާފައިވާ އުސޫލާއެއްގޮތަށް ރިޕޯޓުނުކޮށް އަދި ފައިޓޯސެނިޓަރީގޮތުން ބަލައިފާސްކުރުމަށް ހުށަނާޅާ އެތެރެކުރެވޭ ތަކެއްޗާއި، މިނޫނަސް ފައިޓޯސެނިޓަރީ އިމްޕޯޓު ހުއްދައިގައި ބަޔާންކޮށްފައިވާ ޝަރުތުތަކާއި ޚިލާފަށް އެތެރެކުރެވޭ ގަސްގަހާގެއްސާއި ގަހުގެބައިތައް، ފައިޓޯސެނިޓަރީ އިންސްޕެކްޓަރުންނަށް ލިބިފައިވާ ބާރުގެތެރެއިން ކަރަންޓީނުކުރުމަށްފަހު ނައްތާލެވޭނެ.
މިނިސްޓްރީން އިތުރަށް ބުނީ ފައިޓޯސެނިޓަރީ އިމްޕޯޓު ހުއްދައަކީ 6 މަސްދުވަހުގެ މުއްދަތަކަށް ދެވޭ ހުއްދައެއްކަމުން، މުއްދަތު ހަމަވެފައިވާ ހުއްދަތައް އާކޮށް، ދުރާލާ ހުއްދަ ލިބިފައިވާކަން ކަށަވަރުކުރުމަކީ މި ވުޒާރާގެ އެދުމެކެވެ. މިއާއެކު ކުރިން ނެގިފައިވާ ހުއްދަތަކުގައިވެސް އެތެރެކުރާ ބާވަތްތަކުގެ ގަސްގަހާގެއްސާއި ގަހުގެބައިތައް ހުރިކަން ކަށަވަރުކުރުމަކީ އެތެރެކުރާފަރާތުގެ ޒިންމާއެއްަކަމަށެވެ.
