މިއަދުން ފެށިގެން ރާއްޖޭގައި ތިބި ތެލެސީމިއާ ކުދިންނަށް ސަރުކާރުން އިނާޔަތެއް ދިނުމަށް ނިންމައި އެކަމަށް އެދި ރަޖިސްޓްރީވުމުގެ ފުރުސަތު ހުޅުވާލައިފިއެވެ.
ތެލެސީމިއާ ކުދިންނަށާއި މީހުންނަށް އެލަވަންސެއް ތައާރަފް ކުރިއިރު، މިއަދުން ފެށިގެން މަހަކު 2،000ރ. ގެ އެލަވަންސެއް ލިބޭނެއެވެ.
ތެލަސީމިއާ ކުދިންނަށް އެލަވަންސެއް ދޭން ނިންމަވާފައިވާކަން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ޢިއުލާން ކުރެއްވީ، މިދިޔަ އަހަރުގެ އޮކްޓޯބަރު މަހުގައެވެ. ރައީސުލްޖުމްހޫރިއްޔާ މިގޮތަށް ނިންމެވުމާއި ގުޅިގެން ނޭޝަނަލް ސޯޝަލް ޕްރޮޓެކްޝަން އޭޖެންސީން ވަނީ، މިއެހީތެރިކަން ދިނުމަށްޓަކައި ޚާއްޞަ ޤަވާއިދެއް އެކުލަވާލާފައެވެ.
މި އެލަވަންސަށް އެދި ހުށަހެޅުމުން، އެޕްލިކޭޝަން ފާސްވާ މަހުގެ ޖެހިގެން އަންނަ މަހުން ފެށިގެން ފައިސާ ލިބެން ފަށާނެއެވެ. 18 އަހަރު ނުފުރޭ ކުދިންގެ ފޯމު ހުށަހަޅަންޖެހޭނީ ބެލެނިވެރިންނެވެ.
މި އެލަވަންސް ދިނުން ހުއްޓާލާނީ ފަރުވާ ފުރިހަމަވެ އިތުރަށް ފަރުވާ ބޭނުންނުވާ ހާލަތްތަކުގައާއި، ކުއްޖަކު ނިޔާވުމުން ނުވަތަ އަމިއްލައަށް އެލަވަންސް ބޭނުންނުވާކަމަށް އެދުމުންނެވެ. ނަމަވެސް ޞިއްޙީ ހާލަތު ބަދަލުވެ އަލުން ފަރުވާ ބޭނުންވާކަމަށް ސެންޓަރުން ކަނޑައަޅައިފިނަމަ އެލަވަންސް އިއާދަކޮށްދެވޭނެއެވެ.
ތެލަސީމިއާ ކުދިންނަށް ދޭ ޚިދުމަތްތައް ފުޅާކުރުމުގެ ގޮތުން ހުޅުމާލޭގައި ފަރުވާ ދޭން ފަށާފައިވާއިރު، ޚާއްޞަ ހޮސްޕިޓަލެއް އެޅުމުގެ މަސައްކަތްވެސް ދަނީ ކުރަމުންނެވެ. މީގެ އިތުރުން ނަފްސާނީ ބައްޔާއި ތެރަޕީގެ ޚިދުމަތްތައް އާސަންދައިން ލިބޭނެ ގޮތް ހަމަޖެއްސުމާއި، އެކަނިވެރި މައިންބަފައިންނަށް ދޭ އެހީ އިތުރުކުރުމަށްވެސް ސަރުކާރުން ވަނީ ނިންމަވާފައެވެ
