ގަވާއިދާ ޚިލާފަށް ރާއްޖޭގައި އުޅެމުންދާ ބިދޭސީންނާއި، އުސޫލުތަކާ ޚިލާފަށް ވިޔަފާރިކުރާ ފަރާތްތައް ހޯދުމަށް ސަރުކާރުން ފަށާފައިވާ ހާއްސަ މަސައްކަތުގެ ތެރެއިން، ހުޅުމާލޭ ފޭސް 1 އިން ތިން ބިދޭސީއަކު އިއްޔެ އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
މޯލްޑިވްސް އިމިގްރޭޝަނާއި ދިވެހި ފުލުހުންގެ ޚިދުމަތް ގުޅިގެން ހިންގި މި އޮޕަރޭޝަނަކީ، ހުޅުމާލޭގައި ހިންގަމުން އަންނަ ކެފޭތަކާއި ޓޭކްއަވޭ ޕޮއިންޓުތައް ބަލައި ފާސްކުރުމަށް ކުރިއަށްގެންދިޔަ ހަރަކާތެކެވެ. އިމިގްރޭޝަނުން ހާމަކޮށްފައިވާ ގޮތުގައި، މި އޮޕަރޭޝަންގެ ތެރެއިން ބަލައި ފާސްކުރި ތަންތަނުން އަތުލައިގަތް 03 ބިދޭސީންނަކީ ރާއްޖޭގެ ގަވާއިދުތަކާ ޚިލާފަށް މަސައްކަތް ކުރަމުންދިޔަ ބަޔަކަށްވާތީ، އެ ފަރާތްތަކަށް އިތުރު ފުރުސަތެއް ދިނުމެއް ނެތި ޑީޕޯޓުކުރުމުގެ މަސައްކަތް މިހާރު ދަނީ ކުރަމުންނެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ބިދޭސީންގެ މައްސަލަ ހައްލުކުރުމަށް ދެއްވާ އަހަންމިއްޔަތުގެ ދަށުން، މި ފާއިތުވި ދެ ހަފްތާގެ ތެރޭގައި އެކަނިވެސް ގަވާއިދާ ޚިލާފަށް ހިންގަމުންދިޔަ 47 އަށްވުރެ ގިނަ ވިޔަފާރި ވަނީ ބަންދުކޮށްފައެވެ.
މި އޮޕަރޭޝަނާ ގުޅޭގޮތުން ވަޒީރު ދާދި ފަހުން ވިދާޅުވެފައިވަނީ، ބިދޭސީން ކޮންޓްރޯލް ކުރާ ވިޔަފާރިތަކުގެ ތެރޭގައި މަނީ ލޯންޑަރިންއަށް ޝައްކުކުރެވޭ ފަދަ ކަންތައްތަކެއް ފާހަގަވަމުންދާ ކަމަށެވެ. އެހެންކަމުން، އެފަދަ ތަންތަނުން ފައިސާ ހޯދާ ގޮތާއި ފައިސާ ދައުރުވާ ގޮތް ބަލައި، ޖިނާއީ ތަހުގީގެއް ފަށަން ތައްޔާރުވަމުންދާ ކަމަށް ވަޒީރު ވިދާޅުވިއެވެ. އަދި ބިދޭސީންނަށް ވިޔަފާރި ކުރަން ފުރުސަތު ދީގެން އަމިއްލަ ނަމުގައި ވިޔަފާރި ރަޖިސްޓްރީކޮށްފައިވާ ދިވެހިންނާ މެދުވެސް ގާނޫނީ ފިޔަވަޅު އަޅައި، ދައުވާ ކުރައްވާނެ ކަމުގެ އިންޒާރު ވަޒީރު ވަނީ ދެއްވާފައެވެ.
ސަރުކާރުގެ ބޭނުމަކީ ބިދޭސީންގެ ބަދަލުގައި ދިވެހިން އަމިއްލައަށް ވިޔަފާރީގެ މައިދާނަށް ނުކުމެ، އިގްތިސާދީ ފައިދާ ދިވެހިންނަށް ލިބޭނެ މަގު ތަނަވަސްކޮށްދިނުމެވެ. ވަޒީރު ފާހަގަކުރެއްވި ގޮތުގައި، މި އޮޕަރޭޝަންތަކުގެ ނަތީޖާއެއްގެ ގޮތުން ބިދޭސީން ހިންގާ ގަވާއިދާ ޚިލާފު ތަންތަން ބަންދުވާން ފެށުމުން، ދިވެހިން ހިންގާ ވިޔަފާރިތަކަށް ލިބޭ ތަރުހީބު މިހާރު ވަނީ ބޮޑުތަނުން އިތުރުވާން ފަށާފައެވެ.
ގަވާއިދާ ޚިލާފަށް އުޅޭ ބިދޭސީން ހޯދުމުގެ މި ހާއްސަ މަސައްކަތް މުޅި ރާއްޖޭގައި މެދުކެނޑުމެއް ނެތި ކުރިއަށް ގެންދިއުމަށް ސަރުކާރުން ވަނީ ނިންމާފައެވެ.
