ފަތިސް ނަމާދަށް ގަޑިއަށް ހޭލައި، ނަމާދުން ދުވަސް ފެށުމަށް ޢަޒުމް ކަނޑައެޅުމަށް ރާއްޖޭގެ ހުރިހާ ދަރިވަރުންނަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިލްތިމާސްކުރައްވައިފިއެވެ.
ރައީސުލްޖުމްހޫރިއްޔާ މިކަމަށް އިލްތިމާސްކުރެއްވީ ހުޅުމާލޭ ފޭސް 2 ގައި މިއަދު ހުޅުވި ”ޝަހީދު ޢަލީ ސްކޫލް“ އިފްތިތާޙްކޮށްދެއްވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
މިއަދުގެ ރަސްމިއްޔާތުގައި ޝަހީދު ޢަލީ ސްކޫލްގެ ލޯގޯ އިފްތިތާޙްކޮށް، ރައީސުލްޖުމްހޫރިއްޔާއަށް ހަނދާނީ ހަދިޔާއެއް ވަނީ އަރުވާފައެވެ. މި ސްކޫލަކީ ގްރޭޑް 1 އިން 10 އަށް ކިޔަވައިދޭ ގޮތަށް ފަރުމާކޮށްފައިވާ ސްކޫލެކެވެ. އިއްޔެގެ ނިޔަލަށް 2000 އަށްވުރެ ގިނަ ދަރިވަރުން އެންރޯލްވެފައިވާ މި ސްކޫލުގައި 54 ކްލާސްރޫމް، ސައިންސް ލެބް، ލައިބްރަރީ، ކޮމްޕިއުޓަރު ލެބް އަދި ކުޅިވަރު ކުޅޭނެ އިންޑޯ އަދި އައުޓްޑޯ ވަސީލަތްތައް ހިމެނެއެވެ.
މި ރަސްމިއްޔާތުގައި އެޑިޔުކޭޝަން މިނިސްޓަރ ޑޮކްޓަރ އިސްމާޢީލް ޝަފީޢު އާއި ސަރުކާރުގެ ބައެއް ވަޒީރުންނާއި، ސްކޫލްގެ އިސްވެރިންނާއި ގިނަ އަދަދެއްގެ ދަރިވަރުން ބައިވެރިވިއެވެ.
މި ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވަނީ، ކޮންމެ ކުއްޖަކުވެސް ދުވަސް ފަށަނީ ފަތިސް ނަމާދުންކަން ކަށަވަރުކުރުމަކީ މައިންބަފައިންގެ ޒިންމާއެއް ކަމުގައި ދެކިވަޑައިގަތުމަށް ބެލެނިވެރިންގެ ކިބައިން އެދިވަޑައިގެންފައެވެ. އަދި ނަމާދަށް ފަރުވާތެރިވުމާއި، މައިންބަފައިންނާއި ޓީޗަރުންގެ ބަސްއެހުމަކީ ތަޢުލީމީ ޙަޔާތުގައި ވަރުގަދަ ބިންގަލެއް އެޅުމަށް ކޮންމެހެން ބޭނުންތެރި ކަމެއްކަން އެމަނިކުފާނު ފާހަގަކުރެއްވިއެވެ.
”ފަރުޟު ފަސް ނަމާދު އަދާކުރުމަށް ހުރިހާ ދަރިވަރުންނަށް ވަރަށް ބޮޑަށް އިލްތިމާސްކުރަން. ވަގުތުން ވަގުތަށް ނަމާދުކުރުމަށް. ފަތިސް ނަމާދަށް ގަޑިއަށް ހޭލައި ފަތިސް ނަމާދުކޮށްގެން ދުވަސް ފެށުމަށް. މިކަމަށް އަޒުމު ކަނޑައެޅުމަށް ހުރިހާ ކުދިންނަށް އިލްތިމާސްކުރަން. މައިންބަފައިން ކިބައިން ވެސް އެދެން ހުރިހާ ކިޔަވާ ކުދިން ފަތިސް ނަމާދު ގަޑީގަިއ ތެދުވެ ނަމާދުކުރުވުން އެއީ މައިންބަފައިންގެ ޒިންމާއެއްގެ ގޮތުގައި ކަނޑައަޅައި އެކަން ކަށަވަރުކުރުމަށް.“ ރައީސް ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި އިތުރަށް ވިދާޅުވީ، ދަރިވަރުން ކިޔަވައި ނިމި ބޮޑެތި މީހުންނަށްވެ، މުޖުތަމަޢަށް ނުކުންނައިރު އެ ކުދިންގެ ޙަޔާތުގެ ބިންގާ ބަލިކަށިވެ، ރެނދުއަޅާފައިވާނަމަ ކުރިމަގުގައި ބޮޑެތި ގޮންޖެހުންތަކާއި ގެއްލުންތަކާ ކުރިމަތިލާން ޖެހޭނެ ކަމަށެވެ. ސްކޫލްތަކަށް ދަރިވަރުން އަންނަނީ އެ ބިންގާ ވަރުގަދަކުރުމަށްކަން ފާހަގަކުރައްވައި، އެކަމަށްޓަކައި ނަފްސާނީ ގޮތުން ދަރިވަރުން ތައްޔާރުކޮށް މަގުދައްކައިދިނުމަކީ ޓީޗަރުންނާއި ބެލެނިވެރިންގެ ބޮޑު ޒިންމާއެއްކަން އެމަނިކުފާނު ހަނދާންކޮށްދެއްވިއެވެ. އަދި މިކަމަށް މަގުފަހިކޮށްދިނުމުގައި ސަރުކާރުން ފުރިހަމަ އެއްބާރުލުން ދެއްވާނެ ކަމުގެ ޔަޤީންކަންވެސް ރައީސް ދެއްވިއެވެ.
އިންކްލޫސިވް އެޑިޔުކޭޝަން: ސަރުކާރުގެ އިސް ސިޔާސަތެއް
މުޖުތަމަޢުގައި އުޅޭ އެކިކަހަލަ ނުކުޅެދުންތެރިކަން ހުންނަ ދަރިވަރުން ހިމެނޭގޮތަށް ”އިންކްލޫސިވް އެޑިޔުކޭޝަން“ ނުވަތަ އެންމެން ބައިވެރިކޮށްގެން ތަޢުލީމު ދިނުމަކީ ސަރުކާރުގެ މުހިއްމު ސިޔާސަތެއްކަން ފާހަގަކުރައްވައި، މިއަދު ހުޅުވުނު ޝަހީދު ޢަލީ ސްކޫލުގައިވެސް އެ ފެސިލިޓީ ޤާއިމްކޮށްފައިވާކަން ރައީސް ފާހަގަކުރެއްވިއެވެ. މީގެ އިތުރުން ރާއްޖޭގެ އެހެން ސަރަޙައްދުތަކުގައިވެސް މިފަދަ ފުރުޞަތުތައް އިތުރުކުރުމަށް މިއަހަރު ޚާއްޞަ މަސައްކަތްތަކެއް ކުރައްވާނެ ކަމުގެ ޔަޤީންކަން އެމަނިކުފާނު ދެއްވިއެވެ.
ރައީސުލްޖުމްހޫރިއްޔާގެ ވާހަކަފުޅު ނިންމަވާލެއްވީ، އަޚްލާޤް ރަނގަޅު ދަރިވަރަކަށް ވުމުގެ ޢަޒުމް ކަނޑައަޅައި، ދީނީ ވަރުގަދަ ބިންގަލެއްގެ މަތީގައި ތަޢުލީމު ހާސިލުކުރުމަށް ލިބޭ ފުރުޞަތުތަކުގެ ބޭނުން ހިފުމަށް ހުރިހާ ކުދިންނަށް ނަޞޭޙަތްތެރިވަމުންނެވެ.
