ދިވެހިރާއްޖޭގެ އިސްލާމީ ޔުނިވަރސިޓީ (އައިޔޫއެމް) ގެ ކެމްޕަހެއް އައްޑޫސިޓީ މަރަދޫފޭދޫގައި ރަސްމީކޮށް ހުޅުވައިފި އެވެ.
މިކަމަށްޓަކައި މަރަދޫފޭދޫގައި ބޭއްވި ހާއްސަ ރަސްމިއްޔާތެއްގައި ކެމްޕަސްގެ ނަންބޯޑު ކަޝްފުކޮށްދެއްވައި، ދިދަ ނަންގަވައިދެއްވީ އައިޔޫއެމްގެ ވައިސް ޗާންސެލަރ ޑރ. އަލީ ޒާހިރާއި، ރައްޔިތުންގެ މަޖިލީހުގެ ފޭދޫ އުތުރު ދާއިރާގެ މެންބަރު އިސްމާއީލް ނިޒާރެވެ.
މި ރަސްމިއްޔާތުގައި ވާހަކަފުޅު ދައްކަވަމުން މެންބަރު އިސްމާއީލް ނިޒާރު ވިދާޅުވީ، މި ކެމްޕަސް ގާއިމުކުރި ކުރީގެ މަރަދޫފޭދޫ ސްކޫލަކީ އެރަށުގެ ތައުލީމީ ތާރީހާ ގުޅިފައިވާ މުހިންމު ބިނާއެއް ކަމަށެވެ. ގިނަ އަހަރުތަކެއް ވަންދެން ބަންދުކޮށްފައި ހުރި އެ އިމާރާތް، މަތީ ތައުލީމު ފޯރުކޮށްދޭ މަރުކަޒެއްގެ ގޮތުގައި އަލުން ބޭނުންކުރަން ފެށުމަކީ ރަށުގެ ރައްޔިތުންނަށް ލިބުނު ވަރަށް ބޮޑު އުފަލެއްކަން އޭނާ ފާހަގަކުރެއްވި އެވެ.
ޔުނިވަރސިޓީގެ ވައިސް ޗާންސެލަރ ޑރ. އަލީ ޒާހިރު ވިދާޅުވި ގޮތުގައި، އަމިއްލަ ފަސްގަނޑުގައި ތިބެގެން ޕީއެޗްޑީއާ ހަމައަށް ކިޔެވުމުގެ ފުރުސަތު ހުޅުވިގެންދިއުމަކީ އައްޑޫގެ ރައްޔިތުންނަށް ލިބުނު ރަނުގެ ފުރުސަތެކެވެ. އަދި ފާއިތުވި ދެ އަހަރު ތެރޭގައި އައިޔޫއެމްއިން ހޯދާފައިވާ ބޮޑެތި ކާމިޔާބީތަކަކީ ސަރުކާރުން އެ ޔުނިވަރސިޓީއަށް ދެއްވާ ހާއްސަ ސަމާލުކަމުގެ ނަތީޖާކަންވެސް އޭނާ ފާހަގަކުރެއްވި އެވެ.
މި ކެމްޕަހުގައި ގާއިމުކުރާ ދާއިމީ ވަސީލަތްތަކާ ބެހޭ މައުލޫމާތު ދެއްވަމުން ޑެޕިއުޓީ ވައިސް ޗާންސެލަރ އަހުމަދު އަމީން މުހައްމަދު ވިދާޅުވީ، އާ އިމާރާތުގައި ކްލާސްރޫމްތަކުގެ އިތުރުން ލައިބްރަރީ، ސެމިނަރ ހޯލް، ދަރިވަރުންގެ ދަނާލު އަދި ސްޓާފް އެކޮމޮޑޭޝަން ހިމެނޭނެ ކަމަށެވެ. މި މަޝްރޫގެ އެއްބަސްވުމުގައި ސޮއިކޮށްފައިވަނީ މިދިޔަ ނޮވެމްބަރު މަހު ރައީސުލްޖުމްހޫރިއްޔާ އައްޑޫއަށް ކުރެއްވި ދަތުރުފުޅުގަ އެވެ.
މަރަދޫފޭދޫ ކެމްޕަސް މިއަދު ހުޅުވީ މާސްޓަރސް ޑިގްރީގެ ކޯހެއް ހިމެނޭހެން ޖުމްލަ ހަތަރު ކޯހަކާއެކުގަ އެވެ. އަންނަ ހަފުތާއާ ހަމައަށް ލޭޓް އެޕްލިކޭޝަނަށް ފުރުސަތު ހުޅުވާލާފައިވާތީ، މި ސެމެސްޓަރގައި އިތުރު ކޯސްތަކެއް ފެށުމުގެ އުންމީދު ބޮޑުކަމަށްވެސް އައިޔޫއެމްއިން މައުލޫމާތު ދެއެވެ.
