ކޮވިޑް ވެކްސިން ދެޑޯޒް ޖަހާފަ ތިބޭ މީހުންނަށް ޖަލުގައި ތިބި ގައިދީންނާއި ބައްދަލުކުރެވޭނެކަމަށް މޯލްޑިވެސް ކަރެކްޝަނުން ހާމަކޮށްފިއެވެ.
ކަރެކްޝަނުން އެކުލަވާލާފައިވާ އާންމު އުސޫލުގައި ބުނާގޮތުން ޖަލުގައި ތިބޭ ގައިދީންގެ އާއިލާ މީހުންގެ ތެރެއިން ކޮވިޑް ވެކްސިން ދެޑޯޒް ހަމަކޮށްފައިވާ ފަރާތްތަކަށް ގައިދީންނާއި ބައްދަލުކުރެވޭނެއެވެ. އެހެންނަމަވެސް ގައިދީންނާއި ބައްދަލުކުރުމަށް ހުއްދަ ދެވޭނީ އެއްފަހަރާ ގިނަވެގެން އާއިލާގެ ފަސް މެންބަރުންނާކަމަށެވެ. އަދި ގައިދީންނާއި ބައްދަލުކުރަން އަންނަ ވަކީލުންނަށްވެސް ޖަލަށް ޒިޔާރަތްކޮށް ބައްދަލު ކުރެވޭނީ ވެކްސިންގެ ދެ ޑޯޒު ފުރިހަމަ ކުރިތާ 14 ދުވަސް ހަމަވުމުން ކަމަށްވެސް އެ އުސޫލުގައި ބުނެފައިވެއެވެ.
ކަރެކްޝަނުން އެކުލަވާލި އުސޫލުގައިވާ ގޮތުން ގައިދީންނާއި ބައްދަލުކުރަންދާ އާއިލާގެ މެންބަރުންގެ އިތުރުން ވަކީލުން އެޗްޕީއޭގެ މިންގަނޑުތަކަށް އަމަލުކުރަން ވާނެ ކަމަށާއި ގަވާއިދާ ހިލާފުވެއްޖެ ނަމަ ވަގުތުން ބައްދަލުވުން މެދުކަނޑައިލުން ނުވަތަ މަސް ދުވަސް ވަންދެން ޖަލަށް ޒިޔާރަތްކުރުން މަނާކުރެވޭނެއެވެ.
