ރާއްޖެއަށް އެންމެ ގިނަ ފަތުރުވެރިން އަންނަނީ ރަޝިޔާ އަދި އިންޑިޔާއިން: ޖަނާހު

ރާއްޖޭގައި ކޮވިޑް-19 ހަލުވިކަމާއެކު ފެތުރެމުންދަނިކޮށް ރާއްޖެ މިބަލިމަނޑުކަމުން ސަލާމަތްކުރަން އެހީތެރިވެދިނީ އިންޑިޔާ އަދި ރަޝިޔާއިން އައި ފަތުރުވެރިންގެ ސަބަބުންކަމަށް ހޮޓެލްސް އެންޑް ރިސޯޓް ކޮންސްޓްރަކްޝަން (އެޗްއާރްސީ)ގެ ޗެއާމަން އަދި މޯލްޑިވްސް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ)ގެ ކުރީގެ ރައީސް މުހައްމަދު އަލީ ޖަނާހު (ޖަނާ) ވިދާޅުވެއްޖެއެވެ.

އިންޑީޔާގެ ނޫހެއްކަމަށްވާ ”ދަ ނިއު އިންޑިއަން އެކްސްޕްރެސް“ އަށް ދެއްވި ހާއްސަ އިންޓަވިއުއެއްގައި ޖަނާހް ވިދާޅުވީ ކޮވިޑް-19 އާ ގުޅިގެން ރާއްޖޭގެ ބޯޑަރު ބަންދުކޮށްފައި އޮތުމަށްފަހު އަލުން ހުޅުވާލުމުން ރާއްޖެއަށް އަންނަ ފަތުރުވެރިންގެ އަދަދު އިތުރުވެގެންދާނެކަމަށާއި އެންމެ ގިނަ ފަތުރުވެރިން އަންނަނީ ރަޝިޔާ އަދި އިންޑިޔާއިން ކަމަށެވެ. އިންޑިޔާއިން ރަޝިޔާގެ މައްޗަށް ކުރި ހޯދާނެ ކަމަށް ޖަނާހު ވަނީ ވިދާޅުވެފައެވެ.

”ރާއްޖެ އަށް އައި ފަތުރުވެރިންގެ އަދަދު ގާތްގަނޑަކަށް ހަ ލައްކަ އަށް މި އެރީ ވަރަށް އުނދަގޫ ހާލަތެއްގައި އޮއްވައި. ގިނަ ފަތުރުވެރިން އައިސްފައި ވަނީ ރަޝިއާއި އާއި އިންޑިއާ އިން. ދުނިޔޭގެ އެކިކަންކޮޅުތަކުގައި ކޮވިޑް-19 ޖެހޭ މީހުންގެ އަދަދު ވަރަށް ބޮޑަށް އިތުރުވެގެން ސަރުކާރުން ބޯޑަރުތައް ބަންދު ކުރީ، އެކަމަކު، މިހާރު އަލުން އެ ވަނީ (ބޯޑަރު) ހުޅުވާފައި. އަޅުގަނޑަށް ޔަގީން ކަން އެބައޮތް އިންޑިއާ އިން ރަޝިއާގެ މައްޗަށް ކުރި ހޯދާނެ ކަމުގެ. އަޅުގަނޑު ބުނާނީ ރަޝިއާ އާއި އިންޑިއާ އިންނޭ ރާއްޖެ ސަލާމަތް ކުރާނީ މި އުނދަގޫ ހާލަތުގައި،“ ޖަނާހް ވިދާޅުވިއެވެ

މީގެ އިތުރުން އިންޑިޔާ އާއި ރާއްޖޭގެ ވިޔަފާރިވެރިން ގުޅިގެން މަސައްކަތްކުރުމުގެ މުހިންމުކަން ފާހަގަކުރެއްވިއެވެ. އަދި މިދަތުރަކީ ވެސް އިންވެސްޓްމަންޓް ބައިވެރިން ހޯދުމަށް ކުރައްވާ ދަތުރެއް ކަމަށް ޖަނާހު ވިދާޅުވިއެވެ.

“ އިންޑިއާ އަދި ރާއްޖޭގެ ފަތުރުވެރިންނަށް ދޭން ބޭނުންވާ މެސެޖްއަކީ މިއީ ރަނގަޅު ވަގުތެކޭ އެންމެން އިށީނދެ ތިބެގެން އެއް ބަޔަކު އަނެއް ބަޔަކަށް އެހީތެރިވެވޭނެ މަގު ފަހިކުރުމަށްޓަކައި މަޝްވަރާ ކުރަން،“ ޖަނާހް ވިދާޅުވިއެވެ.

ޓޫރިޒަމް މިނިސްޓްރީގެ ތަފާސް ހިސާބުތަކަށް ބަލާލާއިރު މިދިޔަ އަހަރެކޭ އެއްގޮތަށް މި އަހަރު ވެސް އެންމެ ގިނަ އިން ފަތުރުވެރިން އަންނަނީ ރަޝިއާ އިންނާއި އިންޑިއާ އިންނެވެ. މި އަހަރުގެ މިހާތަނަށް ފަތުރުވެރިކަމުގެ މާކެޓްގެ %24.3 ހިއްސާ ކުރަނީ ރަޝިއާއެވެ. އަދި %16.5 ހިއްސާ ކުރަނީ އިންޑިއާއެވެ.