ދެފަތުރުވެރިޔަކު ރާއްޖެ އެތެރެވާން އިމިގްރޭޝަނުން ހުއްދަ ނުދިނުމުން އއ.ރަސްދޫ ގެސްޓް ހައުސް ހިންގާ ފަރާތްތަކުން ކަންބޮޑުވުން ފާޅުކޮށްފިއެވެ.
ރަސްދޫއަށް އައުމަށް ބުކިންގ ހައްދައިގެން ރާއްޖެ އަންނަން އުޅުނު ދެފަތުރުވެރިޔަކު އިމިގްރޭޝަނުން ވަނީ ހިފަހައްޓާފައެވެ.
ރަސްދޫގެ ވިޔަފާރިވެރިން މައުލޫމާތުދިންގޮތުގައި އެމެރިކާގެ ދެފަތުރުވެރިޔަކު ރާއްޖެ އެތެރެވުމުގެ ހުއްދަ ނުދިނީ ދެފަތުރުވެރިން ވެކްސިން ނުޖަހައި ތިބުމުންނެވެ. ނަމަވެސް އެޗްޕީއޭ އިން އާއްމުކޮށްފައި އޮންނަ އުސޫލު ބުނާ ގޮތުން ފަތުރުވެރިން ވެކްސިން ނުޖަހައި ތިބި ނަމަވެސް ގެސްޓްހައުސް ހުންނަ ރަށުގެ އާބާދީގެ %60 މީހުން ވެކްސިން ޖަހާފައިވާނަމަ އެރަށަކަށް ފަތުރުވެރިންނަށް ދެވޭނެ ކަމަށާއި ރަސްދޫގެ %72 މީހުން ވަނީ މިހާރު ވެކްސިން ފުރިހަމަ ކޮށްފައިވާ ކަމަށް އެމީހުން މައުލޫމާތުދިނެވެ.
އިމިގްރޭޝަނުން އެފަތުރުވެރިންނަށް އެންގީ ރިސޯޓަކަށް ބުކިން ނެހެއްދިނަމަ ޑީޕޯޓް ކޮށްލާނެ ކަމަށާއި އެމީހުން ހެނދުނު 07:00 އިން ފެށިގެން މެންދުރު ގާތްގަނޑަކަށް އެކެއް ޖަހަންދެން އެއަރޕޯޓުގައި ތިބިކަމަށް ރަސްދޫގެ ގެސްޓު ހައުސް ހިންގާ މީހަކު ބުނެފައިވެއެވެ. އަދި އެންމެ ފަހުން އެމީހުން ރިސޯޓަކަށް ބުކިންގ ހަދައިގެން ރިސޯޓަށް ދިއައީކަމަށް މައުލޫމާތުދީފައިވެއެވެ.
އެޗްޕީއޭ އިން އިމިގްރޭޝަނަށް މައުލޫމާތު ހިއްސާކޮށްފައިނުވާތީ އިމިގްރޭޝަނުން އެފަތުރުވެރިން ރަސްދޫއަށް ދިޔުމަށް ހުއްދަނުދިނީއެވެ. އެހެންކަމުން އެރަށުގެ ގެސްޓު ހައުސް ހިންގާ މީހުންގެ ކަންބޮޑުވުމަކީ މާދަމާ ވެސް އެރަށަށް ގިނަ އަދަދެއްގެ ފަތުރުވެރިން އައުމަށް ބުކިން ހައްދާފައި ވާއިރު އެފަތުރުވެރިންނަށް ވެސް އެތެރެވުމުގެ ހުއްދަ ނުދީފާނެތީއެވެ. އެހެންވެއްޖެނަމަ ފަތުރުވެރިންގެ ކުރިމަތީގައި ރަސްދޫގެ އަގުވެއްޓިދާނެކަމުގެ ބިރުއެބައޮތެވެ.
ރަސްދުއަކީ ގެސްޓްހައުސް ވިޔަފާރި އެންމެ ފުޅާ ދާއިރާގައި ކުރަމުން އަންނަ ރަށަކަށްވެފައި މިއަދު ހިގާދިޔަ ކަންތައްތަކުގައި ޓޫރިޒަމް މިނިސްޓްރީ، ހެލްތު މިނިސްޓްރީ އަދި އެޗްޕީއޭ އާއި އިމިގްރޭޝަނަށް ވެސް ގުޅައިގެން މައްސަލައަށް ހައްލެއް ލިބޭތޯ މަސައްކަތް ކުރި ނަމަވެސް މިމައްސަލައަށް އެއްވެސް ހައްލެއް ލިބިފައިނުވާކަމަށް ގެސްޓު ހައުސްގެ ވެރިން މީޑިޔާތަކަށް މައުލޫމާތުދީފައިވެއެވެ.
