ތިލަފުށީގެ ފުރަތަމަ ފިޔަވަހީގައި ހިއްކާފައިވާ ސަރަހައްދުގެ ބިންގަނޑު އަޑިޔަށްދާ މައްސަލައަށް ހައްލެއް ލިބިގެންދާނީ ދެވަނަ ފިޔަވަހީގައި ކަމަށް ހައުސިންގ ޑިވެލޮޕްމަންޓް ކޯޕަރޭޝަން އެޗް.ޑީ.ސީން ވިދާޅުވެއްޖެއެވެ.
އެޗްޑީސީގެ މެނޭޖިންގ ޑިރެކްޓަރ ސުހެއިލް އަޙްމަދު ވިދާޅުވީ ފުރަތަމަ ފިޔަވަހީގައި ހިއްކާފައިވާ ސަރަހައްދުގެ ބިންގަނޑު އަޑިޔަށްދާކަމަށާއި އޭގެ ސަބަބުން އިމާރާތްތަކަށް ގެއްލުންވަމުންދާކަމުގެ ޝަކުވާތައް ލިބެމުންދާ ކަމަށެވެ.
މާލެ ސަރަޙައްދުގެ ކުނި މެނޭޖްކުރުމަށް ތަރައްޤީކޮށްފައިވާ ތިލަފުށީގެ ފުރަތަމަ ފިޔަވަހީގައި ބިންހިއްކާފައިވަނީ ކުނި އަޅައިގެން ކަމަށްވުމާއެކު ކުނި ޑީކޮމްޕޯޒް ވުމުގެ ސަބަބުން ބިންގަނޑު އަޑިޔަށް ދަނީކަމަށް އަދި މިމައްސަލައަށް ހައްލެއް ލިބިގެންދާނީ ދެވަނަ ފިޔަވަހީގައި ބިން ހިއްކުމުން ކަމަށް ސުހެއިލް ވިދާޅުވިއެވެ.
ސުހެއިލް އިތުރަށް ވިދާޅުވި ގޮތުގައި ދެވަނަ ފިޔަވަހީގައި ބިން ހިއްކުމުން ފުރަތަމަ ފިޔަވަހީގައި ހުރި ތަންތަނުގެ ތެރެއިން ދެވަނަ ފިޔަވައްސަށް ބަދަލުކުރަން ބޭނުންވާ ފަރާތްތަކަށް އިސްކަމެއް ދެއްވާނެއެވެ. އަދި މިގޮތަށް ގިނަ ބަޔަކު ދެވަނަ ފިޔަވައްސަށް ބަދަލުކުރެވިއްޖެކަމުގައިވާނަމަ ފުރަތަމަ ފިޔަވަހީގެ ބިންގަނޑު އިތުރަށް ލެވެލްކޮށް ފަސްގަނޑު ރަނގަޅުކުރުމުގެ މަސައްކަތް ކުރާނެކަމަށްއެޗްޑީސީއިން ވިދާޅުވިއެވެ.
ފުރަތަމަ ފިޔަވަހީގައި ހުރި ދަތިތައް ހައްލުކުރުމުގެ މަސައްކަތް މިހާރުވެސް ދަނީ ކުރެވެމުންނެވެ. އެގޮތުން ތިލަފުށީގެ ނަރުދަމާއާއި ރައްކާތެރި ބޯފެނާއި ކަރަންޓުގެ ޚިދުމަތާއި އިންޓަރނެޓްގެ ޚިދުމަތް ލިބޭނެ ގޮތް ހަމަޖެއްސުމުގެ މަސައްކަތްކުރަމުން އަންނަކަމަށް އެޗްޑީސީއިން ވިދާޅުވެއެވެ. މީގެ އިތުރުން ތިލަފުށީގެ މަގުތައް ރަނގަޅު ފެންވަރެއްގައި ހެދުމުގެ މަސައްކަތާއި ރަށުތެރޭގައި ފެން ހަރުލާފައި ހުންނަ މައްސަލައަށް ހައްލެއް ޙޯދުމުގެ މަސައްކަތް އެޗްޑީސީން ދަނީ ކުރަމުންނެވެ.
