ހަތަރު އަހަރުގެ ކުޑަކުއްޖަކަށް ޖިންސީ ގޯނާކުރިކަމުގެ ތުހުމަތުގައި 63 އަހަރުގެ އަންހެނަކު ހައްޔަރުކޮށްފިއެވެ.
މިމައްސަލަ ފުލުހުުން ދަނީ އިތުރަށް ތަހުޤީގުކުރަމުންނެވެ.
ގަލޮޅު ސްކޫލުގައި ތައުލީމް ހާސިލްކުރަމުންދާ ހަތަރު އަހަރުގެ ކުއްޖަކަށް ޖިންސީ ގޯނާކުރި މައްސަލައިގައި އެސްކޫލްގެ ހުރިހާ މަސައްކަތު އަންހެނުން ވަނީ ސަސްޕެންޑް ކޮށްފައެވެ.
އާއިލާއިން ބުނެފައިވަނީ މަސައްކަތު މީހަކާ ހަވާލުކޮށްފައި ކުއްޖާ ފާޚާނާއަށް ފޮނުވި ފަހުން ކުއްޖާއަށް ޖިންސީ ގޯނާކޮށްފައިވާކަމަށާއި ގެޔަށް އައިގޮތަށް ތަދުވެގެން އުޅޭތީ ހޮސްޕިޓަލަށް ދެއްކުމުން ޑޮކްޓަރުގެ ރިޕޯޓުގައި ބުނާގޮތުން ޖިންސީ ގުނަވަނުގެ އެތެރެއިން 1.5 ސެންޓިމީޓަރަށް ވަނީ ކަނޑައިގެން ގޮސްފައި ކަމަށެވެ.
އެޑިއުކޭޝަން މިނިސްޓްރީން ހުރިހާ ސްކޫލަކަށް ފޮނުވި ސާރކިއުލާގައި ވިދާޅުވެފައި ވަނީ ސުކޫލުތަކުގެ ތެރޭގައި ދަރިވަރުންގެ ސަލާމަތާއި ރައްކާތެރިކަން ޔަޤީންކުރެވިފައިވުމަކީ ބެލެނިވެރިންނާއި މުޖުތަމަޢުގެ އިތުބާރު ސުކޫލުތަކަށް ލިބިދޭނޭ ކަމެއް ކަމަށެވެ. އަދި ސުކޫލުގައި ދަރިވަރުން ހޭދަ ކުރާ ހުރިހާ ވަގުތަކީ އެކުދިން ރަނގަޅަށް ބެލެހެއްޓި އަދި އެކުދިންނަށް ޒިންމާވާނޭ ފަރާތެއް އަބަދުވެސް ކަނޑައެޅިފައި ހުންނަންވާނޭ ވަގުތުތަކެއް ކަމަށާއި ސުކޫލުތަކުގައި ކިޔަވައިދެމުންގެންދާ ބޭބީ ނާސަރީއާއި ނާސަރީ އަދި ފައުންޑޭޝަން ސްޓޭޖްގެ (އެލްކޭޖީ އަދި ޔޫކޭޖީ) ދަރިވަރުން ސުކޫލުގައި ހޭދަކުރާ ހުރިހާ ވަގުތެއްގައި ދަރިވަރުންނަށް ޒިންމާވާނެ ޓީޗަރަކު އެ ކުދިންނާ ހަވާލުވެ ހުރިކަން ސްކޫލްތަކުގެ ޕްރިންސިޕަލުން ކަށަވަރު ކުރަން ޖެހޭނެ ކަމަށެވެ.
މީގެ އިތުރުން ކުޑަކުދިން ފާހާނާއަށް ދާއިރު އިތުރު ފަރާތަކާ ހަވާލު ކުރާނަމަ އެއީ ކޮން ފަރާތެއްކަން ކަށަވަރު ކުރުމަށް އެޑިއުކޭޝަން މިނިސްޓްރީން އަންގަވައިފިއެވެ.
