ޖުޑީޝަލް ސާވިސް ކޮމިޝަން (ޖޭއެސްސީ) އިން ބަލަމުން ގެންދާ ލީކުވި އޯޑިއޯގެ މައްސަލަ ތަހުޤީގުކޮށް ނިމެންދެން ކްރިމިނަލް ކޯޓުގެ ގާޒީ އަލްއުސްތާޒު ހުސައިން ފާއިޒު ރަޝާދު ސަސްޕެންޑްކޮށްފިއެވެ.
ޖޭއެސްސީން ވިދާޅުވާ ގޮތުގައި ގާޒީ ފާއިޒުގެ ސުލޫކީ މައްސަލައާ ގުޅިގެން، އެ މައްސަލައިގެ ބާވަތަށާއި ތަހުގީގަށް ހޯދިފައިވާ މައުލޫމާތަށް ބަލައި، ޝަރުއީ ދާއިރާގެ އިތުބާރު ނެގެހެއްޓުމުގެ އަސާސްގެ މައްޗަށް ބިނާކޮށް، މިއަދުން ފެށިގެން ދެ މަސް ދުވަހަށް އޭނާ ސަސްޕެންޑްކޮށްފައިވާ ކަމަށާއި ކްރިމިނަލް ކޯޓުގެ ގާޒީ އަލްއުސްތާޒު އަލީ އާދަމް އާއި ޑްރަގް ކޯޓުގެ ގާޒީ އަލްއުސްތާޒު މުހައްމަދު ސަމީރުގެ މައްޗަށް ތަހުޤީގު ނުހިންގޭނެ ކަމަށެވެ.
ލީކުވި އޯޑިޔޯތަކުގެ ފޮރެންސިކް އެނާލިސިސް ހެދުމުން އެގުނު ގޮތުގައި ޔާމީންގެ ޝަރީއަތުގެ މައްސލައާއި ގުޅިގެން ލީކުވި އޯޑިޔޯގައި ގާޒީ ފާއިޒު ފިޔަވައި ދެންތިބި ދެގާޒީންގެ އަޑު ނޫންކަމަށް ވަނީ ސާބިތުވެފައެވެ.
މިތުހުމަތްތަކަށް ގާޒީ ފާއިޒު އިންކަރުކުރި ކަމުގައިވީނަމަވެސް އޯޑިޔޯތަކުގައި ދައްކާފައި ހުރި ވާހަކަތަކުގެ ސަބަބުން ޖޭއެސްސީން އޭނާ ކުށްވެރިކުރެއެވެ. އަދި ފުލުހުންގެ ފޮރެންސިކް އެނާލިސިސްގެ މައްޗަށް ބިނާކޮށް އެމައްސަލަ ބަލަން ވަނީ ނިންމާފައެވެ.
