ރާއްޖޭގައި ވަޒީފާ ނެތް މީހުންނަށް އެލަވަންސެއް ދިނުމަށް ސަރުކާރުން ތައްޔާރުވަމުންދާކަމަށް އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވެއްޖެއެވެ.
ފައްޔާޒު ވިދާޅުވި ގޮތުގައި ސަރުކާރުން މިހާރުދަނީ ރާއްޖޭގައި ވަޒީފާނެތި އުޅޭ ޒުވާނުންނަށް ”އަންއެމްޕްލޯއިމަންޓް އިންޝުއަރެންސް ސްކީމެއް“ ތައާރަފްކުރުމުގެ މަސައްކަތް ކުރަމުން ކަމަށެވެ.
ފައްޔާޒު މިހެން ވިދާޅުވެފައިވަނީ މިނިމަމްވޭޖް ކަނޑައެޅުމަށް ހޮޓެލް ޖެންގައި މިއަދު ބޭއްވުނު ރަސްމިއްޔާތުގައި ވާހަކަފުޅު ދައްކަވަމުންނެވެ.
މިނިސްޓަރ ފައްޔާޒު އިތުރަށް ވިދާޅުވި ގޮތުގައި ސަރުކާރުގެ އަމާޒަކީ 2022ވަނަ އަހަރު ޕައިލެޓް ޕްރޮގްރާމް ފެށިގެންދިޔުން ކަމަށާއި މިކަމާގުޅޭގޮތުން އެކިއެކި ސްޓޭކް ހޯލްޑަރުންނާއި އަދި ވޯލްޑް ބޭންކާއި އެކު މަޝްވަރާތައް ކުރަމުން ގެންދާ ކަމަށެވެ.
މީގެ އިތުރުން ވަޒީފާގެ މާޙައުލުގެ ސަލާމަތާއި ރައްކާތެރިކަން ކަށަވަރުކުރުމަށް ޤާނޫނެއް އެކުލަވާލުމުގެ މަސައްކަތް ކުރަމުންދާ ކަމަށާއި މި ބަދަލުތަކާއެކު ރާއްޖޭގެ ވަޒީފާގެ މާޙައުލަށް ގިނަ ކުރިއެރުންތަކެއް ލިބިގެންދާނެ ކަމަށް ޤަބޫލްކުރާ ކަމަށްވެސް މިނިސްޓަރ ވިދާޅުވިއެވެ.
