މިމަހުން ފެށިގެން ޓީޗަރުންގެ މުސާރަ ބޮޑުކުރިނަމަވެސް ބިދޭސީ ޓީޗަރުންގެ މުސާރައަށް ބަދަލެއް ނާންނާނެ ކަމަށް އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެއެވެ.
ތައުލީމީ ދާއިރާގެ މުވައްޒަފުންގެ ބޮޑު ކުރި މުސާރައިގެ އޮނިގަނޑު އިއުލާންކުރުމަށް މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން އެޑިއުކޭޝަން މިނިސްޓަރ އައިޝަތު އަލީ ވިދާޅުވީ މިމަހުން ފެށިގެން މުސާރަ ބޮޑުކޮށްފައިވަނީ ދިވެހި ޓީޗަރުންނަށް ކަމަށާއި ބިދޭސީ ޓީޗަރުންނަކީ ވަކި ކޮންޓްރެކްޓެއްގެ ދަށުން މަސައްކަތް ކުރާ ޓީޗަރުންތަކެއް ކަމަށެވެ.
އެހެންކަމުން ބިދޭސީ ޓީޗަރުންގެ މުސާރަތައް ކަނޑައަޅާނީ ދިވެހި ޓީޗަރުންނާ ތަފާތުކޮށް ކޮންޓްރެކްޓުގައިވާ ގޮތަށް ކަމަށް މިނިސްޓަރު ވަނީ ވިދާޅުވެފައެވެ.
ރައީސް އިބްރާހިމް މުހައްމަދު ސޯލިހު މިއަދު ނިންމާފައި އޮތް ގޮތުން ޓީޗަރުންނާއި ޕްރިންސިޕަލުންނާއި އެޑިއުކޭޝަން ޑިވޮލޮޕްމަންޓް އޮފިސަރުންގެ މުސާރަ މި މަހުން ފެށިގެން ބޮޑުވާނެއެވެ. އެގޮތުން މިމަހުން ފެށިގެން ކޮންމެ ޓީޗަރަކަށް މުސާރައިގެ ގޮތުގައި މަހަކު 13،266ރ. ލިބޭނެއެވެ. އަދި ގިނަ ޓީޗަރުންނަށް މަހަކު 20،000ރ. އަށް ވުރެ ބޮޑު މުސާރައެއް ލިބޭނެއެވެ.
އޭގެ އިތުރުން އެންމެ ދަށް ރޭންކުގެ ޕްރިންސިޕަލަށް ވެސް މުސާރައިގެ ގޮތުގައި މަހަކު 30،000ރ. ލިބޭނެއެވެ. އަދި އެންމެ މަތީ ރޭންކްގެ ޕްރިންސިޕަލުންނަށް މަހަކު 35،452ރ. ގެ މުސާރައެއް ލިބޭނެއެވެ
