މި އަހަރުގެ ސެޕްޓެމްބަރު، 9 ވަނަ ދުވަހުގައި އޮންނަ ރިޔާސީ އިންތިހާބުގައި ޕީޕީއެމް/ޕީއެންސީ ކޯލިޝަންއިން ވާދަކުރަން، ޕީއެންސީގެ ކެންޑިޑޭޓުގެ ގޮތުގައި ހުންނެވި ޑރ. މުއިއްޒުގެ ކެންޑިޑެސީ ފޯމު މިއަދު ހެނދުނު އިލެކްޝަންސް ކޮމިޝަން (އީސީ) އަށް ހުށަހަޅުއްވައިފި އެވެ.
ޕީޕީއެމްގެ ކުރީގެ ނައިބު ރައީސް ޑރ މުއިއްޒުގެ ކެންޑިޑެސީ ފޯމު ހުށައެޅީ މުއިއްޒާއި އޭނާގެ ރަނިން މޭޓް ފަރެސްމާތޮޑާ ދާއިރާގެ މަޖިލިސް މެމްބަރު ހުސެއިން މުޙައްމަދު ލަތީފް، މިއަދު ހެނދުނު 9:30 ހާއިރު، ރިޔާސީ އިންތިހާބުގެ މައިމަރުކަޒު ދުރުބާރުގެ އަށް ވަޑަައިގެންނެވެ. މުއިއްޒުގެ ކެންޑިޑެސީ ފޯމާއި ހަވާލުވީ އީސީގެ ރައީސް ފުއާދު ތައުފީގެވެ.
މުއިއްޒުގެ އަރިހުގައި ޕީއެންސީގެ ރައީސް އަބްދުއްރަހީމް އަބްދުﷲ އާއި ޕީޕީއެމްގެ ސެކްރެޓެރީ ޖެނެރަލް މުހައްމަދު ތޮލާލު ވެސް ބައިވެރިވެ ވަޑަައިގެންނެވި އެވެ.
ރިޔާސީ އިންތިހާބުގައި ވާދަކުރަން ބޭނުންވާ ފަރާތްތަކުގެ ކެންޑިޑެސީ ފޯމް ހުށަހެޅުމުގެ ސުންގަޑި މިއަދުގެ ނިޔަލަށް ހަމަވާނެއެވެ.
