މާލެ ސަރަޙައްދުން ދޫކުރާ ބަންޑާރަ ގޯތިތައް ލިބޭ މީހުންގެ މެދުގައި ގުރުއަތު ނެގުން އަންގާރަ ދުވަހު އޮންނައިރު، ގޯތި ލިބުނު މީހުންނަށް ހަވާލުކުރާނީ ދާއިމީ ރެޖިސްޓްރީ ކަމަށް މިނިސްޓްރީ އޮފް ނޭޝަނަލް ޕްލޭނިން ހައުސިން އެންޑް އިންފްރަރ ސްޓްރަކްޗައިން ބުނެފިއެވެ.
ގޯތި ލިބޭ މީހުންގެ ލިސްޓު ރޭ އާންމުކޮށްފައިވާއިރު، އެ ފަރާތްތަކުގެ މެދުގައި ގުރުއަތު ނެގުން އޮންނާނީ މާދަމާ ގަލޮޅު ދަނޑުގައެވެ.
ހައުސިން މިނިސްޓްރީން ދާއިމީ ލިސްޓް އާންމުކުރައްވާ ކުރި އިޢުލާނުގައި ވިދާޅުވީބަންޑަރަ ގޯތި ލިބޭ މީހުންގެ ދާއިމީ ލިސްޓްގެ ދަށުން ”ފުރަތަމަބުރުގައި ގޯތި ލިބޭ“ ފަރާތްތަކަކީ ހުޅުމާލެ، ގުޅީފަޅު، އަދި ގިރާވަރުފަޅުން މިވަގުތު ގޯތި ދޫކުރުމަށް ކަނޑައެޅިފައިވާ ބިމުން ގޯތި ލިބޭ ފަރާތްތައްކަމަށެވެ. އަދި ދާއިމީ ލިސްޓްގައި ”ދެވަނަބުރުގެ ލިސްޓްގައި ހިމެނޭ“ ފަރާތްތަކަކީ ގޯތި ދޫކުރުމަށް އިތުރަށް ކަނޑައަޅާ ބިމުން ގޯތި ދިނުމަށް ހަމަޖެހިފައިވާ ފަރާތްތަކެވެ.
ހައުސިން މިނިސްޓްރީން ވިދާޅުވީ، ދާއިމީ ލިސްޓްގެ ”ފުރަތަމަ ބުރުގައި ގޯތި ލިބޭ“ މީހުން ގޯތީގެ ގުރުއަތުލުމަށް ހާޒިރުވާނެ ތަނާއި ވަގުތު އޮންލައިން ޕޯޓަލް މެދުވެރިކޮށާއި، އެސް.އެމް.އެސް އަދި އީ-މެއިލް ގެ ޒަރީޢާއިން އަންގަމުންގެންދާނެކަމަށެވެ. މިގޮތުން ގޯތި ލިބޭ މީހުންގެ މެދުގައި ގުރުއަތު ނެގުން ދެ ދުވަހަށް ބަހާލައިގެން ގަލޮޅުދަނޑުގައި ބާއްވަން ނިންމަވާފައިވާކަމަށްވެސް ހައުސިން މިނިސްޓްރީގެ ސީނިއާ އެގްޒެކެޓިވް ޑިރެކްޓަރ މުޙައްމަދު އާރިފް ވިދާޅުވިއެވެ.
ގުރު ނަގަން ބޭނުންކުރާނީ ޕްލޮޓް ނަންބަރު ޖަހާފައި ހުރި ކަރުދާސް ހުރި ބަކެޓެއް ކަމަށާއި ގިނަވެގެން ދެ ދުވަސް ތެރޭގައި މި ހުރިހާ ބޭފުޅުންގެ ގުރު ނަގާ ނިންމާލެވޭނެކަމަށް ހައުސިން މިނިސްޓްރީން ބުނެއެވެ.
ގޯތި ލިބޭ މީހުންގެ ދާއިމީ ލިސްޓްގައި 19639 މީހަކު ގޯއްޗަށް ޝަރުތު ހަމަވެއެވެ. އޭގެތެރެއިން 18955 މީހުންނަށް މިދައުރު ނިމުމުގެ ކުރިން ގޯތި ލިބޭނެ ކަމަށް ސްޓޭޓް މިނިސްޓަރ އަކްރަމް ކަމާލުއްދީން ވިދާޅުވިއެވެ. ޝަރުޠު ހަމަވާ މީހުންގެ ތެރެއިން މިދައުރުގައި ގޯތި ނުދެވޭ 684 މީހުންނަށް ބިން އިތުރަށް ހަމަޖެހުމުން ގޯތި ދެއްވާނެ ކަމަށް ޕްލޭނިން މިނިސްޓްރީން ވިދާޅުވެއެވެ. މި 684 މީހުންނަކީ ކައިވެނިނުކުރާ، އަދި ދަރިންވެސް ނެތް އުމުރުން 18 އަހަރާ 25 އަހަރުން ދެމެދުގެ މީހުންނެވެ.
