އަންނަ މަހުގެ 9 ވަނަ ދުވަހުގައި އޮންނަ ރިޔާސީ އިންތިހާބު ކާމިޔާބުކޮށް ވެރިކަމަށް ވަޑައިގެންފި ނަމަ، ރަމަޟާން މަހުގެ ފަހު 10 ގައި ސަރުކާރުގެ އޮފީސްތައް ބަންދު ކުރައްވާނެ ކަމަށް އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ރިޔާސީ ކެމްޕެއިން ދަތުރުފުޅުގައި ބ. އަތޮޅު އޭދަފުއްޓަށް ވަޑައިގެން އެރަށުގެ ރައްޔިތުންނާއި ބައްދަލުކޮށް ވާހަކަދައްކަވަމުންނެވެ.
މުއިއްޒު ވިދާޅުވީ ރޯދަ މަހުގެ ފަހު 10 ގައި ސަރުކާރުގެ އޮފީސްތައް ބަންދު ކުރާނެ ކަމށާއި އޭރުން ރޭ އަޅުކަމުގައި ވަރަށް ގިނަ އިން އުޅުމުގެ ފުރުސަތު ދިވެހި ރައްޔިތުންނަށް ލިބިގެންދާނެ ކަމަށެވެ.
މުއިއްޒު ވިދާޅުވީ ދިވެހިންނަކީ މާތްވެގެންވާ އިސްލާމް ދީނުގައި ތިބި ބައެއް ކަމަށާއި ދިވެހިންގެ ހުރިހާ ކަމެއް ބިނާވެގެން ވަނީ އިސްލާމް ދީނުގެ ސިޔާސަތުތަކުގެ މައްޗަށް ކަމަށެވެ. އެހެންކަމުން އިސްލާމް ދީނަށް އަޅުކަން ކުރުމަށް ފަހިވާ ގޮތަށް ކަންކަން ހުރުމަކީ ރައްޔިތުން ވަރަށް އުފާ ކުރާނެ ކަމެއް ކަމަށް މުއިއްޒު ވިދާޅުވިއެވެ.
“ އަޅުގަނޑުމެންގެ ސަރުކާރެއްގައި އަޅުގަނޑުމެން ގަސްދު ކުރަނީ ރަމަޟާން މަހުގެ ފަހު 10 އެއީ ސަރުކާރު އެއްކޮށް ބަންދު ދުވަސްތަކުގެ ގޮތުގައި ކަނޑައަޅަން،“ މުއިއްޒު ވިދާޅުވިއެވެ.
މުއިއްޒު ވިދާޅުވީ މި ނިންމުމުގެ ސަބަބުން ރައްޔިތުން ރޭ އަޅުކަމުގައި ވަރަށް ގިނަ ވަގުތު ހޭދަކުރެއްވޭނެ ކަމަށެވެ. އަދި އުމްރާ އަށް ދާން ބޭނުންވާ މީހުންނަށް ފަސޭހަކަމާ އެކީގައި އެ އަޅުކަން އަދާކުރުމުގެ ފުރުސަތު ލިބޭނެ ކަމަށް ވިދާޅުވިއެވެ.
އަދި މީގެ އިތުރުން އެމަނިކުފާނު ވަނީ ސްކޫލްތަކުގައި ތައުލީމް ހާސިލް ކުރާ ދަރިވަރުންގެ ތެރެއިން ގްރޭޑް އަށަކުން ދަށުގެ ގްރޭޑްތަކުގައި އުޅޭ ދަރިވަރުންނަށް ސްކޫލްތައް ބަންދުވާނެ ކަމަށް ވެސް ވިދާޅުވެފައެވެ.
