ކުރިޔަށް އޮތް ރިޔާސީ އިންތިހާބުގައި ރައީސް ޔާމިންގެ ތާއީދު އޮތީ ފާރިޝް އަށްކަމަށް ބުނެ ފަތުރަމުންދާ ވާހަކަތަކަށް ހޫނު ރައްދެއް ރައީސް ޔާމީންގެ އަނބިކަނބަލުން މެޑަމް ފާތުމަތު އިބްރާހިމް ދެއްވައިފިއެވެ.
މިފަހަރުގެ ރިޔާސީ އިންތިހާބުގައި 8 ކެންޑިޑޭޓަކު ވާދަކުރައްވާއިރު، ރައްޔިތުންގެ މެދުގައި އެންމެ ތާއީދު ބޮޑު ކަމަށް ފެންނަނީ ޕީޕީއެމް ޕީއެންސީގެ ކެންޑިޑޭޓް ޑރ މުއިއްޒު އާއި އެމްޑީޕީގެ ކެންޑިޑޭޓް ރައީސް އިބްރާހިމް މުހައްމަދު ސޯލިޙް އެވެ.
މި ދެކެންޑިޑޭޓުންގެ ވާދަވެރިކަމުގެ ތެރެއިން ޕީއެންސީގެ ކެންޑިޑޭޓު ޑރ މުއިއްޒަށް އޮންނަ ތާއިދު ގެެއްލުވާލުމަށް އިދިކޮޅު އެމްޑީޕީން އިންނަނީ ފިތުނަވެރިވާހަކަތައް ފަތުރަމުންނެވެ. އެގޮތުން މި ފަހުން ފެތުރިގެންދިޔަ ވާހަކަ އަކީ ރައީސް ޔާމިން ތާއިދު މުއިއްޒަށް ނެތްކަމަށާ، އެމަނިކުފާނު ތާއީދު ކުރައްވަނީ އެ މަނިކުފާނަށް ބޮޑުބޭބޭފުޅު ވިދާޅުވާ ފާރިޝް މައުމޫނަށް ކަމަށެވެ. އަދި އެމަނިކުފާނާ ބައްދަލު ކުރެއްވުމަށް ފާރިޝް ޖަލަށް ވަޑައިނެވިކަމަށް ބުނެ ވީޑިއޯއެއްވެސް ވަނީ ދައުރުވެފައެވެ.
މި ފިތުނަވެރިވާހަކަ ތަކަށް ރައްދު ދެއްވުމަށް ރައީސް ޔާމީންގެ އަނބިކަނބަލުން މެޑަމް ފާތުމަތު ރޭ ވަނީ ރަސްމީކޮށް މުއިއްޒުގެ ކެމްޕެއިންނަށް ނިކުމެވަޑައިގެން ރައީސް ޔާމީންގެ ތާއީދު އޮތްކޮޅު ދައްކައިދީފައެވެ.
ރޭ މެޑަމް ފާތުން ވަނީ ހިންގަވާފައި މުއިއްޒުގެ ކެމްޕެއިން ޖަގަހައަށް ވަޑައިގެންފައެވެ. އެސަރަހައްދުން އެ ކަމަނާއަށް ފެނިގެންދިޔައީ ރައީސް ޔާމީން އަށާ، އެކަމަނާއަށް ތާއީދުއޮތް މިންވަރެވެ. މުޅި ސަރަހައްދުވަނީ ސަޕޯޓަރުން ފުރާލާފައެވެ. އެންމެން އެއް އަޑަކުން ގޮވަމުން ދިޔައީ ރައީސް ޔާމީން މިނިވަން ކުރުމަށެވެ.
ޕީޕީއެމްއިން އެންމެ ފުރަތަމަ ރިޔާސި ޓިކެޓް އެރުވީ ރައީސް ޔާމީން އަށެވެ. އެހެންނަމަވެސް 11 އަހަރުގެ ޖަލު ހުކުމެއްގައި ރައީސް ޔާމިން ، މި ސަރުކާރުން ވަނީ ޖަލަށްލާފައެވެ.
ރައީސް ޔާމިން ޖަލަށްލާފައިވަނީ އެމަނިކުފާނު ރިޔާސީ އިންތިހާބުގައި ވާދަކޮށްފިނަމަ މި ސަރުކާރު ބަލިވާނެތީކަމަށް އެމަނިކުފާނަށް ސަޕޯޓް ކުރައްވާ ގިނަ ރައްޔިތުންއަންނަނީ ބުނަމުންނެވެ.
