‏މާލޭ މޭޔަރުކަމަށް ވާދަކުރާ ފަރާތްތަކުގެ މެދުގައި ބާއްވާ ބަހުސް އަންނަ މަހު 6 ގައި

ހުސްވެފައިވާ މާލެސިޓީ ކައުންސިލްގެ މޭޔަރ ކަމުގެ މަގާމަށް ވާދަކުރައްވާ ކެންޑިޑޭޓުންގެ މެދުގައި ބާއްވާ ބަހުސް އަންނަ ޖެނުއަރީ މަހުގެ 6 ވަނަ ދުވަހު ބާއްވާ ގޮތަށް ހަމަޖެހިއްޖެއެވެ.

މާލޭ މޭޔަރުކަމުގެ މަޤާމު ހުސްވީ ކުރިން އެ މަޤާމުގައި ހުންނެވެި، އަދި މިޖހާރުގެ ރައީސުލްޖުމްހޫރިއްޔާ ޑރ މުހައްމަދު މުއިއްޒު މޭޔަރުކަމުގެ މަޤާމުން އިސްތިއުފާ ދެއްވުމާގުޅިގެންނެވެ. މި މަޤާމަށް ޖުމުލަ ފަސް ކެންޑިޑޭޓުން ވާދަކުރެއެވެ. އެއީ؛

ޕީޕީއެމް/ޕީއެންސީގެ ފަރާތުން ކުރީގެ ބަންޑާރަ ނައިބު ޢާއިޝަތު ޢާޒިމާ ޝަކޫރުއާއި އިދިކޮޅު މައި ޕާޓީ، އެމްޑީޕީގެ ފަރާތުން އެމްޓީސީސީގެ ކުރީގެ ސީއީއޯ އާދަމް އާޒިމްއާއި ދަ ޑިމޮކްރެޓްސްގެ ފަރާތުން ގަލޮޅު އުތުރު ދާއިރާގެ ކައުންސިލް މެމްބަރުކަން ކުރައްވަމުން ގެންދަވާ ސައިފް ފާތިހު އާއި އަމިއްލަ ގޮތުން ކުރީގެ ސީޕީ އަދި ރައީސް ޔާމީންގެ އައު ޕާޓީ އުފެއްދެވުމަށް އިސްކޮށް މަސައްކަތް ކުރައްވާ ހުސައިން ވަހީދުގެ އިތުރުން އަމިއްލަ ގޮތުން ވާދަކުރައްވާ ޝުއައިބު އަލީއެވެ.

އެ ފަސް ކެންޑިޑޭޓުންގެ މެދުގައި ބާއްވާ ބަހުސް އަންނަ މަހު 6 ގައި ބޭއްވުމަށް ނިންމައި، ބަހުސްކުރާ ތަރުތީބު ކަނޑައެޅުމަށް ކުރިއަށް އޮތް ހަފްތާގައި ކެންޑިޑޭޓުންގެ ގުރުއަތު ނެގުން ކުރިއަށް ގެންދިއުމަށް ނިންމާފައިވާ ކަމަށް ރާއްޖޭގެ މީޑިއާތަކުން ވަނީ ކަށަވަރުކޮށްދީފައެވެ.

މާލޭ މޭޔަރު ކަމުގެ މަގާމަށް ބޭފުޅަކު އިންތިހާބުކުރުމަށް ބާއްވާ ބައި އިލެކްޝަން އޮންނާނީ އަންނަ މަހު 13 ގައެވެ.