އަންނަ ފެބުރުއަރީ މަހުން ފެށިގެން ހުޅުމާލެ ފޭސް އެކެއްގެ ހުރިހާ ސޯޝަލް ހައުސިން ފްލެޓްތަކުގެ ކުލި ކުޑަކުރުމަށް ރައީސް ޑރ. މުހައްމަދު މުއިއްޒު ނިންމަވާކަން އިޢުލާނު ކުރައްވައިފިއެވެ.
މާލޭގެ މޭޔަރުކަމަށް ޕީއެންސީގެ ޓިކެޓުގައި ވާދަކުރައްވާ އުސްތާޛާ އައިޝަތު އާޒިމާ ޝަކޫރުގެ ކެމްޕެއިނަށް ހުޅުމާލެ ފޭސް އެކެއްގައި ދިރިއުޅޭ ރައްޔިތުންނާއިއެކު މިއަދު ބައްދަލުކުރައްވައި ރައީސް ޑރ މުއިއްޒު ވިދާޅުވީ ފުރަތަމަ ފިޔަވަހީގައި ހުރި ހުރިހާ ފްލެޓަކުން މިއަންނަ މަހުން ފެށިގެން 20 ޕަސެންޓް އަގު ކުޑަވެގެން ދާނޭކަމަށެވެ.
ރައީސް ޑރ. މުހައްމަދު މުއިއްޒު ވިދާޅުވީ ހުޅުމާލެ ތަރައްޤީ ކުރީ މާލޭގެ ބޯހިޔާވަހިކަމަށް ހައްލެއް ހޯދައިދިނުމަށް ކަމަށާއި ނަމަވެސް އަދިވެސް ފޭސް އެކެއްގައި ދިރުއުޅުއްވާ ފަރާތްތަކުން މިހާރުވެސް ބޮޑު އަގެއް ދައްކަވަން ޖެހޭކަމަށެވެ. އެގޮތުން އެތަންތަނަށް 4000 އާއި 7000 ދެމެދުގެ އަގެއް މެއިންޓެނެސް ފީއާއި އެކީ ދައްކަމުން އަންނަ ކަމަށާއި އެކަން ނިމުމަކަށް ގެންނާނޭ ކަމަށް ރައީސް ވިދާޅުވިއެވެ.
ރައީސް ވިދާޅުވީ މި ލުއި ރައްޔިތުންނަށް މި ދެނީ އިޤްތިޞާދުގެ ހާލަތު ހުރި ގޮތުން ކުދި އަދި މެދުފަންތީގެ ވިޔަފާރިތައް ވަރަށް ބޮޑަށް ހީނަރުވެފައި އޮތުމުން ލިބޭ އާމްދަނީ ކުޑަވުމުން ދައްކަން ޖެހޭ އެއްޗެއް މި ދެއްކެނީ ވަރަށް ހާލުގައިކަމަށެވެ. އަދި މިގޮތަށް ކުލި ތައް ކުޑަކުރަން މި ނިންމީ ސަރުކާރުން މިކަމުގައި އެހީތެރިކަމެއް ދޭން ބޭނުންވާތީ ކަމަށް ރައީސް ވިދާޅުވިއެވެ.
މިއަދުގެ މިރަސްމިއްޔާތުގައި ރައީސް ޑރ. މުހައްމަދު މުއިއްޒުވަނީ މި ސަރުކާރުގެ ސިޔާސަތުތައް ތަންފީޒުކޮށް ސަރުކާރުން ހިންގާ ތަރައްޤީގެ މަޝްރޫޢުތައް ކުރިއަށް ގެންދިއުމަށް ސަރުކާރަށް އެހީތެރިވުމުގެ ގޮތުން މާލޭ މޭޔަރުކަމަށް ސަރުކާރުގެ ކެންޑިޑޭޓް އުސްތާޛާ އާޒިމާ ޝަކޫރު ހޮއްވަވައި ދެއްވުމަށް ވަނީ އެދި ވަޑައިގެންފައެވެ.
