ޣައްޒާގެ އެންމެ ދެކުނުން އޮންނަ ރަފަޙުގައި ޙާލުގައި ޖެހިފައިވާ ފަލަސްޠީނުގެ ރެފިއުޖީން ދިރިއުޅޭ ފޭލިގެތަކަށް ޔަހޫދީ ފައުޖުން ބޮން އަޅައި 11 މީހުން ޝަހީދު ކޮށްލައިފިއެވެ.
ހޫދީން ޙަމަލާ ދީފައި ވަނީ އަލްހިލާލް އަލްއިމާރާތީ މާބަނޑު އަންހެނުންގެ ހަސްފަތާލު ކައިރީގައި ފޭލިގެތަކެއް ޖަހާފައިވާ ސަރަޙައްދަކަށެވެ. އެއީ, ރަފަޙުގެ ތަލް އަލްސުލްޠާނީގައި ހުންނަ ހަސްފަތާލެކެވެ.
ޣައްޒާގެ ޞިއްޙީ ވުޒާރާއިން ބުނީ, އެ ހަސްފާތާލު ކައިރިއަށް ބޮން އެޅުމުން 50 އަށްވުރެ ގިނަ މީހުން ޒަޚަމު ވެފައިވާކަމަށާއި ފޭލިގެތަކަށް ދިން ޙަމަލާގައި ފަލަސްޠީނުގެ އެއް ޢާއިލާއަކަށް ނިސްބަތްވާ ހުރިހާ މެންބަރުން ޝަހީދުވެފައިވާކަމަށެވެ.
މާބަނޑު މީހުންގެ ހަސްފަތާލަށް ޔަހޫދީ ފައުޖުން ދިން ރަޙުމު ކުޑަ ޙަމަލާގައި ޝަހީދުވި މީހުންގެ ތެރޭގައި އެ ހަސްފަތާލުގެ ކުއްލި ފަރުވާގެ އިދާރާގައި އިސްކޮށް ޙަރަކާތްތެރިވާ ޢަބްދުލްފައްތާޙް އަބޫ ބަރާޢީ ހިމެނެއެވެ. އެ ޙަމަލާތަކުގައި ގިނަ ޢަދަދެއްގެ ކުޑަކުދިން ޝަހީދުވެފައިވާ ކަމުގައި ވެސް ޣައްޒާގެ ޞިއްޙީ ވުޒާރާއިން ބުނެއެވެ.
ރަފަޙްގެ އިތުރުން ޣައްޒާގެ މެދުގައި އޮންނަ ދީރް އަލްބަލަޙަށް ވެސް ޔަހޫދީ ފައުޖުން ވަނީ ބޮން އަޅާފައެވެ. ޙަމަލާތައް އަމާޒު ކޮށްފައި ވަނީ ފަލަސްޠީނުގެ ޢާއިލާތަކެއް ދިރިއުޅެމުން ދިޔަ ދެ ޢިމާރާތަކަށެވެ. އެ ޙަމަލާތަކުގައި އެ ދެ ޢިމާރާތުގައި ދިރިއުޅޭ ޢާއިލާތަކުގެ މެންބަރުންގެ ތެރެއިން 15 މީހުން ޝަހީދު ކޮށްލާފައިވެއެވެ.
ނިިމިގެން ދިޔަ އަހަރުގެ އޮކްޓޫބަރު 7ން ފެށިގެން ޔަހޫދީ ފައުޖުން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 30,410އަށް އަރާފައެވެ. އޭގެ ތެރެއިން 25,000އަކީ އަންހެނުންނާއި ކުޑަކުދިންނެވެ. އަދި, ޒަޚަމު ކޮށްލާފައިވާ މީހުންގެ ޢަދަދު ވަނީ 71,100 އަށް އަރާފައެވެ.
