ފަލަސްތީން ގެ ޣައްޒާގައި ޔަހޫދީން ހިންގަމުންދާ ޤަތުލުއާންމުތަކުގެ ސަބަބުން ކާބޯތަކެތި ނުލިބި، ބަނޑުހައިހޫނު ކަމުގެ ސަބަބުން މިހާތަނަށް 27 މީހަކު ޝަހީދުވެފައިވާކަމަށް ޣައްޒާގެ ސިއްޚީ ވުޒާރާއިން ހާމަކޮށްފިއެވެ.
ހައިހޫނު ކަމުގެ ވޭނުގައި ޝަހީދުވަމުން އަންނަ ކުޑަކުދިންގެ ނިސްބަތް ދުވަހެއް ދުވަހަކަށް އިތުރުވަމުން އަންނައިރު، އުތުރު ޣައްޒާގައި އުމުރުން ދެ އަހަރުން ދަށުގެ ކުދިންގެ ތެރެއިން %15.6 ކުދިންނަށް މިހާރު ދަނީ ސީރިއަސް މަލްނިއުޓްރިޝަން ތަހައްމަލު ކުރަމުންނެވެ. އޭގެ ނަތީޖާއެއްގެ ގޮތުން މިހާރުވެސް ގިނަ އަދަދެއްހެ ކުޑަކުދިން ދުނިޔެ ދޫކޮށްފައިވާ ކަމަށް ރިޕޯޓުކޮށްފައިވެއެވެ.
ފާއިތުވި ފަސް މަސް ދުވަހުގެ ތެރޭގައި ޣައްޒާގައި ބަނޑުހައިހޫނުކަން ތަހަންމަލް ކުރަމުން އަންނަ މީހުންގެ އަދަދު އިންތިހާއަށް އިތުރުވެފައިވާއިރު، މިއީ ދުވަހަކުވެސް ޣައްޒާގެ ރައްޔިތުންނަށް މީގެ ކުރިން ތަހަންމަލުކުރަން ނުޖެހޭ ހާލަތެއްކަމަށް ސިއްޚީ ވުޒާރާއިން ބުނެއެވެ.
ހަމައެއާއިއެކު، އުތުރު ޣައްޒާގައި ހަރަކާތްތެރި ވަމުން އަންނަ ގާތްގަނޑަކަށް 2000 ސިއްހީ އެހީތެރިން ވެސް އަންނަނީ ބަނޑުހައިހޫނު ކަމުގެ ވޭން ތަހައްމަލު ކުރަމުންނެވެ. މިގޮތުން، މިއަހަރުގެ ބަރަކާތްތެރި ރޯދަ މަހުވެސް ސިއްހީ އެހީތެރިން ރޯދަ އަށް ތިބެނީ ހާރުގެ އިތުރުން، ރޯދަވީއްލާ ގަޑީގައި ވެސް އެއްވެސް އެއްޗެއް ނުކައި ކަމަށް ޣައްޒާގެ ސިއްހީ ވުޒާރާއިން ވަނީ ބުނެފައެވެ.
މާތްވެގެންވާ ރަމަޟާން މަސް މިއަހަރު ޣައްޒާގެ ރައްޔިތުންނާއި ބައްދަލުކުރިއިރު، ޣައްޒާގެ 85 އިންސައްތަ އަށް ވުރެ ގިނަ މީހުން ވަނީ ގެދޮރުހަލާކުވެ، މަގުމަތި ވެފައިއެވެ. އަދި ފެނާއި ކާބޯތަކެއްޗާއި ބޭސްފަރުވާގެ ދަތިކަން އިންތިހާއަށް ބޮޑުވެފައިވާއިރު، ޣައްޒާގެ 60 އިންސައްތަ އިމާރާތްތައް ވަނީ ބިމާއި ހަމަކޮށްލާފައެވެ. އިސްރާއީލުން ދަނީ ޣައްޒާގެ ރައްޔިތުންނަށް ބޭނުންވާ އެހީގެ ތަކެތި އެތެރެކުރުމަށް ހުރަސް އަޅަމުންނެވެ.
ހައްދުފަހަނައަޅާފައިވާ ޔަހޫދީން މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން ކެނޑިނޭޅި ޣައްޒާއަށް ދެމުންގެންދާ ހަމަލާތަކުގެ ސަބަބުން މިހާތަނަށް 31,045 މީހަކު ޝަހީދުވެފައިވާއިރު، 72,654 މީހަކު ވަނީ ޒަހަމްވެފައެވެ.
