ޕީޕީއެމް ޕިއެންސީގެ ލީޑާރޝިޕުގައި އިހުލާސްތެރިއަކު ނެތްކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ. 
ޕީއެންއެފްގެ ފަރާތުން މަޖިލީހަށް ކުރިމަތިލާ ކެންޑިޑޭޓުންގެ ސިޔާސަތުތައް ހާމަކުރުމަށް ދަ ފްރޮންޓް އޮފީހުގައި ބާއްވަމުން ގެންދާ ސިލްސިލާ ޖަލްސާތަކުގެ ތެރެއިން މިދިޔަ ހަފްތާގެ އާދިއްތަ ދުވަހުގެ ރޭ ބޭއްވި ޖަލްސާގައި ވާހަކަދައްކަވަމުން ރައީސް ޔާމީން ވިދާޅުވީ ޕީޕީއެމް ޕިއެންސީގެ ލީޑާރޝިޕުގައި އިހުލާސްތެރިއަކު ނެތްކަމަށެވެ.
އެމަނިކުފާނު ވިދާޅުވީ އެ ބޭފުޅުން ބޭނުންވީ އެމަނިކުފާނު ޖަލުގައި ބާއްވައިގެން އިންތިހާބު ބާއްވަން ކަމަށާއި އެގޮތުން އެމަނިކުފާނު އިންތިހާބު ބޮއިކޮޓުކޮށް ދެ ޕާޓިއާ މެމްބަރުން މަގުމަތިކޮށްލަން އުޅުނު ކަމަށްބުނެ އެމަނިކުފާނާ މެދު ނަފްރަތު އުފެއްދުމަށް ޕީޕީއެމް ޕިއެންސީގެ ވެރިން މިއަދު މަސައްކަތްކުރަމުންދާކަމަށެވެ.
ޔާމީން ވިދާޅުވީ އިންތިޚާބު ބޮއިކޮޓުކުރަން ހިޔާލު އެމަނިކުފާނު ފޮނުއްވީ އޭގެ ކުރިން ލީޑަރޝިޕުން އެމަނިކުފާނަށް ބައިވެރިނުވެވޭ އިންތިހާބެއް ރާއްޖޭގައި ނުބޭއްވޭނެ ކަމަށް ބުނެ އެކި އެކި ޕްލެޓު ފޮމުތަކުގައި އެ ފަދަ އިންތިހާބެއް ބާއްވާނަމަ ބޮއިކޮޓުކުރާނެކަމަށް އެ ބޭފުޅުން ވިދާޅުވަމުން ގެންދެވުމުން އެ ބޭފުޅުންގެ އެ ހިތްވަރު ހުރިތޯ ޔަގީންކުރުމަށް ކަމަށެވެ. 
އެހެންނަމަވެސް އެ ބޭފުޅުން އެ ހިތްވަރު ނުހުންނާނެކަން މަގުމަތީ ހަރަކާތްތަކުންވެސް ފެނިގެންދިޔަ ކަމަށާ އެގޮތުން އެމަނިކުފާނު މިނިވަންކުރަން ގޮވާލާ ކުރިއަށް ގެންދިޔަ މުޒާހަރާތައް ހުއްޓުވަން ސީދާ ލިޑާރޝިޕުގެ ބައެއް ބޭފުޅުން އުޅުއްވިކަމަށް ރައީސް ޔާމީން ވިދާޅުވިއެވެ.
ރައީސް އަބްދުﷲ ޔާމީނަށް ނުހައްގުން އަނިޔާކޮށް ޖަލުގައި ހުކުމެއް ތަންފީޒުކުރަން މަޖްބޫރުކުރުވުމުން އެމަނިކުފާނަށް ވަފާތެރި ސަޕޯޓަރުން ކުރަން ފެށި މުޒާހަރާތައް ހުއްޓުވަން ވެސް އޭރު ޕީޕީއެމް އެންސީގެ ލީޑަރޝިޕުން މަސައްކަތްކުރި ކަމަށް ރައީސް އަބްދުﷲ ޔާމީން ވިދާޅުވިއެވެ.
