އިރާނުން އިސްރާއީލަށް އަމާޒުކޮށް ފޮނުވާލި 300 ހަމަލާގެ ތެރެއިން ކާމިޔާބުވީ އެންމެ ޕަސެއްޓެއްކަމަށާއި، އަނެއް 99 ޕަސެންޓް ނާކާމިޔާބުވެފައިވާ ކަމަށް އިސްރާއީލުގެ އަސްކަރިއްޔާގެ ތަރުޖަމާން ޑެނިއަލް ހަގަރީ ބުނެފިއެވެ.
އީރާނުން އިސްރާއީލުގެ ކިބައިން ބަދަލުހިފުމަށް ރޭ ދިން ހަމަލާތަކަށް ފަހު ނެރުނު ބަޔާނުގައި ޑެނިއަލް ހަގަރީ ބުނީ އިރާނުން އިސްރާއީލަށް ރޭ ފޮނުވާލި 300 ވަރަކަށް ޕްރޮޖެކްޓައިލްގެ ތެރެއިން %99 ޕްރޮޖެކްޓައިލް ވަނީ ވައިގެ ދިފާޢީ ބާރުތަކުން ހުއްޓުވާފައިކަމަށެވެ.
އޭނާ ވިދާޅުވާ ގޮތުގައި އީރާނުން އިސްރާއީލަށް 170 ޑްރޯން ފޮނުވާލިއިރު، އިސްރާއީލުގެ ވައިގެ ސަރަހައްދަށް އެއްވެސް ޑްރޯނެއް ނުވަދެ އެވެ. އެ އެންމެން ވެސް ވައްޓާލީ އެގައުމުގެ ބޯޑަރުން ބޭރުގައި އިސްރާއީލާއި އެގައުމުގެ އެކުވެރި ގައުމުތަކުންނެވެ.
އިތުރު 30 ކްރޫޒް މިސައިލް ފޮނުވާލިއިރު، އެންމެ މިސައިލެއްވެސް އިސްރާއީލުގެ ވައިގެ ސަރަހައްދަށް ނުވަދެ ކަމަށް އޭނާ ވިދާޅުވެއެވެ. އޭގެ ތެރެއިން 25 މިސައިލް އިސްރާއީލުގެ ވައިގެ ސިފައިން ވައްޓާލާފައިވާ ކަމަށް ހަގަރީ ބުނެފައިވެ އެވެ.
މީގެ އިތުރުން ހަގަރީ ބުނި ގޮތުގައި އީރާނުން ވަނީ އިސްރާއީލަށް 120 ބެލިސްޓިކް މިސައިލް ފޮނުވާލާފައެވެ. މިސައިލްތަކުގެ ތެރެއިން ބައެއް މިސައިލްތައް އިސްރާއީލުގެ ދިފާއީ ސަރަހައްދުތައް ފަހަނައަޅައި ގޮސް، އިސްރާއީލުގެ ދެކުނުގައި އޮންނަ ނެވަޓިމް އެއާބޭސްއަށް އަމާޒުވި ކަމަށް އޭނާ ބުނެފައިވެއެވެ. އަދި އެ ހަމަލާތަކުގެ ސަބަބުން ނެވާޓިމްގެ އިންފްރާސްޓްރަކްޗަރަށް ކުދިކުދި ގެއްލުންތަކެއް ލިބުނު ނަމަވެސް އެއާބޭސް އާދައިގެ މަތިން މިހާރުވެސް ހިނގަމުން އެބަދާކަމަށް އޭނާ ބުނެފައިވެއެވެ.
