ކަންކަމުގެ ނަތީޖާ ނެރެދޭން އައި ސަރުކާރަށް އެއްބާރުލުން ދިނުމަށް ސަރުކާރުގެ 93 ކެންޑިޑޭޓުން ހޮވައިދިނުމަށް އެދޭކަމަށާއި އޭރުން ވަރަށް ބާރު ސްޕީޑުގައި ރައްޔިތުން ބޭނުންވާ ފެންވަރަށް ހުރިހާ ކަމެއް ކޮށްދޭނެކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މާލޭގައި ދިރިއުޅުއްވާ އައްޑޫ ސިޓީގެ ރައްޔިތުންނާ ބައްދަލުކުރައްވައި ދެއްކި ވާހަކަފުޅުގައި ރައީސް ވިދާޅުވީ, ސަރުކާރު ނޫން ކެންޑިޑޭޓުން ހޮވައިގެން މުހިންމު ކަމަކަށް ސަރުކާރުން ވޯޓަށް އަހާ ވަގުތު ޕާޓީއިން އެގޮތް ބޭނުން ނުވެގެން ވޯޓު ދޭން ހުރަސް އަޅާނެ ކަމަށެވެ.
އަދި ނަތީޖާ ނެރެން ބޭނުން ނަމަ ބޭނުންވަނީ ޕާޓީގެ ވިޕްލައިނަކާ ގުޅިގެން އެކަމަށް ހުރަސް ނާޅާނެ ކެންޑިޑޭޓުން ހޮވުމަށް ކަމަށް ރައީސް އެދިވަޑައިގެންނެވިއެވެ.
ވޭތުވެދިޔަ މާޒީގައި އައްޑޫގައި 20 އަހަރު 15 އަހަރު 10 އަހަރު އެކި ބޭފުޅުންނަށް ފުރުސަތު ދީގެން މަޖިލީހުގައި ތަމްސީލް ކުރިނަމަވެސް ނަތީޖާ ނުނުކުންނަ ކަމަށާއި އެކަމާ އައްޑޫ ރައްޔިތުން ތިބީ މާޔޫސް ވެފައި ކަމަށް ރައީސް ވިދާޅުވިއެވެ.
ރައީސް ވިދާޅުވީ ސަރުކާރުން އައްޑޫއަށް ވާދަކުރައްވާ ކެންޑިޑޭޓުންނަކީ އިހުލާސްތެރިކަމާއެކު ނަތީޖާ ނެރެދޭނެ ބޭފުޅުން ކަމަށެވެ. އަދި, މި ވެރިކަމުގައި މާލެއާ އެއް ފެންވަރަށް އައްޑޫ ތަރައްގީކުރައްވާނެ ކަމަށް ވިދާޅުވާ ވާހަކަ ރައީސް ތަކުރާރު ކުރެއްވިއެވެ.
”އަޅުގަނޑު ބޭނުން މާލެއާ އެއް ފެންވަރަށް އައްޑޫ ތަރައްގީކުރައްވަން. އެކަން ކޮށްދެއްވާނަން އިރާދަކުރެއްވިއްޔާ މި ފަސް އަހަރު ތެރޭގައި,“ ރައީސް ވިދާޅުވިއެވެ.
ރައީސް ވިދާޅުވީ, އެކަން ކުރުމަށް މިހާރު ވެސް ގިނަ ކަންކަން ފެށިފައިވާ ކަމަށާއި ނަމަވެސް މަޖިލީހުގެ އެއްބާރުލުން ނުލިބުމުން ކަންކަން ކުރަން ދަތިތައް އެބަހުރި ކަމަށެވެ.
