ކޮންމެ ޕާޓިއަކަށް ނިސްބަތްވިޔަސް ކޮންމެ ރައްޔިތަކީ ވެސް މުހިންމު މީހެއް ކަމަށާއި އެއިން ކޮންމެ މީހަކަށް ވެސް އަޅުގަނޑުގެ ހިތުގައި އޮތީ ލޯތްބާއި ގަދަރުކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މަޖިލިސް އިންތިޚާބުގައި ސަރުކާރަށް ލިބުނު ކާމިޔާބީ ފާހަގަކުރުމަށް ބޭއްވި ހާއްސަ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ އެމަނިކުފާނުގެ ކުރިފުޅުމަތީގައި ކޮންމެ ޕާޓީއަކަށް ނިސްބަތްވިއަސް ކޮންމެ ރައްޔިތަކީ މުހިންމު ރައްޔިތެއް ކަމަށާއި، އޭގެން ކޮންމެ ރައްޔިތަކަށް ވެސް އެމަނިކުފާނުގެ ހިތުގައި އޮތީ ލޯތްބާއި ގަދަރުކަމަށެވެ.
ދިވެހިރާއްޖެއަކީ ދިވެހީންގެރާއްޖެކަން ފާހަގަކުރައްވަމުން ރައީސުލްޖުމްހޫރިއްޔާ ވަނީ ސިޔާސީ ލީޑަރުންވެސް ސިޔާސީ ވާދަވެރިކަން ދޫކޮށްލުމަށްފަހު، ގައުމުގެ ތަރައްޤީއަށް ކުރާ މަސައްކަތުގައި ބައިވެރިވުމަށް ދައުވަތު ދެއްވާފައެވެ. އަދި އެމަނިކުފާނަކީ ސިޔާސީ ކުލައަށް ބަލައިގެން އެއްވެސް ރައްޔިތަކާމެދު ތަފާތުކުރުން ގެންގުޅުއްވާނެ ބޭފުޅެއް ނޫންކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
”ހުރިހާ ބޭފުޅުން އެކުވެރިކަމާއެކީގައި އަތުކުރި އޮޅާލައިގެން ހިނގާށޭ ކުރިއަށްދާން. އިރާދަކުރެއްވިއްޔާ އަޅުގަނޑުމެން އެއްމެންނަށް އޭގެން ލިބޭނީ އުފާވެރިކަން. އަޅުގަނޑު ކުރިމަތީގައި ކޮންމެ ރައްޔިތަކު ހަމަހަމަ. ކޮންމެ ޕާޓިއަކަށް ނިސްބަތްވިޔަސް އެ ރައްޔިތަކީ މުހިންމު ރައްޔިތެއް. އެއިން ކޮންމެ ބޭފުޅަކަށް އަޅުގަނޑުގެ ހިތުގައި އޮތީ ލޯތްބާއި ގަދަރު،“ ރައީސް ވިދާޅުވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ މަޖިލިސް އިންތިހާބުގައި ސަރުކާރަށް ލިބުނު ކާމިޔާބީއާއެކު ދެން ފެނިގެންދާނީ އަންނަން އޮތް ޖީލުތަކަށް އުފާފާގަތިކަން ގެނުވައިދިނުމުގެ މަސައްކަތް ބާރަށް ކުރިއަށްދާ މަންޒަރުކަމަށެވެ. އަދި ދިވެހިންނަކީ ކަންކަމުގައި އަމިއްލައަށް ބަސް ބުނެ، މިނިވަންކަމަށް ލޯބިކުރާ ބައެއްކަން ބައިނަލްއަގުވާމީ މުޖުތަމައަށް މިހާރު ސާފުވާނެކަމަށްވެސް އެމަނިކުފާނު ވިދާޅުވިއެވެ.
