ހައްދުންމަތީގެ ސިޔާސީ ތާރީހު ރައީސް ޑރ. މުހައްމަދު މުއިއްޒު ބަދަލުކޮށްދެއްވާފައިވާ ކަމަށާއި ދިވެހި ދައުލަތް ހިނގަމުން އަންނަތާ 4،000 އަހަރު ވީއިރު މީގެކުރިން ރާއްޖޭގެ އެންމެ ފަތީ ފަނޑީގައި ހައްދުންމަތީގެ ބޭފުޅަކު ދުވަހަކު ވެސް ހިމެނިފައި ނުވާ ކަމަށް ފޮނަދޫ ދާއިރާގެ އިންތިޚާބީ މެމްބަރު އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ މިރޭ ވިދާޅުވެއްޖެ އެވެ.
މަޖިލިސް އިންތިޚާބުގައި ޕީއެންސީއަށް ލ. އަތޮޅުން ލިބުނު ކާމިޔާބީ ފާހަގަކުރުމަށް ބޭއްވި ޖަލްސާގައި ވާހަކަދައްކަމުން އަދުރޭ ވިދާޅުވީ ހައްދުންމަތީގެ ސިޔާސީ ތާރީހު ރައީސް ޑރ. މުހައްމަދު މުއިއްޒު ބަދަލުކޮށްދެއްވާފައިވާ ކަމަށާއި ދިވެހި ދައުލަތް ހިނގަމުން އަންނަތާ 4،000 އަހަރު ވީއިރު މީގެކުރިން ރާއްޖޭގެ އެންމެ ފަތީ ފަނޑީގައި ހައްދުންމަތީގެ ބޭފުޅަކު ދުވަހަކު ވެސް ހިމެނިފައި ނުވާ ކަމަށެވެ.
އަބްދުއްރަހީމް ވިދާޅުވީ ރައީސް ޑރ. މުޙައްމަދު މުއިއްޒު ވެރިކަމަށް ވަޑައިގެން އެ މަނިކުފާނު އެކުލަވައިލެއްވި ފުރަތަމަ ކެބިނެޓުގައި، އެ ކެބިނެޓުގެ އެންމެ ބާރުގަދަ ދެ ވަޒީރުންގެ ގޮތުގައި ތިއްބެވީ ފޮނަދޫގެ ދެ ބޭފުޅުން. ފިނޭންސް މިނިސްޓަރު ޑރ. މުޙައްމަދު ޝަފީގުއާއި ޓޫރިޒަމް މިނިސްޓަރު އިބްރާހިމް ފައިސަލްކަމަށެވެ. އަދި އޭގެ އިތުރުން ޚުދު އެބޭފުޅާ ވެސް އޭގެ ކޮންމެވެސް ހިސާބެއްގައި އެބަ ލައްވައިލާކަމަށް އަބްދުއްރަހީމް ވިދާޅުވި އެވެ.
”ރައީސް ޑރ. މުޙައްމަދު މުއިއްޒު ވެރިކަމަށް ވަޑައިގެން އެ މަނިކުފާނު އެކުލަވައިލެއްވި ފުރަތަމަ ކެބިނެޓުގައި، އެ ކެބިނެޓުގެ އެންމެ ބާރުގަދަ ދެ ވަޒީރުންގެ ގޮތުގައި ތިއްބެވީ ފޮނަދޫގެ ދެ ބޭފުޅުން. ފިނޭންސް މިނިސްޓަރު ޑރ. މުޙައްމަދު ޝަފީގު، ޓޫރިޒަމް މިނިސްޓަރު އިބްރާހިމް ފައިސަލް. އޭގެ އިތުރުން އަޅުގަނޑު ވެސް އޭގެ ކޮންމެވެސް ހިސާބެއްގައި އެބަ ލައްވައިލާ،“ އަބްދުއްރަހީމް ވިދާޅުވި އެވެ.
އަދުރޭ ވިދާޅުވީ މި ސަރުކާރު ދަމަހައްޓައި ނެގެހެއްޓުމަށް ފޮނަދޫ އަށް ވުރެ ވަކިން ބޮޑަށް މަސައްކަތް ކުރަންޖެހޭ އެހެން އެއްވެސް ރަށެއް ނެތް ކަމަށާއި މިވަގުތު ޕާޓީ ފިކުރަށް ވުރެ އިސްކުރަންވީ ފޮނަދޫގެ ފިކުރު ކަމަށެވެ. އަދި ފޮނަދޫ އަށް މިއަދު ރަނުގެ ފުރުސަތެއް ލިބިފައިވާއިރު މި ފުރުސަތުގެ ބޭނުން ފޮނަދޫގެ ހުރިހާ ރައްޔިތުން ހިފުމަށް އަދުރޭ ވަނީ ގޮވާލައްވާފަ އެވެ.
މީގެއިތުރުން ހައްދުންމަތި އަދި ފޮނަދޫގެ ތަރައްގީ އަށް 24 ގަޑިއިރު ވެސް މަސައްކަތް ކުރަން ތައްޔާރަށް ހުންނެވި ކަމަށާއި ފޮނަދޫ ރައްޔިތުން ދޫކޮށްލާފައި އެހެން ދިމާލަކަށް ނުދާނެ ކަމަށްވެސް އަބްދުއްރަހީމް ވިދާޅުވި އެވެ.
