ޤާނޫނާއި ޤާވާޢިދާއި ޚިލާފަށް ދިވެހިރާއްޖޭގެ ޚާއްޞަ އިޤްތިޞާދީ ސަރަޙައްދުގައި ހަރަކާތްތެރިވަމުންދިޔަ ބޭރުގެ ތިން ބޯޓެއް، ދިވެހިރާއްޖޭގެ ކޯސްޓްގާޑުން އަތުލައިގެންފިއެވެ.
މި ބޯޓްތައް އަތުލާފައިވަނީ ރާއްޖޭގެ ކަނޑުގެ ސަރަހައްދު ރައްކާތެރިކުރުމަށް ހިންގާ ޕެޓްރޯލް މަސައްކަތުގެ ތެރެއިންނެވެ.
އެމްއެންޑީއެފުން ހާމަކުރެއްވިގޮތުގައި ރާއްޖޭގެ ކަނޑުގެ ސަރަހައްދުގައި ޤާނޫނާ ޚިލާފަށް ހަރަކާތްތެރިވަމުން ދިޔަ ބޭރުގެ ބޯޓެއް ފާހަގަކުރެވުމާއި ގުޅިގެން، އެއަރކޯރއިން ޑްރޯން ބޭނުންކޮށްގެން ހިންގި ސަވެއިލަންސެއްގައި، ކޯސްޓްގާޑު ސްޕެޝަލް ބޯޓް ސްކޮޑްރަން ބޭނުންކޮށްގެން އެ ބޯޓްވަނީ އިންޓަސެޕްޓްކޮށް، އެމްއެންޑީއެފްގެ ބާރުގެ ދަށަށް ގެންގޮސްފައެވެ. މި ބޯޓު އަތުލައިގަތީ ރާއްޖޭގެ ޚާއްޞަ އިޤްތިޞާދީ ސަރަހައްދުގައި ޤަވާޢިދާ ޚިލާފަށް ހަރަކާތްތެރިވަމުން ދަނިކޮށް ކމަށްވެސް އެމްއެންޑީއެފުން ހާމަކުރައްވައެވެ.
މީގެ އިތުރުން ސްރީލަންކާއަށް ނިސްބަތްވާ ދެ މަސްބޯޓް ވެސް އެމްއެންޑީއެފް ކޯސްޓްގާޑުން ވަނީ އަތުލައިގެންފައެވެ. އެމްއެންޑީއެފުން ހާމަކުރެއްވިގޮތުގައި މި ދެ ބޯޓް އަތުލައިގަތީ ނޮވެންބަރު 5 ވަނަ ދުވަހުގެ ރޭގަނޑު، ވ.ފޮއްތެޔޮމުލީގެ އިރުން 137 ނޯޓިކަލް މޭލު ބޭރުގައި ހަރަކާތްތެރިވަމުން ދަނިކޮށެވެ. މިއީ އެމްއެންޑީއެފް ކޯސްޓްގާޑުން ދިވެހިރާއްޖޭގެ ޚާއްޞަ އިޤްތިޞާދީ ސަރަޙައްދު ޕެޓްރޯލްކުރުމުގެ މަސައްކަތުގެ ތެރެއިން ހިންގި އޮޕަރޭޝަނެކެވެ.
އެމްއެންޑީއެފް ކޯސްޓްގާޑުން މިހާރު ގެންދަނީ ސްރީލަންކާގެ ދެ މަސްބޯޓް މާލެ ގެނައުމުގެ މަސައްކަތް ކުރައްވަމުންނެވެ.
އެންއެންޑީއެފުން އަބަދުވެސް ގެންދަވަނީ ނުހަނު ހޭލުންތެރިކަމާއި އެކު ރާއްޖޭގެ އިޤްތިޞާދީ ސަރަހައްދު ބަލަހައްޓަވަމުންނެވެ.
