މަސްތުވާ ތަކެއްޗާއެކު މިސްކިތެއްގެ ކައިރިން މީހަކު ހައްޔަރުކޮށްފިއެވެ.
ފުލުހުންގެ މީޑިއާ އޮފިޝަލަކު ވިދާޅުވީ މަސްތުވާތަކެތި ކަމަށް ޝައްކު ކުރެވޭ އެއްޗެއް އަޅާފައި ހުރި ސެލޯފޭން ކޮޅުތަކަކާ އެކު މާލޭ ވިޔަފާރިވެރިންގެ މިސްކިތް ކައިރިން ރޭގައި ފުލުހުންގެ ބެލުމުގެ ދަށަށް ގެންގޮސްފައިވަނީ އުމުރުން 24 އަހަރުގެ ދިވެހި ފިރިހެނަކު ކަމަށެވެ. އަދި މިމައްސލަ އިތުރަށް ތަހުޤީގު ކުރަމުން އަންނަ ކަމަށް ފުލުހުން ވިދާޅުވިއެވެ.
ފަހަކަށް އައިސް މިސްކިތުގެ ބޭނުން ނަހަމަ ގޮތުގައި ހިފާ، މިސްކިތްތަކުގައި ނިދާ ކައިބޮއި ހަދާކަމަށް ފުލުހުން ވިދާޅުވެފައިވަނިކޮށް ރޭގެ ވަގުތެއްގައި މަސްތުވާ ތަކެއްޗާއެކު މިވަނީ މީހަކު ހައްޔަރުކުރެވިފައެވެ.
އެގޮތުން މިސްކިތްތަކުގައި މަސްތުވެ، އެއްޗެހި ދޮވެ އަދި ނިދުން ފަދަ މިސްކިތް ބޭނުން ކުރުން އެކަށޭނަ ނޫން އެހެން ކަންކަމުގައި މިސްކިތް ބޭނުން ކުރާ ކަމުގެ ޝަކުވާ ތަކުރާރުކޮށް ފުލުހުންނަށް ލިބެމުންދާ ކަމަށް ފުލުހުން ވިދާޅުވިއެވެ.
