ބޭންކް އޮފް މޯލްޑިވްސް (ބީއެމްއެލް) ގެ ޑެބިޓް ކާޑު ބޭނުންކޮށްގެން ރާއްޖެއިން ބޭރުގައި ކުރާ ބޭސްފަރުވާ، ޓިކެޓު އަދި ހޮޓެލްތަކުގެ މުއާމަލާތްތަކަށް ދައްކާ ފައިސާގެ ލިމިޓް 3،000 ޑޮލަރަށް ބޮޑުކޮށްފިއެވެ.
މި ބަދަލުތައް މާދަމާ އިން ފެށިގެން ތަންފީޒުވާނެ ކަމަށް ބީއެމްއެލް އިން ބުނެފައިވާއިރު، ރާއްޖެއިން ބޭރުގެ ޕީއޯއެސް ޓާމިނަލްތަކުން ފައިސާ ދެއްކޭ އަދަދު ވެސް މިހާރުގެ 500 ޑޮލަރުން 1،000 ޑޮލަރަށް ވަނީ އިތުރުކޮށްފައެވެ. މިކަން އިއުލާން ކުރެއްވީ މިދިޔަ ސެޕްޓެމްބަރު މަހު މ. މުލީ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި ރައީސް ޑރ. މުހައްމަދު މުއިއްޒުއެވެ.
މި ފިޔަވަޅުތައް އައީ ބީއެމްއެލްގެ 43 ވަނަ އަހަރީ ދުވަހާ ދިމާކޮށް، އަދި ނޮވެމްބަރު 11 ވާ ޖުމްހޫރީ ދުވަހުގެ ފަހުންނެވެ. ބީއެމްއެލް އިން ވިދާޅުވެފައިވަނީ ކަސްޓަމަރުންނަށް އިތުރު އެއްވެސް އެޕްލިކޭޝަނަކާ ނުލައި މި އާ ލިމިޓްތައް ވަގުތުން ބޭނުންކުރަން ފެށޭނެ ކަމަށެވެ.
ރައީސް ޑރ. މުއިއްޒު ވިދާޅުވި ގޮތުގައި މިކަމުގެ ސަބަބުން ރައްޔިތުންނަށް އަގުބޮޑުކޮށް ބްލެކް މާކެޓުން ޑޮލަރު ގަންނަން ޖެހުމުން ސަލާމަތްވެ، ހެޔޮ ނަތީޖާއެއް ލިބޭނެއެވެ. ބޭސްފަރުވާއަށް ހޮސްޕިޓަލަށް ދައްކަންޖެހޭ ފައިސާ ބޭންކުގައި އެދުމުން ޑެބިޓް ކާޑުން ހޮސްޕިޓަލަށް ފައިސާ ދެއްކޭނެ ގޮތް ވެސް ހަމަޖެހިގެންދާނެއެވެ.
މި ބަދަލުތަކުގެ އިތުރުން، އަންނަ އަހަރުގެ ޖެނުއަރީ 1 އިން ފެށިގެން ޗައިނާގެ ފައިސާއަށް ޚާއްސަކޮށް ދުނިޔޭގެ 180 އަށްވުރެ ގިނަ ގައުމުތަކުގައި ބޭނުންކުރާ ޔޫނިއަން ޕޭގެ ޑެބިޓް ކާޑާއި ކްރެޑިޓް ކާޑު ވެސް ތައާރަފު ކުރެވޭނެ ކަމަށް ރައީސް ޑރ. މުއިއްޒު ވަނީ އިއުލާން ކުރައްވާފައެވެ. މި ބަދަލު އިންޑިއަން ރުޕީސްއިން ވެސް ގެނައުމަށް ވަނީ ނިންމަވާފައެވެ.
ރާއްޖޭގެ އިގްތިސާދު ކުރިއެރުވުމަށް ބީއެމްއެލް އިން އަޅާފައިވާ މުހިންމު އިތުރު ފިޔަވަޅެއްގެ ގޮތުން، ބީއެމްއެލް ކާޑު މެޝިންތަކުގައި ބޭނުންކުރާ ހުރިހާ ބީއެމްއެލް ޑެބިޓް ކާޑުތަކުން ނަގާ މާޗަންޓް ޑިސްކައުންޓް ރޭޓް (އެމްޑީއާރު) %2.5 އިން %1 އަށް ވަނީ ކުޑަކޮށްފައެވެ. މިއީ ޑެބިޓް ކާޑުގެ ޚިދުމަތް 2000 ވަނަ އަހަރު ތައާރަފުކުރި ފަހުން މި ރޭޓް ކުޑަކުރި ފުރަތަމަ ފަހަރެވެ.
އެމްޑީއާރު އަކީ، ބީއެމްއެލްގެ ކާޑު މެޝިންތަކުގައި ކާޑު މެދުވެރިކޮށް ފައިސާ ބަލައިގަތުމަށްޓަކައި ބޭންކުން ވިޔަފާރިވެރިންގެ އަތުން ނަގާ ކޮމިޝަނެވެ. މި ބަދަލުގެ ސީދާ ފައިދާ، ބީއެމްއެލްގެ ޕޭމަންޓް ޚިދުމަތްތައް ބޭނުންކުރާ 7،000 އަށް ވުރެ ގިނަ ވިޔަފާރިވެރިންނަށް ކުރާނެ ކަމަށް ބީއެމްއެލް އިން ވިދާޅުވިއެވެ.
ބޭންކް އޮފް މޯލްޑިވްސްގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފް ވިދާޅުވީ، މުޅި ރާއްޖޭގެ ވިޔަފާރިތަކަށް ޚަރަދުތައް ކުޑަކޮށް، ފައިނޭންސަށް ފަސޭހައިން ވާސިލުވުމަށް މި އެޅުނު ފިޔަވަޅާ މެދު ބޭންކް ވަރަށް ބޮޑަށް ފަހުރުވެރިވާ ކަމަށެވެ. މާޗަންޓް ފީ %1 އަށް ކުޑަކުރުމަކީ ބޮޑު ބަދަލެއް ކަމަށާއި، މި ބަދަލުގެ ސަބަބުން އެތައް ހާސް ވިޔަފާރިއަކަށް ބޮޑު ފައިދާއެއް ކުރާނެ ކަމަށް އޭނާ ވިދާޅުވިއެވެ.
އެމްޑީއާރު ކުޑަކުރުމުގެ އިތުރުން، ބީއެމްއެލް އިން ވަނީ ވިޔަފާރި ކަސްޓަމަރުންނަށް މާލީ ގޮތުން އިތުރު ލުއިފަސޭހަތަކެއް ފޯރުކޮށްދިނުމަށް އާ އެޑްވާންސް މާޗަންޓް ސެޓްލްމަންޓް ފެސިލިޓީއެއް ތަޢާރަފުކޮށްފައެވެ. ރަހުނަކާ ނުލައި ދޫކުރާ މި ފެސިލިޓީގެ ދަށުން، ވިޔަފާރިތަކަށް އެ ވިޔަފާރިއަކުން ފާއިތުވި ހަ މަސް ދުވަހު ބީއެމްއެލް ކާޑު މެޝިނުން ވިޔަފާރިކޮށްފައިވާ މިންވަރަށް ބަލައި، ދެ މިލިއަން ރުފިޔާއާ ހަމައަށް އަވަސްގޮތެއްގައި ފައިސާ ލިބޭނެއެވެ. މި ފައިސާ އަނބުރާ ދެއްކުމަށް ހަމަޖެހިފައިވަނީ މުސްތަގުބަލުގައި އެ ވިޔަފާރިއަކަށް ކޮންމެ ދުވަހެއްގެ މައްޗަށް ލިބޭ އާމްދަނީއަށް ބަލައި ފަސޭހަ އުސޫލަކުން ކަނޑާލެވޭ ގޮތަށެވެ.
ރައީސް ޑރ. މުއިއްޒު ވަނީ މިހާރު ކުރިމަތިވެފައި ހުރި އިގްތިސާދީ ކަންކަމަށް ބަލާއިރު، ޑޮލަރުގެ މައްސަލަ ވަރަށް ބޮޑުވެފައިވާ ކަމަށް ވިދާޅުވެފައެވެ. މިކަން ހައްލު ކުރުމަށް އެޅި މުހިންމު ފިޔަވަޅަކީ ގާނޫނެއް ތައާރަފް ކުރުން ކަމަށް ވިދާޅުވެ، ފަތުރުވެރިކަމުގެ ޚިދުމަތްދޭ ތަންތަނުން ވަކި އަދަދަކަށް ބޭންކަށް ޑޮލަރު މާރުކުރަން މަޖުބޫރުވާ ގޮތަށް ހެދި ގާނޫނުން ރަނގަޅު ނަތީޖާއެއް ފެންނަމުންދާ ކަމަށް ވެސް ވިދާޅުވިއެވެ.
ބީއެމްއެލް އިން ވިދާޅުވީ މިއީ ރާއްޖޭގެ އިގްތިސާދު ކުރިއަރުވައި، މާލީ ގޮތުން ވީހާ ވެސް ގިނަ ބަޔަކު ބާރުވެރިކުރުމަށް ބޭންކުން ދެމެހެއްޓެނިވި ގޮތެއްގައި ކުރަމުންދާ މަސައްކަތަށް އިތުރުވި ބޮޅެއް ކަމަށެވެ.
