ރާއްޖެއަށް ދެމުން އަންނަ ހައްޖުގެ ޚިދުމަތް ”މައްކާ ރޫޓް އިނީޝިއޭޓިވް“ ގެ ދަށުން ދާއިމީކޮށް ކުރިއަށް ގެންދަން ނިންމާފައިވާ ކަމަށް، މި އިނީޝިއޭޓިވްއާ ބެހޭ އެންމެ މަތީ ކޮމިޓީން މިއަދު ރާއްޖެއަށް ރަސްމީކޮށް އަންގައިފިއެވެ.
އެ ނިންމުމަކީ ދިވެހި ހައްޖުވެރިންނަށް ހައްޖު ދަތުރުގެ ކަންކަން ކުރިއަށް ވުރެ އެތައް ގުނައެއް ފަސޭހަވެގެންދާނެ ކަމެއް ކަމަށް އިސްލާމީ ކަންތައްތަކާ ބެހޭ ވުޒާރާއިން ވަނީ ވިދާޅުވެފައެވެ.
މިކަން ރާއްޖެއަށް އަންގާފައިވަނީ އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ސައުދީ އަރަބިއްޔާއަށް ކުރައްވަވާ ރަސްމީ ދަތުރުފުޅެއްގައި، މިއަދު އެ ކޮމިޓީއާއެކު ބޭއްވެވި ބައްދަލުވުމެއްގައެވެ. މި ބައްދަލުވުމުގައި ސައުދީގެ ހައްޖު މިނިސްޓްރީއާއި ފޮރިން މިނިސްޓްރީއާއި އޭވިއޭޝަނާއި އިމިގްރޭޝަނާއި ދާޚިލީ ވުޒާރާގެ އިސްވެރިން ބައިވެރިވެވަޑައިގެންނެވިއެވެ.
އިސްލާމީ ވުޒާރާއިން މައުލޫމާތު ދެއްވި ގޮތުގައި، މިދިޔަ އަހަރުގެ ހައްޖު ދަތުރުތަކަކީ ރާއްޖެއަށް މައްކާ ރޫޓްގެ ތަޖުރިބާގެ ފަހަރު ކަމަށް ވުމުން، އެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި ދިވެހި ސަރުކާރުގެ މުއައްސަސާތައް ކަމަށްވާ އެއާޕޯޓާއި ކަސްޓަމްސްއާއި އިމިގްރޭޝަނާއި މޯލްޑިވްސް ޙައްޖު ކޯޕަރޭޝަންއާއި އޭވިއޭޝަން ސެކިއުރިޓީއާއި ރައްޔިތުން ދެއްވި އެއްބާރުލެއްވުމާއި މުހިންމުކަން ސައުދީ ސަރުކާރުން ވަރަށް ބޮޑަށް ފާހަގަކުރައްވާފައިވެއެވެ.
މައްކާ ރޫޓް ދާއިމީ ގޮތެއްގައި ރާއްޖެއަށް ހަމަޖެހިގެން ދިއުމަކީ ހައްޖުގެ އަޅުކަމުގެ ދަތުރުގައި ދިވެހި ރައްޔިތުންނަށް ދިމާވާ ދަތިތައް ނިމުމަކަށް އަންނާނެ ކަމެއް ކަމަށް އިސްލާމީ ވުޒާރާއިން ބުނެއެވެ. މި އުސޫލުގެ ދަށުން މިއަހަރު ރާއްޖެއިން ދަތުރުކުރި ހަތަރު ފްލައިޓުގެ ހައްޖުވެރިންވެސް ދަތުރުކޮށްފައިވަނީ ހައްޖުވެރިން ރާއްޖެއިން ފުރުމުގެ ކުރިން ސައުދީ އިމިގްރޭޝަންގެ ހުރިހާ ކަމެއް އެއްކޮށް ފުރިހަމަކޮށްގެންނެވެ. އެހެންކަމުން، ސައުދީގެ ޖިއްދާ އެއާޕޯޓުގައި ހައްޖުވެރިން މަޑުކުރަން ޖެހެނީ ވަރަށް ކުޑަ ވަގުތުކޮޅެކެވެ. މިއީ މިހާތަނަށް ހައްޖުވެރިންގެ ދަތުރަށް ލިބިގެންދިޔަ އެންމެ ބޮޑު ލުއިފަސޭހައެވެ.
