ނޫސްވެރިކަމުގެ ދާއިރާގައި ކުރިއަރަން ބޭނުންވާ ފަރާތްތަކަށް ނުސްވެރިކަން ކިޔެވުމުގައި ސަރުކާރުން އެހީތެރިކަން ފޯރުކޮށްދިނުމަށް ހުޅުވާލައިފިއެވެ.
ޒުވާނުން ބާރުވެރިކުރުވުމާއި މައުލޫމާތާއި ފަންނާ ބެހޭ ވަޒީރު އިބްރާހިމް ވަހީދު ވިދާޅުވީ، ނޫސްވެރިކަމުގެ ދާއިރާއިން ތައުލީމު ހާސިލުކުރަން ބޭނުންވާ ޒުވާނުންނަށް ސަރުކާރުން އެހީތެރިވެދޭން ތައްޔާރަށް އޮތް ކަމަށެވެ. މިކަން އެމްއެންޔޫއާ މިނިސްޓްރީއާ ދެމެދު ސޮއިކުރެވުނު އިސްތިރާޖީ ފަހުމުނާމާގެ ރަސްމިއްޔާތުގައި ވަޒީރު ފާހަގަކުރެއްވިއެވެ.
ވަޒީރު އިބްރާހިމް ވަހީދު މި ފަހުމުނާމާގައި ސޮއިކުރެއްވީ މިނިސްޓްރީގެ ފަރާތުންނެވެ. އަދި އެމްއެންޔޫގެ ފަރާތުން ސޮއިކުރެއްވީ ވައިސް ޗާންސެލަރ ޑރ. އައިޝަތު ޝެހެނާޒު އާދަމްއެވެ. ވަޒީރު ވިދާޅުވީ، ރާއްޖޭގެ ގާތްގަނޑަކަށް 90 އިންސައްތަ ނޫސްވެރިންނަކީ ތަޖުރިބާގެ ތެރެއިން ދަސްކޮށްފައިވާ ބަޔަކަށް ވިޔަސް، އިތުރު ތައުލީމު ހާސިލުކުރުމަކީ މަސައްކަތުގެ ފެންވަރު ރަނގަޅުކުރުމަށް ވަރަށް މުހިންމު ކަމެކެވެ. އެހެންކަމުން، މި ދާއިރާގެ ކުރު ކޯސްތަކާއި ސެޓްފިކެޓް ލެވެލްގެ ކޯސްތަކުގެ އިތުރުން ޑިގްރީ، މާސްޓާސް އަދި ފައުންޑޭޝަން ކޯސްތަކުގައި ބައިވެރިވުމަށް ވަޒީރު ގޮވާލެއްވިއެވެ. މިފަދަ ކޯސްތަކުގެ ފީގެ ބައެއް ސަރުކާރުން ހަމަޖައްސައި، ބޭނުންވާ ހުރިހާ އެހީތެރިކަމެއް ފޯރުކޮށްދޭނެ ކަމުގެ ޔަގީންކަންވެސް ވަޒީރު ދެއްވިއެވެ.
”ރާއްޖޭގެ މީޑިއާގައި ހަރަކާތްތެރިވާ ބޭފުޅުންނަށް އަޅުގަނޑު ދަންނަވާލަން ބޭނުންވަނީ ރާއްޖޭގައި ގިނަ ނޫސްވެރިންގެ ލެކްވަނީ ފޮތުގައި ލިޔެފައި އޮތް އެއްޗެއް ދަސްކޮށްގެން މި ކުރަންޖެހޭ މަސައްކަތް. ރާއްޖޭގެ ނޫސްވެރިންގެ ގާތްގަނޑަކަށް %90 ކުދިންނަކީ މި ދާއިރާއަށް ހުރި ޝައުގެއްގެ ބޮޑުކަމުން ސްކޫލް ނިންމިގޮތަށް ނޫސްވެރިކަމަށް ވަދެ އެކަމުގެ ތެރެއިން ދަސްވި އެއްޗެއްގެ ތެރެއިން ބޮޑުވަމުން އަންނަ ކުދިން.“ ވަޒީރު ވިދާޅުވިއެވެ.
ޑރ. ޝެހެނާޒު ވިދާޅުވީ މި އެއްބަސްވުމުގެ ސަބަބުން ދެފަރާތުގެ މަސައްކަތްތަކަށް ހަލުވިކަމެއް ލިބި، ގައުމީ ތަރައްގީއަށް ދެމެހެއްޓެނިވި ބަދަލުތަކެއް ގެނެވޭނެ ކަމަށެވެ. އެމްއެންޔޫއިން އަންނަ އަހަރު ނޫސްވެރިކަމުގެ މާސްޓާސް ޕްރޮގްރާމެއް ފެށުމަށް މަސައްކަތްކުރަމުން އަންނަ ކަމަށްވެސް އެނގިފައިވެއެވެ.
މި ފަހުމުނާމާގެ ދަށުން، މިނިސްޓްރީން ހިންގާ ތަމްރީން ޕްރޮގްރާމްތަކަށް ޔުނިވަރސިޓީގެ ވަސީލަތްތައް ފޯރުކޮށްދިނުމާއި، މޯލްޑިވްސް ކޮލިފިކޭޝަން އޮތޯރިޓީގެ މިންގަނޑުތަކަށް ފެތޭ ޕްރޮގްރާމްތައް ތައްޔާރުކުރުމުގައި ފަންނީ އެހީތެރިކަން ދޭނެއެވެ. އަދި އޮން ދަ ޖޮބް ޓްރެއިނިންގ ސެޝަންތައް ހިންގުމާއި، ގާބިލް ފެސިލިޓޭޓަރުން ހޯދުމަށްވެސް އެހީތެރިވެދޭނެއެވެ. މިނިސްޓްރީން ޔުނިވަރސިޓީގެ ޕްރޮގްރާމްތަކަށް ބައިވެރިން ހޯދުމަށް އެހީތެރިވެދޭނެއެވެ. އަދި މީޑިއާއާ ގުޅުންހުރި ޕްރޮގްރާމްތަކުގެ ކޯސްތަކުގެ ފީގެ ވަކި ނިސްބަތެއް ދެއްކުމުގައިވެސް ބައިވެރިވާނެއެވެ. މި އެއްބަސްވުމަކީ ޒުވާނުންނަށް ފަންނުވެރިކަމާއި މީޑިއާގެ ދާއިރާއިން އުނގެނުމުގެ ފުރިހަމަ ފުރުސަތުތަކެއް ފަހިކޮށްދޭނެ އެއްބަސްވުމެއްގެ ގޮތުގައި ފާހަގަކުރެވިފައިވެއެވެ.
