ސަރުކާރު ހިންގާ ޕާޓީ، ޕީއެންސީން މިރޭ ބޮޑު ޖަލްސާއެއް ކުރިޔަށްދިޔައިރު، ކުރީގެ ރައީސް އަބްދުﷲ ޔާމީން އަބްދުލްޤައްޔޫމްގެ އަމިއްލަފުޅު ގެކޮޅު، ހ.ދޫވެހީގެ ބެލްކަންޏަށް ފިޔާތޮށި ކުލައިގެ ހުސް ގޮނޑިއެއް ނެރެފައިވާ މަންޒަރު ސޯޝަލްމީޑިއާގައި ދައުރުވާން ފަށައިފިއެވެ.
މިކަމަކީ މިރޭގެ ސިޔާސީ ހޫނުކަން އިތުރުކޮށް، ގިނަ ބަޔެއްގެ ސަމާލުކަން ހޯދާފައިވާ ކަމެކެވެ.
ސޯޝަލްމީޑިއާގައި މިހާރު ދައުރުވަމުންދާ ޕޯސްޓުތަކުން ފެންނަނީ، ރައީސް ޔާމީންގެ ގެކޮޅުގެ ބެލްކަންޏަށް ނެރެފައިވާ ފިޔާތޮށި ކުލައިގެ ހުސްގޮނޑިއެކެވެ. މިއީ ރައީސް ޑރ. މުޙައްމަދު މުއިއްޒުގެ ރިޔާސީ ކެމްޕެއިންގެ ޖަލްސާތަކުގައި ޔާމީންގެ ނަން ޖަހާފައި ހުރި ފިޔާތޮށި ކުލައިގެ ގޮނޑިއެއް ބެހެއްޓި ހަނދާން އާކޮށްދޭ ކަމެއް ކަމަށް ގިނަ ބަޔަކު ދަނީ ބުނަމުންނެވެ. އެއީ ރައީސް ޔާމީންގެ މިނިވަންކަމަށް ގޮވާލާ ދެއްކި އެއްބައިވަންތަކަމުގެ ރަމްޒެކެވެ.
ނަމަވެސް، މި ސަރުކާރުން ވެރިކަމަށް އައިތާ ހަފުތާއެއް ނުވަނީސް ޔާމީންއާއި ރައީސް މުއިއްޒުގެ ގުޅުން ގޯސްވެ، ޔާމީން ވަނީ ޕީޕީއެމްއިން ވަކިވެވަޑައިގެން އަމިއްލަފުޅު ޕާޓީ، ޕީއެންއެފް އުފައްދަވާފައެވެ. އެހެންކަމުން، މިރޭ ޕީއެންސީ ޖަލްސާއާ ދިމާކޮށް ޔާމީންގެ ބެލްކަންޏަށް ނެރިފައިވާ ފިޔާތޮށި ގޮނޑިއަކީ، މިހާރު ދެ ބޭފުޅުންގެ ދެމެދުގައި އޮތް ފަރަގު ފާހަގަކޮށް، ކުޑަވަރެއްގެ ސިޔާސީ ޖެއްސުމެއް ކަމަށް ގިނަ ބަޔަކު ދަނީ ސިފަކުރަމުންނެވެ.
ރައީސް ޔާމީން މިހާރު ގެންދަވަނީ ކޮންމެ ހަފުތާއަކު އަމިއްލަފުޅު ގެކޮޅުގައި ޖަލްސާތައް ބާއްވަވަމުންނެވެ. އެ ޖަލްސާތަކުގައި މި ސަރުކާރަށާއި ރައީސް މުއިއްޒަށް ވަރަށް ބޮޑަށް ޔާމީން ފާޑުވިދާޅުވެއެވެ. ރައީސް މުއިއްޒުގެ ރިޔާސީ ވައުދުފުޅެއްގެ ތެރޭގައި ޔާމީން މިނިވަން ކުރުން ހިމެނުނު ނަމަވެސް، އަދިވެސް ޔާމީންގެ މައްޗަށް ޖިނާއީ ދައުވާތަކެއް ދައުލަތުން ވަނީ އުފުލާފައެވެ.
މިރޭ އާޓިފިޝަލް ބީޗުގައި ކުރިޔަށްދާ ޕީއެންސީގެ ބޮޑު ޖަލްސާއަށް ގިނަ އަދަދެއްގެ ބަޔަކު ވަނީ މާލެއަށް އެއްވެފައެވެ. މިދިޔަ ބުދަ ދުވަހުން ފެށިގެން އެކި ރަށްރަށުން، ހާއްސަކޮށް އާބާދީ ބޮޑެތި ސިޓީތަކުން، މި ޖަލްސާގައި ބައިވެރިވުމަށް މީހުން އަންނަމުންދާކަން ފާހަގަކުރެވެއެވެ. އޭގެ ތެރެއިން އައްޑޫ ސިޓީގެ ހުޅުދޫ އަދި މީދޫން އެކަނިވެސް މިއަދު 256 މީހުން މާލެ އައިސްފައިވެއެވެ. އަދި ތިނަދޫ ސިޓީން 46 މީހުން، ފުވައްމުލައް ސިޓީ، ހއ. ހޯރަފުށި، ހއ. ފިއްލަދޫ ފަދަ ރަށްރަށުންވެސް މީހުން ވަނީ މާލެ އައިސްފައެވެ.
މިހާރުވެސް ގިނަ ބަޔަކު އެ ޖަލްސާ އޮންނަ އާޓިފިޝަލް ބީޗު ސަރަހައްދަށް ޖަމާވެފައިވާއިރު، އެ ސަރަހައްދުގެ ބައެއް މަގުތައް ފުލުހުން ވަނީ ބަންދުކޮށްފައެވެ. މިރޭގެ ޖަލްސާގައި ހަމައެކަނި ވާހަކަފުޅު ދައްކަވާ ގޮތަށް ހަމަޖެހިފައިވަނީ ރައީސް ޑރ. މުހައްމަދު މުއިއްޒެވެ. މިއީ ޕީއެންސީން މިހާތަނަށް ބާއްވާ އެންމެ ބޮޑު ޖަލްސާކަމަށް ޕާޓީން ބުނެއެވެ.
މިރޭ ޕީއެންއެފްގެ އޮފީހުގައި އެ ޕާޓީގެ ޖަލްސާއެއް ބޭއްވުމަށް ހަމަޖައްސާފައި އޮތް ނަމަވެސް، މީގެ އިރުކޮޅެއް ކުރިން އެ ޕާޓީގެ ސެކްރެޓަރީ ޖެނެރަލް މުހައްމަދު މަލީހް ޖަމާލް އެކްސްގައި ކުރެއްވި ޕޯސްޓެއްގައި ވިދާޅުވީ، ސަލާމަތީ ސަބަބުތަކަށްޓަކައި މިރޭގެ ޓައުން ހޯލް ޖަލްސާ ކެންސަލްކޮށްފައިވާ ކަމަށެވެ. އަދި މި ޖަލްސާ އާދީއްތަ ދުވަހުގެ ރެއަށް ފަސްކުރެވިފައިވާ ކަމަށްވެސް މަލީހް ވިދާޅުވިއެވެ.
ޔާމީންގެ ގެކޮޅުގެ ބެލްކަންޏަށް ފިޔާތޮށި ގޮނޑިއެއް ނެރުނު ވަގުތަކީ، ވެރިކަންކުރާ މައި ޕާޓީގެ ބޮޑު ޖަލްސާ އޮތް ރެއަށް ވުމަކީ ސިޔާސީ ގޮތުން ގިނަ ބަޔަކަށް ފާޑުކިޔުންތައް އުފައްދާނެ ކަމެއްކަން ކަށަވަރެވެ.
