މަސްތުވާތަކެއްޗާ ދެކޮޅަށް ސަރުކާރުން ހިންގި ގައުމީ އޮޕަރޭޝަން ”އަލިމަގު“ ނިމުނުއިރު 23 މިލިއަން ރުފިޔާގެ މަސްތުވާތަކެތި އަތުލައި، 110 މީހުން ހައްޔަރުކުރެވިފައިވާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
މި އޮޕަރޭޝަނަކީ ރައްޔިތުންނަށް ސަލާމަތާއި ރައްކާތެރިކަން ކަށަވަރުކޮށްދިނުމަށް ހިންގުނު މަސައްކަތެކެވެ.
ސަރުކާރަށް ދެ އަހަރު ފުރުމާ ގުޅިގެން ”ސަންގު ޓީވީ“ އަށް ދެއްވި އިންޓަވިއުގައި އިހުސާން ވިދާޅުވީ، ”އަލިމަގު“ އޮޕަރޭޝަން ނިމުނުއިރު ޖުމްލަ 110 މީހުން ހައްޔަރުކުރެވިފައިވާ ކަމަށެވެ. މީގެ އިތުރުން، މަސްތުވާތަކެތި ވިއްކުމަށް އެމީހުން ބޭނުންކުރި އާލާތްތަކާއި ގިނަ އަދަދެއްގެ މަސްތުވާތަކެއްޗާއި އަދި ފައިސާ ވެސް ވަނީ ފުލުހުންގެ ބެލުމުގެ ދަށަށް ގެނެވިފައި ކަމަށް އޭނާ ވިދާޅުވިއެވެ.
”މީގެ ތެރޭގައި ގާތްގަނޑަކަށް 23 މިލިއަން ރުފިޔާގެ މަގުމަތީ އަގުގެ ޕްރޮޑަކްޓްތައް ހިމެނޭ،“ އިހުސާން ފާހަގަކުރެއްވިއެވެ.
މިނިސްޓަރު އިތުރަށް ވިދާޅުވީ، މަސްތުވާތަކެތީގެ ވަބާއިން ގައުމު ސަލާމަތްކުރުމަށް ސަރުކާރުން މިހާރު ގެންގުޅޭ ސްޓްރެޓެޖީއަކީ މަސްތުވާތަކެތި ބޭނުންކުރާ ނުވަތަ ކުދި ވިޔަފާރި ހިންގާ މީހުންނަށް އަމާޒުކުރުމުގެ ބަދަލުގައި، ރާއްޖެއަށް މަސްތުވާތަކެތި އެތެރެކޮށް ބޮޑެތި ވިޔަފާރި ހިންގާ ފަރާތްތައް ހިފެހެއްޓުން ކަމަށެވެ. މިގޮތުން، މަސްތުވާތަކެތި އެތެރެކުރުމުގެ ކުށަށް މަރުގެ އަދަބު ދިނުމަށް ރައީސް ނިންމަވާފައިވާ ކަމަށާއި، ގާނޫނަށް ބޭނުންވާ އިސްލާހީ ބަދަލުތައް ގެނެސް، މައްސަލަތަކުން މީހުން ސަލާމަތްވާ ލޫޕްހޯލްތައް ބަންދުކުރެވިފައިވާ ކަމަށް އޭނާ ފާހަގަކުރެއްވިއެވެ.
އިދާރީ މައްސަލަތަކާއި ތަހުގީގުގައި ހުންނަ ކުދިކުދި ލޫޕްހޯލްތައް އިސްލާހުކުރުމަށްޓަކައި ޕްރޮސެކިއުޓަރ ޖެނެރަލްގެ އޮފީހާއި ފުލުހުންނާ ވަރަށް ގާތުން މަސައްކަތްކުރަމުންދާ ކަމަށާއި، ކްރިމިނަލް ކޯޓުގައި އައު އިމާރާތެއްގައި 12 ކޯޓުރޫމް ގާއިމުކުރެވިފައިވާތީ، ޝަރީޢަތުގެ ކަންކަން މިހާރު ވަރަށް އަވަހަށް ކުރިއަށްދާ ކަމަށް މިނިސްޓަރު ވިދާޅުވިއެވެ. މި މަސައްކަތްތަކުގެ ސަބަބުން މަސްތުވާތަކެއްޗާ ދެކޮޅަށް ކުރާ މަސައްކަތުން ބޭނުންވާ ނަތީޖާ ހާސިލުކުރެވޭނެކަމަށް އޭނާ ދެކެވަޑައިގަންނަވައެވެ.
