މާލެ ސަރަހައްދުގައި ގަވާއިދާ ހިލާފަށް ހިންގަމުންދިޔަ ހަތަރު މަސާޖު ޕާލާއެއް މޯލްޑިވްސް އިމިގްރޭޝަނުން ރޭ ބަންދުކޮށް، އެތަންތަނުން ފަސް ބިދޭސީއަކު އެ އިދާރާގެ ބެލުމުގެ ދަށަށް ގެނެސްފިއެވެ.
މިއީ ގަވާއިދާ ހިލާފަށް ރާއްޖޭގައި މަސައްކަތްކުރާ ބިދޭސީންނަށް އަމާޒުކޮށް އިމިގްރޭޝަނުން ކުރިއަށްގެންދާ ހާއްސަ އޮޕަރޭޝަންތަކުގެ ތެރެއިން ހިންގުނު އަނެއް އޮޕަރޭޝަނެކެވެ.
އިމިގްރޭޝަނުން މިއަދު ވިދާޅުވީ، ގަވާއިދާ ހިލާފަށް ބިދޭސީން ވިޔަފާރިކުރާ ތަންތަން ބަލައިފާސްކުރުމަށް ޓާސްކްފޯސްއިން ހިންގަމުންދާ އޮޕަރޭޝަންތަކުގެ ތެރެއިން، ރޭ މާލޭގައި ހިންގަމުންދިޔަ ހަތަރު މަސާޖު ޕާލާއެއް ބަލައިފާސްކުރެވުނު ކަމަށެވެ. އަދި އެތަންތަނުން ގަވާއިދާ ހިލާފަށް އުޅެމުންދިޔަ ތިން ބިދޭސީއަކު އިމިގްރޭޝަންގެ ބެލުމުގެ ދަށަށް ގެނެސްފައިވާ ކަމަށްވެސް އެ އިދާރާއިން މައުލޫމާތުދެއެވެ. އިމިގްރޭޝަނުން އިތުރަށް ވިދާޅުވީ، ދޫކޮށްފައިވާ ހުއްދައިގެ ބޭރުން ގަވާއިދާ ހިލާފަށް މަސައްކަތް ކުރަމުންދިޔަ އިތުރު ދެ ބިދޭސީއަކުވެސް ރޭގެ އޮޕަރޭޝަންގައި ވަނީ ހައްޔަރުކޮށްފައި ކަމަށެވެ.
މިދިޔަ އަންގާރަ ދުވަހުގެ ރޭގަވެސް އިމިގްރޭޝަނުން ވަނީ މާލޭގައި ހިންގަމުންދާ ހަތަރު މަސާޖު ޕާލަރު ބަންދުކޮށް، ގަވާއިދާ ހިލާފަށް އެތަންތަނުގައި މަސައްކަތްކުރި ތިން ބިދޭސީއަކު ހައްޔަރުކޮށްފައެވެ. މި ހަތަރު ތަނުގައި ހިންގަމުންދިޔަ ވިޔަފާރި ވަގުތުން ހުއްޓުވުމުގެ ފިޔަވަޅުތައް މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑްއިން ވަނީ އަޅާފައި ކަމަށްވެސް އިމިގްރޭޝަނުން މައުލޫމާތުދެއެވެ.
އިމިގްރޭޝަނުން ވިދާޅުވީ، ގަވާއިދާ ހިލާފަށް ރާއްޖޭގައި ވިޔަފާރިކޮށް، މަސައްކަތް ކުރަމުންދާ ބިދޭސީންނަށް އަމާޒުކޮށް ޓާސްކްފޯސްއިން ކުރިއަށްގެންދާ މި އޮޕަރޭޝަންތައް އިތުރަށް ވަރުގަދަކުރާނެ ކަމަށެވެ. މި އަހަރުގެ ތެރޭގައި އިމިގްރޭޝަނުން ހިންގި ރެއިޑް އޮޕަރޭޝަންތަކުގައި މިހާތަނަށް ގިނަ އަދަދެއްގެ ބިދޭސީން ވަނީ ހައްޔަރުކޮށްފައެވެ. އަދި މި މައްސަލަތަކާ ގުޅިގެން ޑިޕޯޓޭޝަން ސެންޓަރުގައި ބަންދުކުރެވޭ ފަރާތްތައް އެ މީހުންގެ ގައުމުތަކަށް ފޮނުވުމުގެ މަސައްކަތް ވެސް ދަނީ ހަލުވިކަމާއެކު ކުރިއަށްނެވެ.
ގަވާއިދާ ހިލާފަށް ރާއްޖޭގައި އުޅޭ ބިދޭސީން މޮނިޓަރުކުރުމަށް އިމިގްރޭޝަނުން ކުރަމުންދާ މަސައްކަތްތަކުގެ ތެރެއިން، މާލޭގެ އާންމު ތަންތަނުގައި އޮފިސަރުން އޮބްޒާވޭޝަން މަސައްކަތްތައް ވެސް މިހާރު ދަނީ ކުރިއަށެވެ. ރާއްޖޭގެ އެކި ކަންކޮޅުތަކުގައި ހާއްސަ އޮޕަރޭޝަންތައް ހިންގަމުންދާ އިރު، ގަވާއިދާ ހިލާފު އެއްވެސް އަމަލަކަށް އިމިގްރޭޝަނުން ފުރުސަތު ނުދޭނެ ކަމުގެ އިންޒާރުވެސް އެ އިދާރާއިން ވަނީ ދީފައެވެ.
