ދިވެހި މަސްވެރިކަމުގެ ސިނާއަތަށް ޒަމާނީ ހައްލެއް ހޯދައިދިނުމުގެ ގޮތުން، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ”މަސްކިރާ“ ގެ ނަމުގައި އާ އެޕްލިކޭޝަނެއް ތައާރަފުކޮށްފިއެވެ.
މިއަހަރު މަސްވެރިންގެ ދުވަސް ފާހަގަކުރުމަށް ރޭ ބޭއްވި 45 ވަނަ ރަސްމީ ޖަލްސާގައި މި އެޕް ރަސްމީކޮށް އިފްތިތާހުކޮށްދެއްވީ ހެލްތު މިނިސްޓަރ އަބްދުﷲ ނާޒިމް އިބްރާހީމް އެވެ.
”މަސްކިރާ“ އެޕްލިކޭޝަނަކީ، މިފްކޯގެ މަސްކިރާ މަރުކަޒުތަކާއި ބޯޓުތަކަށް މަސްވެރިން މަސްކިރަން ދާއިރު، ކިޔޫގައި މަޑުނުކޮށް، އޮޓޮމެޓިކުން ކިޔޫ ނަންބަރު ހޯދުމުގެ ފުރުސަތު ލިބިގެންދާނެ އެޕެކެވެ. މީގެ އިތުރުން ފެނާއި އައިސް ގަތުމަށްވެސް މި އެޕް މެދުވެރިކޮށް ދުރާލާ ކިޔޫ ނަންބަރު ހޯދުމުގެ އިންތިޒާމު ވަނީ ހަމަޖައްސާފައެވެ.
މި އެޕްގެ ސަބަބުން މަސްވެރިންނަށް އެތައް ފަސޭހަތަކެއް ލިބިގެންދާނެއެވެ. އެގޮތުން، މަސްކިރަން ގޮސް ގިނައިރު ކިޔޫގައި މަޑުކުރުމުގެ ބުރަ މަސްވެރިންގެ ކިބައިން ކުޑަވެ، ވަގުތާއި ތެލުގެ ހަރަދު ސަލާމަތްވާނެކަމަށް މިފްކޯއިން ބުނެއެވެ. ކިޔޫ ނަންބަރު ނެގުމުގެ އިތުރުން، މަސްވެރިންނަށް އެމީހުންގެ އޮޑި ރަޖިސްޓަރީ ކުރުމުގެ ފުރުސަތާއި، އެ ދޯންޏަކުން ކިރާފައިވާ މަހުގެ އަދަދުތަކާއި ދުވަސްތައްފަދަ ތަފާސްހިސާބުތައް އެޕް މެދުވެރިކޮށް ބަލައިލުމުގެ ފަސޭހަވެސް ވަނީ ލިބިފައެވެ. މިގޮތުން މަސްވެރިންނަށް އެމީހުންގެ މަސްވެރިކަމުގެ ހަރަކާތްތަކުގެ މައުލޫމާތު ފަސޭހަކަމާއެކު ބަލައިލެވޭނެއެވެ.
އެއްވެސް ފަރާތެއްގެ ބައިވެރިވުމެއްނެތި ކިޔޫ ނަންބަރު އޮޓޮމެޓިކުން ނެގޭނެ އިންތިޒާމު ހަމަޖެހިގެން ދިއުމަކީ މިފްކޯއާއި މަސްވެރިންގެ މެދުގައި އޮންނަ އިތުބާރު އިތުރުވެ، ޚިދުމަތްތައް ހާމަކަންބޮޑުކަމާއެކު ފޯރުކޮށްދެވޭނެ ގޮތެއްކަމަށް ވެސް ފާހަގަކުރެވެއެވެ.
”މަސްކިރާ“ އެޕްލިކޭޝަނަކީ ”ކެޔޮޅާ މޯލްޑިވްސް“ ގެ ރައީސާ ޝަފްޤާ ޝަފީޤްގެ ކޮންސެޕްޓަކަށް ފަރުމާކޮށް، ކެޔޮޅާ މޯލްޑިވްސް އާއި މިފްކޯ ގުޅިގެން ތަރައްގީކުރި އެޕެކެވެ. މި އެޕް ފަރުމާކުރެވިފައިވަނީ މަސްވެރިންގެ ޚިޔާލާއި މަޝްވަރާ ހޯދައިގެން ކަމުން، މަސްވެރިންނަށް އެންމެ ފައިދާކުރަނިވި ގޮތަކަށް މި ޚިދުމަތް ފޯރުކޮށްދިނުމަށް ވަނީ ބޮޑު ސަމާލުކަމެއް ދީފައެވެ. މި އެޕްގެ ސަބަބުން ދިވެހި މަސްވެރިކަމުގެ ސިނާއަތަށް ގިނަ ކުރިއެރުންތަކެއް ލިބިގެންދާނެއެވެ.
