އުމްރާގެ އަޅުކަން އަދާކުރުމަށް ސައުދީ އަރަބިއްޔާއަށް ގޮސް އުޅުނު ދިވެހި ޒުވާނަކު، ހާޓް އެޓޭކެއް ޖެހިގެން ރޭގެ ވަގުތެއްގައި ނިޔާވެއްޖެއެވެ.
މި ހާދިސާގައި ނިޔާވެފައިވަނީ މ. ސައްކެޔޮމާގެ، މުޙައްމަދު އިމްތިޔާޒް (އިންތި)، 27އ، އެވެ. އޭނާއަކީ އަލް މަނާސިކް ގްރޫޕްގެ ހަވާލުގައި އުމްރާއަށް ދިޔަ މީހެކެވެ.
މައުލޫމާތު ލިބިފައިވާ ގޮތުގައި، އިމްތިޔާޒް ނިޔާވީ ރޭ ރާއްޖެ ގަޑިން ގާތްގަނޑަކަށް 11:00 ޖަހާކަންހާއިރުއެވެ. އޭނާ ނިޔާވީ އުމްރާގެ މާތް އަޅުކަމުގެ ތެރެއިން ސަފާ އާއި މަރުވާ ދެމެދު ސައުޢީ ކުރަން އުޅުމުގެ ތެރޭގައި ކުއްލިއަކަށް ހޭނެތިގެން ވެއްޓިގެންނެވެ.
އަލް މަނާސިކް ގްރޫޕްގެ އޮފިޝަލަކު މީޑިއާއަށް މައުލޫމާތު ދެއްވަމުން ވިދާޅުވީ، އިމްތިޔާޒް ވެއްޓުމާއެކު ވަގުތުން ހޮސްޕިޓަލަށް ގެންދެވުނު ކަމަށެވެ. އަދި އޭނާ ނިޔާވީ ހާޓް އެޓޭކެއް ޖެހިގެންކަން ހޮސްޕިޓަލުން ކަށަވަރުކޮށްދީފައިވަނީ އިރުއޮއްސި 6:30 ހާއިރު ކަމަށްވެސް އޮފިޝަލް ވިދާޅުވިއެވެ.
އިމްތިޔާޒްގެ ހަށިގަނޑު ރޭގެ ވަގުތެއްގައި ވަނީ މައްކާގައި ވަޅުލާފައެވެ.
ކޮންމެ އަހަރެއްގެވެސް ސްކޫލް ބަންދާ ދިމާކޮށް ގިނަ އަދަދެއްގެ ދިވެހިން އުމްރާގެ އަޅުކަމަށް ސައުދީ އަރަބިއްޔާއަށް ދަތުރުކުރެއެވެ. މިފަދަ ބަރަކާތްތެރި ދަތުރެއްގެ މަތީގައި އުޅެނިކޮށް ޒުވާން ދިވެއްސަކު ނިޔާވުމާ ގުޅިގެން، ގިނަ ބަޔަކު އަންނަނީ އާއިލާއަށް ތައުޒިޔާ ކިޔަމުންނެވެ.
