ކެންސަރު ފަދަ ބޮޑެތި ބަލިތަކަށް ފަރުވާ ކުރުމަށާއި، ގެދޮރު އިމާރާތް ކުރުމުގެ އިތުރުން ހައްޖުގެ އަޅުކަން އަދާކުރުމަށް ޕެންޝަން ފަންޑުގައި ހުރި ފައިސާ ބޭނުންކުރެވޭ ގޮތް ހެދުމަށް ޕެންޝަނާ ބެހޭ ގާނޫނަށް އިސްލާހު ހުށަހަޅައިފިއެވެ.
ސަރުކާރުގެ ފަރާތުން މި އިސްލާހު ރައްޔިތުންގެ މަޖިލީހަށް ހުށަހެޅުއްވީ މިލަންދޫ ދާއިރާގެ މެންބަރު ހަސަން މުފީދު އަބްދުލްގާދިރެވެ. މި ބިލުގެ ފުރަތަމަ ކިޔުން އިއްވުމާއި ބަހުސް ކުރުން މާދަމާ ބާއްވާ މަޖިލީހުގެ ދައުރުން ބޭރުގެ ޖަލްސާއަށް ވަނީ އެޖެންޑާ ކޮށްފައެވެ.
މި އިސްލާހު ހުށަހެޅުމުގެ މައިގަނޑު މަގުސަދުތަކުގެ ތެރޭގައި ހިމެނެނީ:
- ސިއްހީ ފަރުވާ: ބޮޑެތި ބަލިތައް ތަހައްމަލު ކުރަމުންދާ ފަރާތްތަކަށް، އެ މީހުންގެ ޕެންޝަން ފަންޑުގައިވާ ފައިސާ ދޫކުރެވޭނެ އުސޫލެއް ގާއިމުކުރުން
- ގެދޮރުވެރިކަން: ގެދޮރު އިމާރާތް ކުރުމަށާއި މަރާމާތު ކުރުމަށް ޕެންޝަން ފަންޑުގައިވާ ފައިސާ ކޮލެޓަރަލް ނުވަތަ ރަހުނެއްގެ ގޮތުގައި ބޭނުންކުރެވޭނެ ގޮތް ހެދުން
- ހައްޖުގެ އަޅުކަން: ހައްޖަށް ދިއުމަށްޓަކައި ދުރަލާ ޖާގަ ރިޒާވް ކުރުމަށް ޕެންޝަން ފައިސާ ބޭނުންކުރެވޭނެ މަގު ފަހިކޮށްދިނުން
- އަސާސީ ޕެންޝަން: އުމުރުން ދުވަސްވީ މީހުންނަށް ދެވޭ އަސާސީ ޕެންޝަނަށްވުރެ ބޮޑު އާމްދަނީއެއް ލިބޭ ފަރާތްތަކަށް އަސާސީ ޕެންޝަން ނުލިބޭނެ ގޮތަށް ކަނޑައެޅުން.
މި އިސްލާހަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެވަޑައިގަންނަވާފައިވާ ވައުދުފުޅަކާ ގުޅިގެން ހުށަހެޅުނު އިސްލާހެކެވެ. މީގެ ދެ ހަފްތާ ކުރިން ގަލޮޅު ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް މުއިއްޒު ވަނީ، ދާއިމީ ބަލިތަކަށް ފަރުވާކުރާ ފަރާތްތަކަށް ޕެންޝަން ފައިސާ އެއްކޮށް ނެގޭނެ އިންތިޒާމު ހަމަޖައްސަވައިދެއްވާނެ ކަމަށް ވިދާޅުވެފައެވެ.
އެ ޖަލްސާގައި ރައީސް އިތުރަށް ވިދާޅުވީ، ޕެންޝަން ފައިސާ ބޭނުންކުރެވޭނެ އިތުރު ދާއިރާތައް ފުޅާކުރައްވާނެ ކަމަށާއި، މިހާރުވެސް ހައުސިންގެ ބައެއް ކަންކަމަށް އެ ފައިސާ ބޭނުންކުރެވެން ފަށާފައިވާ ކަމަށެވެ.
މި އިސްލާހު ފާސްވެއްޖެނަމަ، ބޮޑެތި ބަލިތަކަށް ފަރުވާކުރާ ގިނަ ބަޔަކަށް މާލީ ގޮތުން ބޮޑު ލުޔެއް ލިބިގެންދާނެއެވެ.
