އިސްރާއީލުގެ ކެބިނެޓުން ހިފާފައިވާ ހުޅަނގު އައްސޭރީގެ ބިންތަކުގެ ކޮންޓްރޯލް ވަރުގަދަކޮށް، ޔަހޫދީ ވަޒަންވެރިންނަށް ބިން ގަތުމަށް ފަސޭހަވާނެ ގޮތަށް އާ ފިޔަވަޅުތަކެއް އާދީއްތަ ދުވަހު ފާސްކޮށްފިއެވެ. މި ނިންމުމަކީ ހުޅަނގު އައްސޭރި އިސްރާއީލުގެ ބައެއްގެ ގޮތުގައި ހެދުމަށް (އެނެކްސޭޝަން) ނިންމި ނިންމުމެއް ކަމަށް ބުނެ ފަލަސްތީނުން ވަނީ މިކަން ހަރުކަށި އިބާރާތުން ކުށްވެރިކޮށްފައެވެ.
ހުޅަނގު އައްސޭރިއަކީ ފަލަސްތީނުގެ މިނިވަން ދައުލަތެއް ގާއިމުކުރުމަށް އެދޭ މުހިންމު އެއް ސަރަހައްދެވެ. ނަމަވެސް، 1967 ވަނަ އަހަރުގެ ހަނގުރާމައަށްފަހު އިސްރާއީލުން އެ ސަރަހައްދު އޮތީ އަސްކަރީ ބާރުގެ ދަށަށް ގެންގޮސްފައެވެ. އިސްރާއީލުގެ މިހާރުގެ ކެބިނެޓުން ވަނީ 1967 ވަނަ އަހަރަށްފަހު ފުރަތަމަ ފަހަރަށް ހުޅަނގު އައްސޭރީގެ ބިންތައް ރަޖިސްޓްރީ ކުރުމުގެ މަސައްކަތް ފެށުމަށް ވޯޓު ދީފައެވެ.
މި ނިންމުމާ ގުޅޭގޮތުން އިސްރާއީލުގެ ފިނޭންސް މިނިސްޓަރު ބެޒަލެލް ސްމޮޓްރިޗް ވިދާޅުވީ، މިއީ ވަޒަންވެރިވުމުގެ ”އިންގިލާބެއް“ ކަމަށާއި، މުޅި ސަރަހައްދުގެ މައްޗަށް އޮތް އިސްރާއީލުގެ ބާރު މިކަމުގެ ސަބަބުން ވަރުގަދަވެގެންދާނެ ކަމަށެވެ. އަދި ޑިފެންސް މިނިސްޓަރު އިސްރާއީލް ކަޓްޒް ވިދާޅުވީ މިއީ ސަލާމަތީ ގޮތުން އަޅަންޖެހޭ މުހިންމު ފިޔަވަޅެއް ކަމަށެވެ.
ނަމަވެސް، ފަލަސްތީނުގެ ރިޔާސަތުން ވަނީ މިއީ ބައިނަލްއަގުވާމީ ގާނޫނުތަކާ ޚިލާފަށް ހިންގާ އުދުވާނެއްގެ ގޮތުގައި ސިފަކޮށްފައެވެ. ފަލަސްތީނުން ބުނާ ގޮތުގައި މިއީ ބިންތައް ފޭރިގަތުމަށް ރާވާފައިވާ ބޮޑު މަޝްރޫއެއްގެ ފެށުމެވެ. އިސްރާއީލުގެ ”ޕީސް ނައު“ ޖަމިއްޔާއިން އިންޒާރު ދީފައިވާ ގޮތުގައި، މި ނިންމުމުގެ ސަބަބުން ހުޅަނގު އައްސޭރީގެ ދެބައިކުޅަ އެއްބައި ބިން ފަލަސްތީނު ރައްޔިތުންގެ އަތުން ގެއްލިގެން ދިއުމުގެ ބިރު އެބައޮތެވެ.
އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ދެކެވަޑައިގަންނަވާ ގޮތުގައި ފަލަސްތީނުގެ ދައުލަތެއް ގާއިމުވުމަކީ އިސްރާއީލުގެ ސަލާމަތަށް އޮތް ނުރައްކަލެކެވެ. އޭނާގެ ސަރުކާރުގެ ކޯލިޝަނުގައި ހިމެނޭ ގިނަ މެންބަރުންނަކީ ހުޅަނގު އައްސޭރިއަކީ އިސްރާއީލުގެ ބައެއްގެ ގޮތުގައި ރަސްމީކޮށް ކަނޑައެޅުމަށް ވަކާލާތުކުރާ ފަރާތްތަކެވެ.
އދ. ގެ އެންމެ މަތީ ކޯޓުން 2024 ވަނަ އަހަރު ނެރުނު ލަފާގައި ބުނެފައިވަނީ، އިސްރާއީލުން ފަލަސްތީނުގެ ބިންތައް ހިފައިގެން ތިބުމާއި އެތަނުގައި ޔަހޫދީ އާބާދީތައް ބިނާކުރުމަކީ ޣައިރު ގާނޫނީ ކަމެއް ކަމަށެވެ. ނަމަވެސް އިސްރާއީލުން މި ނިންމުންތަކަށް އިންކާރު ކުރެއެވެ. އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން އިސްރާއީލުން ބިންތައް މިލްކުކުރުމާ ދެކޮޅު ހެދި ނަމަވެސް، އާބާދީތައް ފުޅާކުރުން ހުއްޓުވުމަށް އެދެވޭ މަސައްކަތެއް ކޮށްފައެއް ނުވެއެވެ.
