ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު 2028 ވަނަ އަހަރު ރިޔާސީ އިންތިހާބުގެ ކެމްޕޭނަށް މާޅޮސްމަޑުލު އުތުރުބުރި ފައިނަށް ވަޑައިގަންނަވާނީ ފައިނު އެއާޕޯޓަށް ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އަދި ޕީއެންސީގެ ޕީޖީލީޑަރ އިބްރާހީމް ފަލާޙް ވިދާޅުވެއްޖެއެވެ.
މެމްބަރު ފަލާޙް މިހެން ވިދާޅުވީ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގެ އިނގުރައިދޫ ދާއިރާގެ ކެމްޕޭން އިފްތިތާހު ކުރުމަށް ކިނޮޅަހުގައި ބޭއްވި ޖަލްސާގައި ވާހަކަ ދައްކަވަމުންނެވެ.
ފަލާހް ވިދާޅުވީ ފައިނުގައި އެޅުމަށް ސަރުކާރުން ނިންމާފައިވާ އެއާޕޯޓާއި ގުޅޭގޮތުން ފައިނުން ބައެއް ބޭފުޅުން ފަލާހްއާ ގުޅުއްވަމުން ގެންދަވާކަމުގައެވެ. އަދި އެ ބޭފުޅުންނަށް ދަންނަވާން އޮތީ، 2028 ވަނަ އަހަރުގެ ރިޔާސީ އިންތިހާބުގެ ކެމްޕޭނަށް ރައީސުލްޖުމްހޫރިއްޔާ ޑރ. މުޢިއްޒު ފައިނަށް ވަޑައިގަންނަވާނީ ފައިނު އެއާޕޯޓަށްކަމަށްވެސް ފަލާހް ވިދާޅުވިއެވެ.
އިނގުރައިދޫ ދާއިރާގެ ކެމްޕެއިން އިފްތިތާޙް ކުރުމަށް ބޭއްވި ޖަލްސާގައި ވާހަކަ ދައްކަވަމުން ފަލާޙް ވިދާޅުވީ، އަތޮޅު ރަށްތަކުގައި ކުރަން މުހިންމު މަސައްކަތްތަކެއް އެބަހުރިކަމުގައެވެ. އަދި އެ ކަންކަން ކުރިއަށް ގެންދަން ފަސޭހަވާނީ ސަރުކާރު ކެންޑިޑޭޓުން ހޮވައިގެންކަމަށްވެސް ފަލާޙް ވިދާޅުވިއެވެ.
ފަލާޙް މިހެން ވިދާޅުވެފައިވާއިރު، ކުރިއަށް ދާނެ އެއާޕޯޓުތަކުގެ ލިސްޓް ވިދާޅުވިއިރު ރިޔާސީ ބަޔާނުގައިވެސް ރައީސް ވަނީ ފައިނު އެއާޕޯޓުގެ ވާހަކަ ވިދާޅުވެފައެވެ.
ފައިނު އެއާޕޯޓުގެ މަސައްކަތާ ގުޅިގެން އެކިފަހަރު އެކި މަސައްކަތްތައް ކުރިއަށްގޮސްފައިވާއިރު، އެންމެފަހުން ކުރިއަށް ގޮސްފައިވަނީ ކޮންސެޕްޓް ކައުންސިލާ ހިއްސާ ކުރުމުގެ މަސައްކަތެވެ.
މިދިޔަ ނޮވެންބަރު މަހުގެ ތެރޭ އެމްއޭސީއެލްގެ ވަފުދެއް ފައިނަށް ވަޑައިގެން ފަހުގެ ކޮންސެޕްޓް ކައުންސިލާ ހިއްސާ ކުރައްވާފައިވާފައެވެ.
އޭގެފަހުން ކައުންސިލުންވެސް ވަނީ ޓެކްނިކަލް މައުލޫމާތު ރައްޔިތުންނާ ހިއްސާކުރެއްވުމަށް އެމްއޭސީއެލްގެ ބޭފުޅުންނާ އެކު ރައްޔިތުންގެ ބައްދަލުވުމެއް ބޭއް ވުމަށް ރައްޔިތުންގެ ބައްދަލުވުމަކަށް ދައުވަތު ވެސް ފޮނުވާފައެވެ. ނަމަވެސް، އެމްއޭސީއެލްގެ ބޭފުޅުންނަށް ވަޑައިނުގެންނެވުމުން އެ ބައްދަލުވުން މިހާތަނަށް އަދި ބާއްވާފައެއް ނުވެއެވެ.
