ކުރިއަށް އޮތް މެއި މަހުގެ 25 ވަނަ ދުވަހުން ފެށިގެން، ސްރީލަންކާއަށް ޒިޔާރަތްކުރާ ހުރިހާ ފަތުރުވެރިން ”އިލެކްޓްރޯނިކް ޓްރެވަލް އޮތޮރައިޒޭޝަން“ (އީޓީއޭ) ނަގަންޖެހޭ ގޮތަށް އެ ގައުމުގެ ސަރުކާރުން ހަމަޖައްސައިފިއެވެ.
މާލޭގައި ހުންނަ ސްރީލަންކާގެ ހައި ކޮމިޝަނުން ހާމަކޮށްފައިވާ ގޮތުގައި، މި ބަދަލަށް އަމަލުކުރަން ފެށުމުން އެ ގައުމަށް އެތެރެވާ ހުރިހާ ބޭރު ގައުމުތަކުގެ ރައްޔިތުން ދުރާލައި އޮންލައިންކޮށް މި ހުއްދަ ހޯދަންޖެހޭނެއެވެ. މިކަމަށްޓަކައި ހާއްސަކޮށްފައިވާ ވެބްސައިޓް މެދުވެރިކޮށް ދަތުރުގެ ކުރިން ހުއްދައަށް އެދި ހުށަހެޅޭނެއެވެ.
މި ނިންމުމާ ގުޅިގެން ދިވެހި ރައްޔިތުންނަށް ލިބޭ ލުއިތަކަށް ބަލާއިރު، ކުރިންވެސް އޮންނަ އުސޫލުން 90 ދުވަހުގެ ޓޫރިސްޓް ވިސާ އެއްވެސް ފީއަކާ ނުލައި ދިވެހިންނަށް ލިބޭނެއެވެ. ނަމަވެސް އައު ބަދަލާއެކު، ލަންކާއަށް ދަތުރު ފެށުމުގެ ކުރިން އީޓީއޭ ފޯމު ފުރިހަމަކޮށް، ހުއްދަ ހޯދުމަކީ މިހާރު ކޮންމެހެން ކުރަންޖެހޭނެ ކަމެކެވެ.
ލަންކާ ސަރުކާރުން މި ފިޔަވަޅު އަޅާފައިވަނީ އެ ގައުމުގެ ބޯޑަރު ކޮންޓްރޯލް ހަރުދަނާކޮށް، އެތެރެވާ މީހުން މޮނިޓާ ކުރުމުގެ ނިޒާމު ހަރުދަނާ ކުރުމުގެ މަގުސަދުގައެވެ. މިއީ ސަރަހައްދީ ސަލާމަތާއި ރައްކާތެރިކަން ކަށަވަރު ކުރުމަށްޓަކައި އެ ގައުމުން ގެނައި މުހިންމު ބަދަލެކެވެ.
ލަންކާއަށް ދަތުރުކުރާ މީހުން އީޓީއޭ ހުށަހަޅަންޖެހޭ ގޮތަށް އޮތް އޮތުން މިދިޔަ އަހަރުގެ ނޮވެމްބަރު މަހު އުވާލާފައި އޮތުމަށްފަހު، އަލުން މި ނިޒާމު ތައާރަފުކުރަން ނިންމީ ޓޫރިޒަމް ކުރިއެރުވުމަށާއި ބޯޑަރު ބެލެހެއްޓުމަށްޓަކައި ލަންކާގެ ގާނޫނު ހަދާ މަޖިލީހުން މި މަހުގެ ހަތްވަނަ ދުވަހު ފާސްކުރި ނިންމުންތަކާ ގުޅިގެންނެވެ.
ސްރީލަންކާގެ މި ނިންމުމަކީ ރާއްޖެ ފަދަ އަވަށްޓެރި ގައުމުތަކަށްވެސް ބޯޑަރުގެ ސަލާމަތީ ކަންކަން ހަރުދަނާ ކުރުމަށް މުހިންމު ކަމެކެވެ. ހާއްސަކޮށް، ގަވާއިދާ ހިލާފަށް ހިޖުރަކުރާ މީހުންގެ މައްސަލަ ބޮޑުވެފައިވާ މި ދަނޑިވަޅުގައި، ޒިޔާރަތްކުރާ މީހުން ދުރާލައި ސްކްރީން ކުރެވޭނެ މިފަދަ ޑިޖިޓަލް ނިޒާމުތަކަކީ ގައުމީ ސަލާމަތަށްޓަކައި ކޮންމެހެން ބޭނުންތެރި ވަސީލަތްތަކެކެވެ.
