އއ.އުކުޅަހުގައި ބޭއްވުނު އީދުކުޅިވަރުގެ ތެރެއިން ހަމަނުޖެހުން ހިނގިކަމަށް ބުނެ ފަތުރަމުންދަނީ ދޮގު ޚަބަރުތައް ކަމަށް އެރަށު ކައުންސިލުން ވިދާޅުވެއްޖެއެވެ.
އުކުޅަހުގައި އަޟުހާ އީދު ފާހަގަ ކުރުމުގެ ގޮތުން ބޭއްވުނު މަސްރޭހުގެ ތެރެއިން ބަޔަކު ހަމަނުޖެހުން ހިންގާފައިވާކަމަށްބުނެ ބައެއް މީޑިޔާތަކުގައި ފަތުރަމުންދާ ޚަބަރު އެރަށު ކައުންސިލުން ދޮގުކޮށްފިއެވެ.
އެރަށު ކައުންސިލްގެ ރައީސް ޝައުކަތު އިބްރާހިމް ވިދާޅުވީ މަސްރޭސް ތެރޭގައި ހަމަނުޖެހުމެކޭ ބުނާ ވަރު ކަމެއް ނުހިނގާކަމަށާއި މަސްރޭސް ތެރެއިން ޖެހުނު މައްސަލަ މިހާރު ހައްލުވެފައިވާކަމަށެވެ.
”އަސްލު ހަމަ ނުޖެހުމެކޭ ބުނާ ވަރު ކަމެއް ނުހިނގާ. ދޯނިތައް ލެފުމުގެ ތެރޭގައި އެއް ދޯންޏަށް ސިކުންތު ކޮޅެއް ލަހުން މި ލެފުނީ. ދެން އެ ދޯނި ރޭހުން ޑިސްކޮލިފައިކޮށްލަން އުޅުމުން ކުޑަ ދެބަސްވުމެއް ހިނގީ. މައްސަލަ މިހާރުވަނީ ހައްލުވެފަ“ ޝައުކަތު ވިދާޅުވިއެވެ.
ރާއްޖޭގެ އެކި ކަންކޮޅުތަކުގައި ކޮވިޑް-19 ގެ ނުރައްކާ އިތުރުވެފައިވާ މިދަނޑިވަޅުގައި ރާއްޖެގެ ގިނަ ރަށްތަކުގައި ވަނީ ކުލަގަދަކޮށް އީދު ފާހަގަކޮށްފައެވެ. އެޗްޕީއޭގެ ހުއްދައާއެކު ރައްކާތެރިކަމުގެ ފިޔަވަޅުތައް ވަރުގަދަކޮށް އީދު ފާހަގަކުރުމަށް ރާއްޖޭގެ އެކި ކަންކޮޅުތަކުން މީހުންވަނީ ދަތުރުކޮށްފައެވެ.
