އެއީ ބަނީ އިސްރާއީލުންގެ ތެރޭގައި އުޅުނު ވަރަށް މާތް އަޅުވެެެރިއެކެވެ. ހުރިހާ ވަގުތެއަގައިވެސް ﷲ ސުބުޙާނަހޫ ވަތަޢާލާ އަށް އަޅުކަންކޮށް އެކަލާނގެ ހަނދުމަކޮށް ޛިކުރުކުރުމުގައި އަވަދިނެތި އުޅެމުން ދިޔަމީހެކެވެ.
އެއްދުވަހަކު މިއަޅުވެރިޔާގެ ގާތަށް ބަނީ އިސްރާއީލުންގެ ޖަމާއަތެއްގެ ބަޔަކު އައިސް ބުނެފިއެވެ. “އޭ ސާހިބާއެވެ. ކައިރި ޤަބީލާއެއްގެ ބަޔަކު މިތާކައިރީ ހުރި ގަހަކަށް އެބަ އަޅުކަންކުރެއެވެ.” ފަހެ މިވާހަކަ އަޑުއިވުމާއި އެކު އަޅުވެެރިޔާ ވަރަށް ދެރަވިއެވެ. އަދި ބޮޑު ފުރޯއެއް ކޮންޑަށް ލައިގެން އެގަހާއި ދިމާލަށް ހިނގައިގެންފިއެވެ. އަދި ބުންޏެވެ. “މާތްﷲ ގަންދީ ހުވާކޮށްފައި ބުނަމެވެ. އަހުރެން މިއަދު އެގަސް ކަނޑާލާހުށީމެވެ.” ކޮންމެއަކަސް އަޅުވެރިޔާ އެގަސްކަނޑާލަން ދިޔަމަގުމަތީގައި އިބުލިސް މުސްކުޅި ފިރިހެނެއްގެ ސިފައިގައި އައިސް އަޅުވެރިޔާއާއި ބައްދަލުކުރިއެވެ. އިބުލިސް ބުންޏެވެ.
“ކަލޭ ތިޔައުޅެނީ ކީތްކުރަންހެއްޔެވެ.؟” އަޅުވެރިޔާ ބުންޏެވެ. “އަހުރެން މިއުޅެނީ މާތްﷲ ފިޔަވައި މީސްތަކުން އަޅުކަން ކޮށް އުޅޭ ގަސް ކަނޑާލާށެވެ.” އެހިނދު އިބުލިސް ބުންޏެވެ. “އެގަހަކާ ކަލޭއަކާއި ކޮންކަމެއް ހެއްޔެވެ. އެކަމާ ކަލޭ ފިކުރުބޮޑުވާނެ ކަމެއްނެތެވެ. ގަސްކަނޑާލަން ވަގުތު ބޭކާރު ކުރުމަށްވުރެ މާތްﷲ އަށް އަޅުކުރުމުގައި އެވަގުތުކޮޅު ހޭދަކުރުން ކަލެއަށް މާ ހެޔޮކަންބޮޑުވެގެން ވެއެވެ.” ޖަވާބުގައި އަޅުވެރިޔާ ބުންޏެވެ. “މިވެސް މާތްﷲ ގެ މަގުގައި ކުރާ ހެޔޮކަމެކެވެ.” އެހިނދު ޝައިތޯނާ އަޅުވެރިޔާ އަށް އެކަން މަނާކޮށް އޭނާ ހުއްޓުވަން މަސައްކަތްކުރިއެވެ. އަދި އެކަންތައް ބޮޑުޒުވާބަކަށް ބަދަލުވެ އެންމެފަހުން ދެމީހުން އަރައިރުންވެ ގަޔަށް އަތްލައި އޮޅުލައިގަތެވެ.
ނަމަވެސް އަޅުވެރިޔާ ޝައިތޯނާ ބިންމައްޗަށް ވައްޓާލައި އޭނާގެ މަށްޗަށް ގަދަވެގަތެވެ. އެހިނދު އަޅުވެރިޔާ ކިބައިން ސަލާމަތްވާނެ އެއްވެސް ގޮތެއް ނެތުމުން އަލުވެރިޔާގާތުގައި ޝައިތޯނާ އާދޭސްކުރަން ފެށިއެވެ. މިމަކަރުވެރި އާދޭސްތަކަށް ހެއްލި އަޅުވެރިޔާ ޝައިތޯނާ ދޫކޮށްލިއެވެ. ހަމަ ދޫކޮށްލުމާއި އެކު އަނެއްކާވެސް ޝައިތޯނާ ބުންޏެވެ. “މާތްﷲ ތިބާގެ މައްޗަށް ތިޔަ ގަސްކަނޑަން ފަރުޟު ނުކުރައްވައެވެ. އަދި ތިގަސް ކަނޑާނުލިޔަސް ތިބާއަށް ގެއްލޭނެ އެއްވެސް އެއްޗެއް ނެތެވެ.
ތިޔައީ ކޮންމެހެން ބޭނުން ކަމެއްނަމަ މާތްﷲ ފޮނުއްވި ކޮންމެވެސް ރަސޫލުބޭކަލަކު ތިޔަކަންތައް ކުރެއްވީހެވެ.” ނަމަވެސް އަަޅުވެެރިޔާ އިބުލީސްދައްކާ އެއްވެސް ވާހަކަޔަކަށް ސަމާލުކަން ނުދެއްވައި ގަސްކެނޑުމުގެ މަސައްކަތާއިގެން ކުރިޔަށް ދިޔައެވެ. އެހިނދު އަނެއްކާވެސް އިބުލީސް އަޅުވެރިޔާގެ މަސައްކަތަށް ހުރަސް އެޅިއެވެ. އަދި ޒުވާބުކޮށް އަރައިރުންވެ އަނެއްކާވެސް ދެމީހުން ތަޅައިފޮޅައިގަތެވެ. މިފަހަރުވެސް އިބުލީހުގެ މަށްޗަށް އަޅުވެެރިޔާ ގަދަވެގަތެވެ. އަދި އިބުލީސް ބިންމަށްޗަށް ވައްޓާލައި ނޭވާ ނުލެވޭ ވަރުކޮށްލިއެވެ.
ސަލާމަތްވާނެ އެއްވެސް ގޮތެއް ނެތުމުން އިބުލީސް އާދޭސްކުރަން ފެށިއެވެ. ނަމަވެސް ހަމަދޫކޮށްލުމާއި އެކު ބުންޏެވެ. “ތިޔަގަސް ކަނޑައި ނުލައި ދޫކޮށްލާށެވެ. އަހުރެން ތިޔަށްވުރެ ފައިދާހުރި ކަމެއް ކަލެއަށް ހުށްހަޅާފާނަމެވެ. ކަލެއަކީ ނުލާހިކު ފަޤީރުމީހަކީމުއެވެ. އެހެން ކަމުން އަހުރެން ކޮންމެ ދުވަހަކު ކަލެއަށް ރަނުގެ ތިން ފައިސާފޮތި ދޭނަމެވެ. އަދި ކަލޭ ހޭލާ އިރު ބާލީސްދަށުގައި އެފައިސާ ހުންނާނެ ގޮތް ހަމަޖައްސައިދޭނަމެވެ.
އޭރުން އެފައިސާއިން ކަލޭގެ ތިމާގެ މީހުންނަށް ޚަރަދުކޮށް ބޭނުންޖެހިފާއިވާ މީހުންނަށް އެހީތެރިވެ ސޮދަގާތްކޮށް އެހެނިހެން ބޭނުންތައް ފުއްދާލެވޭނެއެވެ. އެހެންނޫނަސް ގަސްކެނޑުމަކީ ބޭކާރުކަމެކެވެ. ކަލޭ ގަސް ކަނޑާލިޔަސް މާދަމާ އެމީހުން އަނެއްކާ އާގަހެއް އިންދާނެއެވެ.” އިބުލިސް މިހެން ބުނުމުން އަަލުވެރިޔާ އެގަސް ނުކަނޑައި ގެޔަށް ހިނގައްޖެއެވެ. ފުރަތަމަ ދުވަހު ހޭލި އިރު ބާލީސްދަށުގައި ތިން ދީނާރު އޮތެވެ. އަދި ދެވަނަ ދުވަހުވެސް ތިން ދީނާރު އޮތެވެ.
ނަމަވެސް ތިންވަނަ ދުވަހަކު ދީނާރެއް ނެތެވެ. އެހިނދު އަޅުވެރިޔާ އިންތިހާއަށް ރުޅިއައިސް ފުރޯ ހިފައިގެން އެގަހާ ދިމާލަށް ހިނގައިގަތެވެ. އަދި ކުރީފަހަރުވެސް ބައްދަލުވި މުސްކުޅު މީހާއާއި ބައްދަލުވެގެން ސުވާލިކުރިއެވެ. “ފުރޯހިފައިގެން ކަލޭ ތިޔަދަނީ ކޮންތާކަށް ހެއްޔެވެ.؟” އެހިނދު އަޅުވެރިޔާ ހަޅޭއްލަވައިގެންފައި ބުންޏެވެ. “މިދަނީ ﷲ ފިޔަވައި މީސްތަކުން އަޅުކަންކުރާ ގަސްކަނޑާލާށެވެ.” އިބުލިސް ބުންޏެވެ. ތިބާ ތިޔަހެދީ ދޮގެކެވެ.
އަހުރެން ކަލޭއަކަށް ތިޔަކަމެއް ވިޔަކަ ނުދޭނަމެވެ. މިހެންކިޔާފައި އަޅުވެރިޔާ ގަސްކަނޑަން ފުރޯ އިން ހަމަޖަހާ އިރަށް އިބުލީސް އޭނާ ގައިގައި ބައްދައި ގަނެ ގުޅަވަރަކަށް ބިންމަށްޗަށް ވައްޓާލިއެވެ. އަދި ކަރުގައި ހިފައި ނޭވާނުލެވޭ ވަރުކޮށްލާފައި ބުންޏެވެ. “އަހަންނަކީ ކާކުކަން ކަލެއަށް އެނގިއްޖެހެއްޔެވެ.؟ އަހަންނަކީ ޝައިތޯނާއެވެ. ފުރަތަމަފަހަރު ކަލޭ ގަސްކަނޑަން އައީ މާތްﷲ ގެ ވަޖުހުފުޅަށްޓަކައެވެ. އެހެންކަމުން އަހަންނަށް ކަލޭގެ މައްޗަށް ބާރުނުފޯރުވުނީއެވެ. އަދި 3 ދީނާރުގެ ދަޅައިގައި ކަލޭ ހައްލާލީ އެހެންވެއެވެ.
އެކަމަކު މިހާރު ކަލޭތިއައީ ދީނާރުކޮޅުގެ ދަހިވެތިކަމުގައެވެ. އެހެންވެ އަހުރެންކަލޭގެ މަށްޗަށް ގަދަވެހަތީއެވެ.
”އިބުރަތް:- މިވާހަކައިން އަޅުގަނޑުމެންނަށް ވަރަށްބޮޑު އިބުރަތެއް ލިއްބައިދެއެވެ. އެގޮތުން މާތްﷲ ގެ ވަޖުހުފުޅަށްޓަކައި ކުރާ އަމަލުތަކުގައި އެކަލާނގެ ބަރަކާތްލައްވައި ވާގިވެެރިވެވޮޑިގެންވާނެ ކަމެވެ. ނަމަވެސް ދުނިޔެވީ ފައިދާއަށްޓަކައި ކުރާކަންކަމަކީ ގެއްލެނިވެގެންވާ އަމަލުތަކެއްކަމެވެ. އަދި ބޮޑެތި އަޅުވެރިން މަޤުފުރައްދާލުމުގައިވެސް ފައިސާއަކީ ޝައިތޯނާ ބޭނުންކުރާ ވަރަށް މުހިންމު ހަތިޔާރެއްކަމެވެ.
ނޯޓް:- ދުނިޔެވީ އަރާމާއި ދަޅަތަކުން ޝައިތޯނާ އަޅަމެން ހެއްލުންތެރިކުރުވަނީ މިފަދަ ގޮތަކަށެވެ. އޭގެ ސަބަބުން ދުނިޔެ ބާއްޖަވެރިވާނެކަމުގެ ދަލުގައި ޖައްސުވައެވެ. މިއީ މިއަދު އަޅުގަނޑުމެންގެ މި މުޖުތަމަޢުއިންވެސް ފެންނަކަމެކެވެ. ބައެއް ދީނީ އިލްމުވެރިންނާއި ހެޔޮލަފާ ޞާލިހު މީސްތަކުންވެސް ތިބީ އެބައިމީހުންނަށް ލިބެމުންދާ ދުނިޔެވީ މަންފާތަކާއި މަތީމަޤާމުތަކާއި ޖާހާއި ޢިއްޒަތަށްޓަކައި މުންކަރާތަކަށް ކަނުލޮލެއް ދީގެނެވެ.
އަނގައިން ޗުޕްއޭ ވެސް ބުނެލެވޭވަރަށްވުރެ ބޮޑަށް އެފަދަ އަރާމާއި ލައްޒަތްތަކުގައި ބަނދެވިފައެވެ. މާތް ނަބިއްޔާ މުޙައްމަދު ރަސޫލުﷲ ސައްލަﷲ އަލައިހި ވަސައްލަމް ހަދީޘްފުޅު ކުރައްވާފައިވެއެވެ. “ދީނާރާއި ދިރުހަމުގެ އަޅާ އަބާއްޖަވެރި ވެއްޖެއެވެ. ދީނާރާއި ދިރިހަމުގެ އަޅާ އަބާއްޖަވެރި ވެއްޖެއެވެ.
”އިސްވެދިޔަ ވާހަކައިވެސް އިނގޭގޮތުގައި ޝައިތޯނާ އަޅުގަނޑުމެންގެ މަށްޗަށް ވެރިވެގަންނަނީ އަޅުގަނޑެންގެ އީޚުލާސްތެެެރިކަން ނެތިދިޔުމުންނެވެ. އެހެންކަމުން ކުރާކޮންމެ ކަމެއްގައިވެސް އިޚުލާސްތެރިވުމަކީ އެންމެ މުހިންމުކަމެވެ.
މާތްނަބިއްޔާ މުޙައްމަދު ރަސޫލުﷲ ސައްލަﷲ އަލައިހި ވަސައްލަމަގެ އަރިހުން ސާލިމް ރިވާކުރެއްވި ހަދީސްބަސްފުޅެއްގެ މާނައިގައި ވެއެވެ. “ޤިޔާމަތްދުވަހު ބަޔަކުމީހުން ހިސާބު ބެއްލެވުމަށް ގެނެވޭނެއެވެ. އެބައިމީހުންގެ ހެޔޮކަންތައް ތުހާމަ ފަރުބަދަޔާއި އެއްވަރުވެގެން ވެއެވެ. ނަމަވެސް މާތްﷲ އެމީހުންގެ ހެޔޮ އަމަލުތައް ވަޔަށް ބުރުއްސާލައްވައި އެބައިމީހުން ނަރަކަޔަށް އެއްލަވާލެއްވުމަށް އަމުރުކުރައްވާނެއެވެ.
“އެހިނދު ސާލިމް ދެންނެވިއެވެ. “މާތް ނަބިއްޔާއެވެ. އެއީ ކޮންބައެއްތޯއެވެ.؟ އެފަދަމީހަކަށް ވެދާނެތީ އަޅުގަނޑު ބިރުގަނެއެވެ. އެހިނދު މާތްނަބިއްޔާ ހަދީޘްފުޅު ކުރެއްވިއެވެ. “އެމީހުންނަކީ ދެއްކުމަށްޓަކައި ނަމާދުކޮށް ރޯދަހިފާ މީހުންނެވެ.” އެހެން ހަދީޘްފުޅެއްގައި ވެއެވެ.
އެމީހުންނަކީ ރޭގަނޑު ދަންވަރުގައިވެސް މާތްﷲ އަށް އަޅުކަންކުރުމުގައި ބުރައުފުއްލި ބައެކެވެ. އެކަމަކު ހަރާމްކަމެއް ހުށަހެޅިއްޖެ ނަމަ އެކަމުގެ މަށްޗަށް އެބައިމީހުން ފުންމައިގަނެއެވެ. އެހެންކަމުން އަރަހުށި މާތްﷲ އެބައިމީހުންގެ އަލުތައް ބާތިލުކުރެއްވީ އެވެ. އަޅުގަނޑުގެ ދުޢާއަކީ މިފަދަ އެންމެހާ ކަންތައްތަކުން މާތްﷲ ސުބުޙާނަހޫ ވަތަޢާލާ އަޅަމެން އެންމެން ސަލާމަތްކޮށްދެއްވުމެވެ. އާމީން
މަސްދަރު:- މިވާހަކައަކީ އިމާމް އަބޫ ހާމިދު މުޙައްމަދު އަލް ޣަޒާލީ ލިޔުއްވާފައިވާ إحياء علوم الدين ފޮތުން ނަގައި ތަރުޖަމާކުރެވިފައިވާ ވާހަކައެވެ. މިވާހަކަ ކުޑަކުޑަ ތަފާތަކާއި އެކު އަލް ހަސަނުގެ އަރިހުން އަލްމުބާރަކު އަބޫ ފަޟާލަތު ރިވާކުރައްވާފައިވެއެވެ.
