إياس بن معاوية المزني އަކީ އިރާގުގެ ބަޞަރާގައި އުޅުއްވި ގާޒީއެކެވެ. ތާބިޢީ ބޭކަލެކެވެ. އިސްލާމީ ތާރީޚުގައި އެކަލޭގެފާނު މަޝްހޫރުވެފައިވަނީ ވަރަށް ހިކުމަތްތެރި ވިސްނުންތޫނު ބޭކަލެއް ގޮތުގައެވެ. އެއްދުވަހަކު إياس بن معاوية المزني ގެ އަރިހަށް މީހަކު ދިޔައެވެ. އަދި އެކަލޭގެފާނާއި ސުވާލުކުރެއްވިއެވެ. “އޭ إياس بن معاوية އެވެ. އިސްލާމްދީނުގައި ރަލުގެ ހުކުމަކީ ކޮބައި ހެއްޔެވެ.؟”
ޖަވާބުގައި إياس بن معاوية ދެންނެވިއެވެ. “ޝައްކެއްވެސް ނެތެވެ. “އެއީ ހަރާމްކަމެކެވެ.” އެހިނދު އެމީހާ އަނެއްކާވެސް ސުވާލު ކުރިއެވެ. “އެހެންވެއްޖިޔާ ފެނުގެ ހުކުމަކީ ކޮބައި ހެެއްޔެވެ.؟” ޖަވާބުގައި إياس بن معاوية ދެންނެވިއެވެ. “ފެނަކީ ހަލާލު އެއްޗެކެވެ.” އެހިނދު އެމީހާ އަނެއްކާވެސް ސުވާލުކުރިއެވެ. “ތިޔަހެން ވިއްޔާ ކަދުރާއި މޭބިސްކަދުރާއި މެދު ކަލޭގެފާނު ބުނާނީ ކީކޭހެއްޔެވެ.؟” ޖަވާބުގައި ގާޒީ إياس ދެންނެވިއެވެ. “އެއީ ހަލާލު ތަކެއްޗެވެ. އެޔަކު އެއްވެސް ޝައްކެއް ނެތެވެ.” ދެންފަހެ އެމީހާ ދެންނެވިއެވެ. ތިޔަހުރިހާ ތަކެއްޗަކީ (ބަނގުރާ ތައްޔާރުކުރުމަށް ބޭނުންކުރާ) ހަލާލުތަކެތި ކަމުގައި ވާއިރު އެތަކެތި އެއްކޮށްލުމުން ހަރާމް ވާންވީ ކީތްވެ ހެއްޔެވެ.؟
ޖަވާބުގައި ގާޒީ إياس بن معاوية ވެސް ކުރެއްވީ ސުވާލެކެވެ. އެގޮތުން އެމީހާ އާއި ދިމާލަށް ވަރަށް ރަނގަޅަށް ބައްލަވާލާފައި ވިދާޅުވިއެވެ. “އަހުރެން ތިބާ ގަޔަށް އަތްފުރާ ހިރަފުސް ވެލި ޖަހައިފިއްޔާ ތިބާއަށް ދަތުވާނެ ހެއްޔެވެ.؟” އެމީހާ ދެންނެވިއެވެ. “ނޫނެކެވެ. ވެލިޖަހައިގެން ތަދެއް ނުވާނެއެވެ.” إياس އަނެއްކާވެސް އެއްސެވިއެވެ. “ތިޔަހެން ވެއްޖިޔާ އަހަރެން ތިބާ ގައިގައި ހުއިބޮނޑިޔަކުން ޖަހައިފިއްޔާ ތިބާއަށް ތަދުވާނެ ހެއްޔެވެ.؟” އެމީހާ ދެންނެވިއެވެ. “ނޫނެކެވެ. އެއްވެސްވަރަކަށް ތަދެއް ނުވާނެއެއެވެ.” ގާޒީ އަނެއްކާވެސް ސުވާލުކުރެއްވިއެވެ.
“އަހުރެން ތިބާ ގަޔަށް ދެއަތްފުރާ ފެން ޖަހައިފިއްޔާ ތިބާއަށް ތަދުވާނެ ހެއްޔެވެ.؟” އެމީހާ ދެންނެވިއެވެ. “ނޫނެކެވެ. ފެންޖަހައިގެން ތަދެއް ނުވާނެއެވެ.”އެހިނދު إياس بن معاوية ވިދާޅުވިއެވެ. އެންމެ ރަނގަޅެވެ. އަހަރެން ފެނާއި ޗަކަވެއްޔާއި ހުއިބޮނޑިޔާއި އެއްކޮށްލާފައި އެތަކެތި ރަނގަޅަށް ހިކި ގާބުރިޔަކަށް ވުމުން އޭގެން ތިބާ ގައިގައި ޖަހައިފިއްޔާ ތިބާ އަށް ތަދުވާނެހެއްޔެވެ.؟ އެމީހާ ދެންނެވިއެވެ. “އެއްވެސް ޝައްކެއްނެތެވެ. އޭރުން ވަރަށް ތަދުވާނެއެވެ. ފަހަރެއްގަ ޖެހޭހޮތަކުން މަރުވެސް ވެދާނެއެވެ.” ދެންފަހެ إياس بن معاوية އެމީހާއަށް ދެންނެވިއެވެ. ބަނގުރަލަކީވެސް ހަމަ އެފަދަ އެއްޗެކެވެ. އެވެސް ހަރާމްވަނީ އެހުރިހާ ތަކެއްޗެއް އެއްވުމުންނެވެ.
މަސްދަރު:- އިސްލާމިކް ޝޯޓް ސްޓޯރީސް ޕޭޖް
